Read SEBR SÕNGO, 1998 A Abdyaase 1 Bible Online

A Abdyaase 1 - SEBR SÕNGO, 1998 bible

A Abdyaase 1

¹Vẽnegr a Abdyaas sẽn paame. Ad Zu-soab a Sẽn-Ka-Saab sẽn yet Edom soolmã wɛɛngẽ: «Tõnd wʋma koɛɛg Sẽn-Ka-Saab nengẽ, la b tʋma ned bu-zẽmsã nengẽ ne koɛɛga.» Koɛɛgã yetame: «Yik-y-yã! D yik n zab ne Edom soolmã!» D zab ne-a!

²Ade, mam na n kɩtame tɩ f lebg bilf bu-zẽmsã fãa sʋka, la nebã na n paooga foom wʋsgo.

³Fo tɩtaamã kẽes-f-la moogo, bala, fo bee pĩisã bogdẽ, fo tilga f rotã tãms zutu, la f yetẽ: «Ãnda n tõe n sik maam?»

⁴Baa fo sã n yɩk n kuil yĩngr wa pa-nand-tugri, baa fo tɩʋ f tʋkã ãdsã sʋka, mam na n sika foom be. Yaa maam a Sẽn-Ka-Saab n yeele!

⁵Wagda bɩ fãadb sã n wa fo nengẽ ne yʋngo, bãmb ka na n wã foom sɩda? Ka b sẽn tõe n wʋk bal la b na n wʋke? Reezẽ-woabdb sã n wa fo reezẽ pʋʋgẽ, b na n basa bũmb tɩ ka reezẽ sẽn na n yiisi?

⁶B vɛɛsa a Ezayu yagensã! B zũndga yẽnda arzegsã!

⁷B na n diga foom n yiis f soolmẽ wã: Bala, sẽn maan-b kaool ne foomã zãmbda foom, fo zo-rãmbã n so foom, sẽn naagd-b foom n dɩtẽ wã tũnugda beenẽ n bẽt foom. Bãmb yeta fo wɛɛngẽ: «A ka leb n tar yam ye.»

⁸Maam a Sẽn-Ka-Saab yetame: «Badaare, mam na n menesa Edom soolem yam dãmbã, mam na n menes a Ezayu[1] soolem ning sẽn be tãms sʋkã bãngdbã.

⁹Teman tẽnga, b na n kẽesa fo gãndaadã rabeem, sẽn na yɩl n kʋ neb nins sẽn be a Ezayu soolem ning sẽn be tãms sʋkã, n menes-b fãa!

¹⁰Wẽng ning fo sẽn maan fo ba-biig a Zakoob yagensã yĩnga, fo na n paama yãnde, la b na n menes-f-la wakat sẽn kõn sa yĩnga.

¹¹Daar ning bu-zẽmsã sẽn wa n wʋkd bũmb nins sẽn dag n kõt Zeruzalɛm pãngã n loogdẽ, daar ning sãambã sẽn wa n tũ Zeruzalɛm tẽngã noy n kẽ n maan poeer n pʋɩ-a, tɩ fo sĩnd n getẽ wã, fo me yaa wa bãmb sʋkã ned a yembre.

¹²Da maan sũ-noog f ba-biigã yel-pakr daar ye. Da maan sũ-noog a toogã daar ye. Da kɩdem Zʋʋda nebã sãoong daar ye. Da gom n paoog f ba-biigã b yel-pakrã daar ye.

¹³Da kẽ mam nebã tẽng pʋg b sãoongã daar ye. Bɩ fo me ra yãnd f saam-biisã toog b sãoongã daar n maan sũ-noog ye. La b sãoongã daare, bɩ f ra sɩɩs bũmb ning sẽn dag n kõt-b pãngã ye.

¹⁴Da yals so-tiisẽ n kʋ sẽn zoet-b n na n põsã ye! Da yõg neb nins sẽn põs-bã n ning b bɛɛbã nugẽ toogã daar ye!»

¹⁵Bala, Sẽn-Ka-Saab daarã kolgda bu-zẽmsã fãa yĩnga. B na n maana foom wa fo sẽn maanã, b na n dola foom f tʋʋmã.

¹⁶Edom tẽnga, bãng tɩ fo sẽn yũ mam sũ-puugr bõn-yũudlã m tãn-sõngã zug to-to wã, bu-zẽmsã me na n yũ-a-la a woto wakat fãa. Bãmb na n yũ-a lame, b na n gag-a lame, la na n yɩɩ wa bãmb ka tol n zĩnd ye.

¹⁷Neb n na n põs n zĩnd Sɩyõ tãngã zugu. Sɩyõ na n leb n lebga zĩ-sõngo, la a Zakoob buudã na n leb n deega b sẽn so wã.

¹⁸A Zakoob buudã na n lebga wa bugum, la a Zozɛf buudã na n lebga wa bug-witim, t'a Ezayu buudã lebg wa moodo, tɩ b rɩ-a n sãam-a zãnga. A Ezayu buudã ned ba a yembr ka na n põs ye. Yaa maam a Sẽn-Ka-Saab n yeele!

¹⁹Negɛɛv nebã na n sooga Ezayu soolem ning sẽn be tãms sʋkã, la sẽn be-b kunkub sʋkã na n sooga Filistẽ-dãmbã tẽnga. Bãmb na n sooga Efrayiim ne Samaari tẽngã. La Benzame yagensã na n sooga Galaade.

²⁰Israyɛll tãb-biis nins b sẽn dag n yõg n kẽng tẽn-zẽmsã, na n sooga Kana nebã tẽngã, hal n tãag Sarɛpta, la Zeruzalɛm neb nins b sẽn dag n yõg tɩ b be Sefaraadã na n sooga Negɛɛv tẽmsã.

²¹Fãagdb na n dʋʋ Sɩyõ tãngã, n kao a Ezayu soolem ning sẽn be tãms sʋkã neb bʋʋdo. La Sẽn-Ka-Saab n na n dɩ naam.