Read SEBR SÕNGO, 1998 A Amoose 5 Bible Online

A Amoose 5 - SEBR SÕNGO, 1998 bible

A Amoose 5

¹Israyɛll nebã, kelg-y sũ-sãang yɩɩll m sẽn yɩɩnd yãmb yĩnga

²Israyɛll sẽn yaa wa pʋg-neerã lʋɩɩme, la a kõn tol n yik ye, A lʋɩ n dɩga a meng tẽn-gãongã zugu, tɩ ned ka be sẽn na n doog-a ye.

³Bala, ad Zu-soab a Wẽnnaam sẽn yete, Israyɛll buudã wɛɛngẽ: Tẽng ning sẽn dag n tʋmd tãb-biis tusr zabrẽ wã ka leb n tar sẽn yɩɩd tãb-biis koabg ye. La tẽng ning sẽn dag n tʋmd tãb-biis koabgã ka leb n tar sẽn yɩɩd tãb-biis piig ye.

⁴Ad Sẽn-Ka-Saab koɛɛg Israyɛll nebã yĩnga: Bao-y maam n paam n vɩɩmde

⁵Da bao-y maam Betɛll ye, la y ra kẽng Gilgall me ye Ra kẽng-y Bɛɛrseba ye. Bala, b na n yõga Gilgall nebã n kẽng yembdo, la Betɛll na n sãama zãnga,

⁶Bao-y Sẽn-Ka-Saab n paam n vɩɩmde, tɩ b ra wa kɩt tɩ bugum dɩ a Zozɛf buudã, n sãam-a zãnga, tɩ Betɛll ned ba a ye ka tõog n kiis-a ye.

⁷Yãmb kaooda bʋʋd kɛga, n mongd bʋʋm dãmb bʋʋm.

⁸Sẽn-Ka-Saab n naan Pelyaad-dãmbã ne Oriyõ-rãmbã[2] Bãmb n kɩtd tɩ lik lebg vẽenem, la b tõe tɩ wĩndg lebg yʋngo. Bãmb n tõe tɩ ko-kãsengã koom zẽk n kuil saasẽ, n lebg n wa tẽn-gãongã zugu: Bãmb yʋʋr yaa Zu-soaba

⁹Bãmb sãamda gãndaoogo, la b sãamd pãng zĩig me.

¹⁰Yãmb kisa sẽn togsd-a sɩd bʋʋd zĩigẽ, la sẽn gomd-a ne pʋ-peelem.

¹¹Yãmb taba naong soab ne y nao, n deeg a ki ne pãnga. Yãmb mee rot ne kug-peesdse, la y ka na n kẽ b pʋsẽ ye. Yãmb sela reezẽ tɩɩs sẽn yaa sõama, la y ka na n yũ b reezẽ rãam ye.

¹²Bala, mam miime tɩ yãmb beegrã looga nugu, la y yel-wẽnã yaa wʋsgo. Yãmb namsda nin-tɩrga, la y reegd kũuni, n mongd naong soab bʋʋm bʋʋd zĩigẽ.

¹³Woto yĩnga, sẽn tar-b yamã sĩndame, wakat a woto sẽn yaa toogã yĩnga.

¹⁴Bas-y wẽng n maan sẽn yaa neere, n paam n vɩɩmde, Woto, Sẽn-Ka-Saab sẽn yaa Saasẽ-Pãng-Soabã na n zĩnda ne yãmba, wa y sẽn tagsdã.

¹⁵Kisg-y wẽng la y nong sẽn yaa neere, la y kao bʋʋd sẽn yaa tɩrg y bʋʋdã zĩisẽ, tɩ daar ninga, Sẽn-Ka-Saab sẽn yaa Saasẽ-Pãng-Soabã na zoe a Zozɛf buudã sẽn ketã nimbãanega.

¹⁶Woto yĩnga, Wẽnnaam Sẽn-Ka-Saab sẽn yaa Saasẽ-Pãng-Soabã yetame: Zĩigã fãa na n yɩɩ wiisgu. Soayã zutu, nebã na n yeelame: Kayto! Kayto! B na n boola neb nins sẽn be pʋʋgẽ, tɩ b wa naag wiisdbã n wiisi, la b bool neb nins sẽn mi-b kʋʋr yãbrã tɩ b wa yãbe.

¹⁷Sẽn-Ka-Saab yetame: Mam sã n wa pɩʋʋg yãmb sʋkã n looge, reezẽ tɩɩs pʋtã fãa pʋs na n yɩɩ wiisgu.

¹⁸Kayto! Neb nins sẽn gũud Sẽn-Ka-Saab daarã na paam toogo! Sẽn-Ka-Saab daarã na n nafa yãmb ne bõe? A ka na n yɩ vẽenem ye, a na n yɩɩ lik bida.

¹⁹Badaar na n yɩɩ wa ned sẽn zoet n na n põs gɩgemd n tɩ seg ãbga, n ta a yir n tik a lalg tɩ waaf kɛ-a.

²⁰Sẽn-Ka-Saab daarã ka na n yɩ vẽenem ye. A na n yɩɩ lik daare. Vẽenem kõn tol n zĩnd badaar ye, Na n yɩɩ lik bida daare.

²¹Mam kisa yãmb tigã, mam ka rat n wʋm yãmb tigindã rãamd ye.

²²Yãmb sã n wa mam nengẽ ne y maand sẽn yõogd bugmã la y bõn-koaadl kũunã, mam ka na n deeg-b ye. Yãmb zems-n-taar maandã ne y rũm-nobdsã, mam ka na n geelg-b ye.

²³Zãag-y maam ne y yɩɩlã sẽn yaa bʋʋrã, Mam ka na n kelg y kʋlã wẽeb ye.

²⁴Kɩt-y tɩ tɩrlem zoe wa ko-bundum, tɩ pʋ-peelmã yɩ wa kʋɩlg koom sẽn ka sɛt ye.

²⁵Israyɛll nebã, yãmb sẽn zĩnd we-raoogã pʋg yʋʋm pis-naasã, yãmb maana maand la y wa ne kũun n kõ maam sɩda?

²⁶La yãmb yaool n tʋkda a Sikut sẽn yaa y rĩmã ne a Kiyun sẽn yaa y Wẽn-naandgã ãdgã.

²⁷Woto yĩnga, mam na n yõga yãmb n kẽes yembdo, tẽng zãrem sẽn yɩɩd Damaase. Soab ning yʋʋr sẽn yaa Zu-soabã sẽn yaa Saasẽ-Pãng-Soabã n yeta.