Read SEBR SÕNGO, 1998 A Amoose 1 Bible Online

A Amoose 1 - SEBR SÕNGO, 1998 bible

A Amoose 1

¹Woto yaa a Amoos koeese. Yẽnda yaa Tekoa tẽng rũm-gʋʋnd a yembre. Wẽnnaam vẽnega yẽnda ne bũmb toay-toay sẽn kẽed ne Israyɛll wɛɛngẽ, Zʋʋda rĩm a Oozɩyaas wakate, la a Zoaas biig a Zeroboaam sẽn yaa Israyɛll rĩmã wakate, yʋʋm a yiib sẽn deng tẽn-digimdgã.

²A Amoos yeelame: Sẽn-Ka-Saab bee Sɩyõ n tãsdẽ, bãmb bee Zeruzalɛm n zẽkd b koɛɛga. Pe-kɩɩmbã rũms wãbneg zĩis kʋɩɩme, la Karmell tãngã zug lebga ware. Damaas nebã

³Ade, Sẽn-Ka-Saab yetame: Damaas yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bãmb namsa Galaad nebã, wa b sẽn pãbd ned ne kut rasaare,

⁴Mam na n kɩtame tɩ bugum dɩ rĩm a Azayɛll buudã, la bugmã na n dɩ a Bɛn-Hadaad pãng zĩisã.

⁵Mam na n kaoo Damaas tẽngã kʋɩlemse, la m menes Bikat-Avɛn nebã, la m sãam Bɛt-Edɛn nebã rĩm ning sẽn dɩt-a naamã, Mam na n talla Aram[1] nebã n tɩ kẽes yembd Kɩɩr tẽnga, Yaa Sẽn-Ka-Saab n yeele. Filistẽ-dãmbã

⁶Ade, Sẽn-Ka-Saab yetame: Gaaza yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bãmb yõga buud tõr nebã, n tɩ kẽes-b yembd Edom.

⁷Woto yĩnga, mam na n kɩtame tɩ bugum sig Gaaza tẽngã zugu, n dɩ a pãng zĩisã

⁸Mam na n menesa Asdood nebã fãa, ne Askelon ned ning sẽn zãad-a naam dasaarã. Mam na n sãama Ekrõ nebã, ne Filistẽ-dãmbã neb nins sẽn kellã. Yaa Sẽn-Ka-Saab n yeele. Feniisi nebã

⁹Ade, Sẽn-Ka-Saab yetame: Fenisi nebã yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bãmb yõga buud tõr nebã, n tɩ kẽes yembd Edom, la b ka tẽeg kaool ning b sẽn dag n maan ne Israyɛll nebã sẽn yaa b ba-biisã yell ye.

¹⁰Woto yĩnga, mam na n kɩtame tɩ bugum sig Tɩɩr tẽngã zugu, n dɩ a pãng zĩisã Edom nebã

¹¹Ade, Sẽn-Ka-Saab yetame: Edom nebã yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bãmb diga Israyɛll nebã sẽn yaa b saam-biisã ne zabr sʋʋga, n ka zoe b nimbãaneg ye. Bãmb ka tol n sik b sũur ne Israyɛll nebã ye, la kisgrã rag n ket n beeme.

¹²Woto yĩnga, mam na n kɩtame tɩ bugum sig Teman zugu, n dɩ Bostra pãng zĩisã. Amo nebã

¹³Ade, Sẽn-Ka-Saab yetame: Amo nebã yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bãmb weeda Galaad tẽng pagb nins sẽn tʋtã pʋse, sẽn na yɩl n yalg b soolmã.

¹⁴Woto yĩnga, mam na n kɩtame tɩ bugum sig Raba zugu, n dɩ a pãng zĩisã. Nebã sẽn na n wa kelem zabrã daarã, la sebgã fugb daare,

¹⁵B na n yõga Amo nebã rĩm ne a nanambsã n tɩ kẽes yembdo. Yaa Sẽn-Ka-Saab n yeele.