Read SEBR SÕNGO, 1998 A Zowɛlle 2 Bible Online

A Zowɛlle 2 - SEBR SÕNGO, 1998 bible

A Zowɛlle 2

¹Peeb-y baorg Sɩyõ! Kelm-y mam tãn-sõngã zugu. Bɩ tẽngã nebã fãa rig ne rabeem! Bala, Sẽn-Ka-Saab daarã watame, la a taame n sɛ.

²Yaa lik ne lik bida daare, na n yɩɩ sawat sẽn yaa lik tuu daare, ra-kãng wata wa zĩ-yẽegr sẽn pukd tãmsã zutu. Yaa buud[4] sẽn yaa wʋsgo, n tar pãnga, Bu-kãng buud zɩ n zĩndi, la a buud kõn tol n leb n zĩndi, hal baa zamaan ning sẽn watã pʋgẽ ye.

³Bu-kãng na n waa wa bugum sẽn dɩta, a taoor yaa bug-witim n dɩtẽ, t'a poorẽ yaa bugum n dɩtẽ. Sẽn deng a waoongã, tẽngã rag n yaa wa Edɛn zẽedã zĩiga, la a loogrã poore, tẽngã sãama zãnga, n lebg we-raoogo. Bũmb ka tõe n zoe n põs-a ye.

⁴Bãmb bʋrgã wẽnda wiid sẽn zoete, bãmb zoeta wa wed-rʋʋdba.

⁵B maanda bʋrg wa saar-dãmba, wa saar-dãmb sẽn yi tãms zut n zoet n sigda. B bʋrgã wẽnda bug-witim bʋrgo. B wata wa tãb-biis sẽn tar pãng sẽn teedg n na n zabe.

⁶Nebã sã n yãnd b sẽn watã, lebga rabeem la rigbu, tɩ nebã fãa nens bendge.

⁷Bãmb zoeta wa gãndaado, b gãensda lals wa zabr pʋgẽ gãndaado. B ned kam fãa teesa tɩrg n kẽnda, n ka bʋdgd n bas a sor ye.

⁸Bãmb ned ba a yembr ka tusd a to ye. Ned kam fãa rɩka a sore. Bãmb wẽdgda pɛɛmã sẽn fɩɩndã sʋk n loogdẽ, la b ka sãeegd n bas taab ye.

⁹Bãmb kẽe tẽngã ne pãnga, n zoet lalsã zut n tũud peem-leesẽ wã n kẽed rotã pʋs wa wagda.

¹⁰B sã n watẽ, tẽn-gãongã rĩmdame, tɩ saasã miimdẽ, tɩ wĩndgã ne kiuugã lebgd lika, tɩ ãdsã vẽenem ki.

¹¹Sẽn-Ka-Saab lʋɩ b tãb-biisã taoor n tãsdẽ, bãmb tãb-biisã sõor yaa kʋʋngo, sẽn sakd-b bãmb noorã tara pãnga. Bala, Sẽn-Ka-Saab daarã yaa ra-kãsenga, la a seka yɛɛsg wʋsgo. Dẽ, ãndã n na n tõog n põs ra-kãnga?

¹²Moasã yɛsa, Sẽn-Ka-Saab yetame: «Lebg-y n wa-y mam nengẽ ne y sũyã fãa, wa-y ne no-loeere, ne yãbr la wiisgu!

¹³Da pãrs-y y fut ye, maneg-y y sũyã, n lebg n wa Sẽn-Ka-Saab sẽn yaa yãmb Wẽnnaamã nengẽ, bala, b yaa sugr soaba, la nimbãan-zoeer soaba, bãmb sũur ka yikd tao-tao ye, la b yaa nonglem-kãseng soaba, bãmb sã n sɩbge, b sũurã sãamdame.

¹⁴Ãnda n mi b sã n ka na n tek yam, wall b sã n ka na n ning bark b sã n wa pɩʋʋgdẽ? Wa-y ne bõn-koaadl kũuni, la bõn-yũudl kũuni, n wa kõ Sẽn-Ka-Saab sẽn yaa yãmb Wẽnnaamã.

¹⁵Peeb-y baorg Sɩyõ! Yãk-y daar no-loeer yĩnga, moon-y tigin-kãseng daare!

¹⁶Tigm-y nebã, segl-y tiging sẽn welg toore! Tigm-y kãsem-dãmbã, la y tigim kambã, baa ne kom-peelsã sẽn ket n yẽsemdẽ wã fãa! Bɩ yi-kãad-paalsã yi b rotẽ wã, tɩ pʋg-paalsã me yi b rotẽ!»

¹⁷Bɩ maan-kʋʋdbã sẽn tʋmd Sẽn-Ka-Saab yĩngã yals tẽn-kugrã ne zãongã sʋk n yãb n yeele: «Sẽn-Ka-Saabo, zoe-y y nebã nimbãanega! Da-y ning-y yãmb nebã yãnde, tɩ b wa lebg yel-bũnd buud a taabã yĩnga, tɩ b yetẽ tɩ bãmb Wẽnnaamã bee yɛɛnẽ ye.»

¹⁸Sẽn-Ka-Saab nonga b tẽngã ne nonglem-kãsenga. Bãmb zoee b nebã nimbãanega.

¹⁹Sẽn-Ka-Saab leoka b nebã n yeele: «Mam na n leb n kõo yãmb koodo, la m kõ-y reezẽ rã-paalga, ne kaam, yãmb na n tɩgame. Mam ka na n leb n bas tɩ yãmb paam yãnd buud a taabã taoor ye.

²⁰Mam na n diga yãmb nug-rɩtg bɛɛbã tɩ b zãag ne-yã, mam na n dig-b lame n tɩ kẽes tẽn-koɛɛng sẽn yaa vɩ-raoog pʋgẽ, m na n diga b tãb-biis nins sẽn deng taoorã n kẽes ko-kãsengã sẽn be yaangã pʋga, la m dig b tãb-biis nins sẽn pa poorẽ wã n kẽes ko-kãsengã sẽn be nin-taoorã pʋga. Bãmb na n põogame tɩ b yũugã zẽke, b põogrã yũug na n wulumda zĩig zãnga, bãmb sẽn maan yel-bɛdã yĩnga.

²¹Tẽnga, ra zoe rabeem ye, bɩ f maan sũ-noog n kɩdme, bala, Sẽn-Ka-Saab maanda tʋʋm-kãsemse!

²²We-rũmsi, da zoe-y rabeem ye. Bala, yamd leb n tobda we-raoogẽ wã, la tɩɩsã leb n womda biisi, kankamsã ne reezẽ tɩɩsã wom n zõondame.

²³Sɩyõ nebã, kɩdm-y-yã, la y maan sũ-noog ne Sẽn-Ka-Saab sẽn yaa yãmb Wẽnnaamã, bala, bãmb kɩtame tɩ dẽenem saag ni wa sẽn zems a wakate, bãmb sika sa-kẽeng yãmb yĩnga, bãmb kɩtame tɩ dẽenem ne yaoolem saag ni wa pĩndã.

²⁴Zeesã na n leb n pida ne koodo, la sĩmsã na n leb n pida ne reezẽ rã-paalga, la kaam.

²⁵Mam na n lebsa yãmb y koodã, sʋ-kitrzĩgnisã ne nesneedã la kalwaarã ne zũnzũyã sẽn dɩ wã. Bãmb yaa mam tãb-bi-kʋʋng m sẽn tʋm tɩ b zab ne yãmba.

²⁶Yãmb na n dɩɩme n tɩge, la y na n pẽga Sẽn-Ka-Saab sẽn yaa yãmb Wẽnnaamã yʋʋre, bãmb sẽn maan tʋʋm-kãsems n kõ yãmbã yĩnga.» B yeelame: «Mam nebã kõn tol n leb n paam yãnd ye.»

²⁷Yaa woto la y na n bãng tɩ mam bee ne Israyɛlle, la mam yaa Sẽn-Ka-Saab sẽn yaa yãmb Wẽnnaam, la Wẽnnaam a to ka be ye. Mam yetame: «Mam nebã kõn tol n leb n paam yãnd ye.»