Read SEBR SÕNGO, 1998 A Ooze 9 Bible Online

A Ooze 9 - SEBR SÕNGO, 1998 bible

A Ooze 9

¹Israyɛll nebã, da maan-y sũ-noog ye, ra kɩdm-y wa buud a taabã ye. Bala, yãmb basa y Wẽnnaamã n maan yoobo, la y reega yaood sẽn ka zems zeesã fãa zĩisẽ.

²Zeesã ne divẽ wẽkr zĩisã ka na n kõn yãmb sũ-noog ye.

³Efrayiim nebã ka na n pa Sẽn-Ka-Saab tẽngẽ wã ye, bãmb na n leba Ezɩpte, la Asiiri me, bãmb na n dɩɩ rɩɩb sẽn ka yɩlemde.

⁴Bãmb ka na n leb n wa ne bõn-yũudl kũuni, n kõ Sẽn-Ka-Saab ye. Bãmb maandã ka na n kõ Sẽn-Ka-Saab sũ-noog ye. A na n yɩɩ wa sũ-sãang rɩɩbo, la neb nins fãa sẽn na n dɩ-a wã na n dẽgma b mense. Bãmb dɩɩbã na n pa b pʋsẽ bala, a ka na n kẽ Wẽnnaam doogẽ wã ye.

⁵Yãmb na n maana bõe daar ning sẽn yaa Sẽn-Ka-Saab tigrã daare?

⁶Bala, sãoongã yĩnga, bãmb zoetame, la Ezɩpt tẽngã na n deega bãmba, la b na n muma bãmb Memfis tẽnga. Mood na n dɩɩ bãmb paoongã, la gõos na n yii bãmb sik zĩisẽ wã.

⁷Daar ning Sẽn-Ka-Saab sẽn na n sɩbg bãmbã watame. Toogã daar watame. Israyɛll nebã na n paama toogo! No-rɛɛsã na n lebga yalma, la neb nins sẽn tar Wẽnnaam Sɩɩgã na n zʋbsame, yãmb beegrã sẽn yaa wʋsgã, la y sẽn yaa zab-zabdbã yĩnga.

⁸Wẽnnaam no-rɛɛsã sẽn gũud Efrayiim nebã bee ne mam Wẽnnaamã. Bẽds bee bãmb soayã fãa zutu. Zabr bee bãmb Wẽnnaamã roogẽ.

⁹Bãmb pida ne wẽnga, wa Gibeya nebã wakatẽ. Sẽn-Ka-Saab ka yĩm bãmb kongrã ye, la b na n sɩbga bãmb b yel-wẽnã yĩnga.

¹⁰Mam yẽnda Israyɛll nebã, wa reezẽ biis sẽn be we-raoog pʋgẽ. Mam yãnda b ba-rãmbã wa kankam-kãse, la wa kankang bi-rẽemse. La bãmb kẽng n tɩ waooga Baall-Pewoore, n tɩ maan yãn-tʋʋmã, la b lebga yel-beed wa b sẽn nong-a soabã.

¹¹Sã n yaa ne Efrayiim, a ziirã na n yɩk n looga wa liuula, rogem kõn leb n doge, pag kõn leb n zã pʋga, pag kõn leb n kẽ pʋga.

¹²Bãmb sã n gʋʋnd b kambã, mam na n kʋ-b lame tɩ b na n ka lebg raop ye. Mam sã n wa zãag n bas-ba, b na n paama toogo.

¹³Mam sẽn get a Efrayiima, a yaa wa koms tɩɩs b sẽn sel ko-bundum noore, la Efrayiim na n yiisa a kambã n kɩs b kʋʋd-ba.

¹⁴Zu-soaba, kõ-y sɩbgre! Sɩbg bʋg la yãmb na n sɩbg-ba? Kɩt-y tɩ b pagba pʋs yita! Tɩ b ra leb n tõog n yẽsem kamb ye.

¹⁵Bãmb wẽngã fãa pʋka Gilgalle! Yaa beenẽ la mam kisg bãmba. Bãmb yel-manesem wẽngã yĩnga, mam na n diga bãmb n yiis m doogã pʋga. Mam ka na n kell n nong bãmb ye. Bãmb nanamsã yaa kɩɩsdba.

¹⁶B luba Efrayiim, a yẽgã kʋɩɩme, a kõn leb n wom biis ye. La baa bãmb sã n dog kamba, mam na n kɩtame tɩ kamb nins bãmb sẽn nongã ki.

¹⁷Mam Wẽnnaamã na n basa Efrayiim dãmbã. Bala, b pa kelg bãmb ye. Yaa rẽ n kɩt tɩ b na n lebg yɛɛbdba bu-zẽmsã sʋka.