Read SEBR SÕNGO, 1998 A Amoose 7 Bible Online

A Amoose 7 - SEBR SÕNGO, 1998 bible

A Amoose 7

¹Ad bũmb ning Zu-soab a Wẽnnaam sẽn wilg maam vẽnegr pʋgẽ: Daar a yembre, moodã sẽn wa n leb n sɩngd yiibã wakate, sʋy n dag n wekde. Rag n yaa rĩmã bɩle tigsg loogr zugẽ.

²B sẽn wa n dɩt tẽngã moodã zãnga wakate, mam yeelame: Zu-soab a Wẽnnaam, m yõkd-y-la sɛɛga, tɩ y kõ y nebã sugri! A Zakoob yagensã na n maana wãn n põse? Bãmb sõorã ka waoog ye.

³Dẽ, Sẽn-Ka-Saab teka yam, n yeel tɩ yell a woto ka na n zĩnd ye.

⁴Ad bũmb a to Zu-soab a Wẽnnaam sẽn leb n wilg maam: Zu-soab a Wẽnnaam rag n kaooda bʋʋdã ne bugum, la bugmã rag n dɩta ko-kãsengã sẽn be tẽn-gãongã tẽngrã ne pʋtã.

⁵Mam yeelame: Zu-soab a Wẽnnaam, m kot-y lame tɩ y bas woto! A Zakoob yagensã na n maana wãn n põse? Bãmb ka pãng ye.

⁶Dẽ, Wẽnnaam Sẽn-Ka-Saab teka yam, n yeel tɩ yell a woto me ka na n zĩnd ye.

⁷Dẽ poore, ad bũmb a to Zu-soabã sẽn leb n wilg maam: B rag n yasa namd lalg zugu, n zãad makdga.

⁸Zu-soabã soka maam yaa: ‹Amoose, fo nee bõe?› La mam yeelame tɩ m nee makdga. La Sẽn-Ka-Saab yeelame yaa: Mam makda m nebã ne makdga, la m ka na n leb n kõ-b sugr yɛs ye.

⁹A Izak maoong kʋʋb zĩisã na n sãamame, Israyɛll pʋʋsg zĩisã na n lebga raboodo. La m na n sãama a Zeroboaam buudã ne zabr sʋʋga.

¹⁰A Amatsɩya sẽn yaa Betɛll maan-kʋʋr kãsmã tʋmame tɩ b tɩ yeel Israyɛll dĩm a Zeroboaam, t'a Amoos baood n dat n sãama yãmb Israyɛll buudã sʋka. Tẽngã neb yam yii ne a goamã.

¹¹Ad a Amoos sẽn yeele: A Zeroboaam na n paa tãpẽ, La b na n yõga Israyɛll nebã n kẽes yembdo, n zãag-b ne b tẽngã.

¹²A Amatsɩya yeela a Amoos yaa: «Bãngda, zoe n kẽng n tɩ soond Zʋʋda tẽnga, n togs f pĩnd-n-bãngr goamã beenẽ n paamd f noor dɩɩbo,

¹³la f ra togs pĩnd-n-bãngr goam Betɛll kaanẽ ye. Bala, yaa zĩig rĩmã sẽn kẽnd n waoogd Wẽnnaam, la a leb n yaa soolmã zĩ-sõngo.»

¹⁴La a Amoos leoka a Amatsɩya yaa: «Mam ka no-rɛɛsa, m leb n ka no-rɛɛs biig me ye. Mam yaa rũm-gʋʋnda, la m senda kankamse.

¹⁵Yaa Sẽn-Ka-Saab n yãk maam m sẽn wa n gũud m dũmsã wakate, n yeel maam yaa: ‹Kẽng Israyɛll sẽn yaa mam nebã nengẽ n tɩ yɩ m no-rɛɛsa.

¹⁶Moasã, foom a Amatsɩya sẽn yet maam tɩ m da togs Wẽnnaam sẽn yeel bũmb ning Israyɛll nebã wɛɛngẽ, ne a Izak buudã wɛɛngẽ wã, kelg Zu-soabã koɛɛga.› »

¹⁷Bõn-kãng yĩnga, ad Zu-soabã sẽn yeta: ‹Fo pagã na n lebga pʋg-yoodr tẽngã pʋgẽ, fo kom-dibli wã ne f kom-pugli wã na n paa tãpẽ, b na n deesa fo zĩisã n pʋɩ n kõ neb a taaba, fo na n tɩ kii tẽn-zẽnga, la b na n yõga Israyɛll nebã n tɩ kẽes yembdo, n zãag-b ne b tẽngã.›