Read SEBR SÕNGO, 1998 A Ooze 8 Bible Online

A Ooze 8 - SEBR SÕNGO, 1998 bible

A Ooze 8

¹Rɩk f baorg n peebe. Sɩlg n laand Sẽn-Ka-Saab roogã zugu, bala bãmb kɩɩsa mam kaoolã la b kɩɩsa mam tõogã.

²Bãmb na n kelem n boola maam n yeele: Wẽnnaam! Tõnd Israyɛll nebã mii yãmba!

³Israyɛll nebã zãgsa neer maanego, la bɛ na n diga bãmba.

⁴B yãka rĩm-dãmb ne nanambse, n ka sok maam ye. Bãmb dɩkda b wanzuri wã ne b sãnemã, n maan wẽn-naandse, la bõn-kãng n na n kẽes-b moogo.

⁵Samaari nebã, mam kisa yãmb sãnem nag-bilã. Mam sũur puuga ne yãmba. Dabʋr la y na n yɩ neb sẽn ka tar yelle?

⁶Yãmb sãnem nag-bilã yita Israyɛlle. Ka Wẽnnaam n naan-a ye, yaa tʋʋm-mit n dõog-a. Woto yĩnga, b na n wãa Samaari nag-bilã.

⁷Bãmb bʋda sebgo, la b na n tigsa saag sebgo. Bãmb ka na n paam kaaf ye, La sẽn na n yi-bã kõn wom biis ye. B sã n wom me, sãamb n na n dɩ-ba.

⁸B rɩta Israyɛll nebã! Moasã bãmb bee buudã sʋka, wa laok sẽn ka leb n tar yõod ye.

⁹Bala, bãmb kẽnga Asiiri. We-bõangã yɛsa yɩɩga. Toog paama Efrayiim nebã, bãmb sõm-baoorã yĩnga.

¹⁰Baa ne toogã sẽn paam bãmb buudã sʋkã, mam na n tigma bãmba, n kɩt tɩ nanambsã rĩm nams-ba.

¹¹A Efrayiim maana tẽn-kug ka tɛka, n na n yiis b yel-wẽnã, la tẽn-kugã yĩng kɩtame tɩ b maan yel-wẽnã.

¹²Baa mam sã n gʋls m tõogã yɛl fãa n kõ-ba, b na n geelg-b-la wa bõn-sãamse.

¹³Bãmb kʋʋda rũms n maand maand mam yĩnga, n wẽneg n wãbd rũmsã nemdo, Sẽn-Ka-Saab ka reegd-b ye. Moasã, bãmb ka yĩmd b beegrã ye. Bãmb sɩbgda bãmb b yel-wẽnã yĩnga, la b na n lebg n leba Ezɩpte.

¹⁴A Israyɛll nebã yĩma b naandã n me ro-bɛda. Zʋʋda nebã mee tẽn-bɛd wʋsg sẽn gũbg ne lalse. Mam na n kɩtame tɩ bugum dɩ pãng zĩisã.