Read SEBR SÕNGO, 1998 A Amoose 4 Bible Online

A Amoose 4 - SEBR SÕNGO, 1998 bible

A Amoose 4

¹Samaari pagbã sẽn nob wa Basan nag-wubdsã, n be Samaari tãngã zugã, Kelg-y-yã! Yãmb namsda ka-pãens rãmbã, la y maand nimbãan-dãmbã pãnga, la y yet y sɩdbã tɩ b tall n wa tɩ y yũ.

²Zu-soab a Wẽnnaam sõmblmã pʋga, b wẽename n yeele: Wakat n wat yãmb yĩnga, tɩ b na n wa yõg yãmb ne gaagds n yiisi, la b yiis yãmb yagensã ne leoose.

³Yãmb ned kam fãa na n tũu tẽngã lalsã võyẽ n yi, la yãmb na n zoe n teesa nug-rɩtg sẽnẽ. Yaa Sẽn-Ka-Saab n yeele.

⁴Israyɛll nebã! Wa-y Betɛll Wẽnd doogẽ wã n kɩɩs maam, la y kẽng Gilgall n tɩ kɩɩs maam n paase! Maan-y y maandã yibeoogo, la y wa ne y piig pʋɩɩrã rasem a tãabã daare!

⁵Yõog-y y bark pʋʋsg maandã ne bur sẽn ning rã-bɩlle! Moon-y n togs-y y yamleoog kũunã, tɩ yaa woto la y nonga. Yaa Sẽn-Ka-Saab n yeele.

⁶Ad bũmb nins mam sẽn kõ yãmba: Yãmb tẽmsã fãa pʋse, rɩɩb ka be y sẽn na ning y noorẽ ye, rɩɩb ka be zĩig ba a yembr ye. La ne rẽ fãa, yãmb ka lebg n wa mam nengẽ ye. Yaa Sẽn-Ka-Saab n yeele.

⁷Kiuug a tãab sẽn deng tigsgã wakate, mam mong-y-la saaga. Mam kɩtame tɩ saag ni tẽng a yembre, n bas a yembre. Tẽng a yembr pʋgẽ, mam kɩtame tɩ saag ni zĩig a yembre, n bas a yembre, la war kẽe zĩig ning sẽn ka paam-a saagã,

⁸Tẽms a yiib wall a tãab neb yeebdame, n dabd tẽng a yembr pʋgẽ, n na n bao koom n yũ, la b lebg n waa ne ko-yũudu. La ne rẽ fãa, yãmb ka lebg n wa mam nengẽ ye. Yaa Sẽn-Ka-Saab n yeele.

⁹Mam kɩtame tɩ wãoong ne gãnem sãam y koodã, la m kɩt tɩ zũnzũy sãam y zẽedã ne y reezẽ tɩɩs pʋtã, la y kankamã ne y oliiv tɩɩsã. La ne rẽ fãa, yãmb ka lebg n wa mam nengẽ ye. Yaa Sẽn-Ka-Saab n yeele.

¹⁰Mam kɩtame tɩ bã-loangdg yõk yãmba, wa m sẽn dag n kɩt t'a yõk Ezɩpt nebã. Mam kɩtame tɩ y kom-bɩɩsã pa tãp pʋgẽ, la m kɩt tɩ b rees y wiidã. Mam kɩtame tɩ neb nins sẽn ki yãmb tãb-sikẽ wã yũug zẽk n ta yãmba. La ne rẽ fãa, yãmb ka lebg n wa mam nengẽ ye. Yaa Sẽn-Ka-Saab n yeele.

¹¹Mam sãama yãmba, wa m sẽn dag n sãam Sodom ne Gomoorã, la yãmb yɩɩ wa raoog b sẽn yiis bugmẽ La ne rẽ fãa, yãmb ka lebg n wa mam nengẽ ye. Yaa Sẽn-Ka-Saab n yeele.

¹²Woto yĩnga, Israyɛll nebã, yãmb na n yãnda m sẽn na n sɩbg yãmb to-to! Dẽ wã, segl-y y mens n seg y Wẽnnaamã!

¹³Bala, yaa bãmb n maan tãmsã ne sebgã, la b wilg ninsaal b tagsgo. Bãmb n kɩtd tɩ yibeoog lebg lika. Bãmb tabda tãms nins sẽn yaa lug-lugã zut n kẽnda. Bãmb yʋʋr yaa Zu-soabã sẽn yaa Saasẽ-Pãng-Soabã.