Read SEBR SÕNGO, 1998 Sõdbo 11 Bible Online

Sõdbo 11 - SEBR SÕNGO, 1998 bible

Sõdbo 11

¹Daar a yembre, Israyɛll nebã yẽgma wʋsg ne Sẽn-Ka-Saabo. La Sẽn-Ka-Saab sẽn wʋm bõn-kãnga, b sũurã puuga wʋsgo, tɩ b kɩt tɩ bugum sig n dɩ sik zĩigã kɩrengã.

²Dẽ, nebã kelem n kosa a Moyiis t'a sõng-ba. La a Moyiis pʋʋsa Sẽn-Ka-Saab bãmb yĩnga, la bugmã kiime.

³La b pʋda zĩ-kãng yʋʋr tɩ Tabeera, sẽn dat n togs tɩ «bugum». Bala, yaa beenẽ la Sẽn-Ka-Saab kɩt tɩ bugum dɩ bãmb sik zĩigã kɩrenga.

⁴Daar a to, nin-sãams buud toor-toorã sẽn da be Israyɛll nebã sʋkã yikame tɩ velem tar-ba. La Israyɛll nebã me leb n sɩnga yẽgeng n yetẽ: «Tõnd na n maana a wãn n paam nemd ka n wãbe?»

⁵Tõnd ket n tẽrame tɩ Ezɩpt tẽngã, tõnd dag n dɩta d sẽn date: kʋmba, yoaga, niiri, gãbdo, la albasle.

⁶La tõnd sẽn be ka wã, tõnd tara faagr bala. Sã n ka mandã, d ka tar rɩɩb a to ye.

⁷Mandã rag n yaa pɛɛlg wa baninga, n wẽnd tɩɩg sũm.

⁸Yʋng sã n ta, mandã naagda meenemã n dʋʋgd sik zĩigẽ wã, la yibeoogo, nebã yit n saagdame n wʋkd-a. Bãmb sã n wʋk-a, b werd-a-la neerẽ, wall b to-a teoogẽ. Rẽ poore, b ningd-a-la rʋkẽ n kɩɩme, ka rẽ bɩ b maan-a maasa, t'a noosmã yaa wa bur-maasa.

¹⁰A Moyiis wʋma Israyɛll nebã fãa sẽn yi n yals b fu-rotã noy roog-roogo, n yẽgemdẽ. Dẽ, Sẽn-Ka-Saab sũurã puuga hal wʋsgo, la bõn-kãng sãama a Moyiis sũurã.

¹¹La a Moyiis yeela Sẽn-Ka-Saab yaa: «Sẽn-Ka-Saabo, yaa bõe tɩ yãmb maand maam woto? Yãmb ka maan maam neer ye! Nin-kãensã sẽn yaa wʋsgã zãab yaa toogo, la yaa bõe tɩ y modg maam n dɩk-m n lʋɩɩs bãmb taoore?

¹²Yaa maam n dog nin-bãmbã la? Bɩ yaa maam n wa ne-b dũni zugu, tɩ yãmb dat tɩ mam zã bãmb wa bi-yaoond sẽn zãad bi-pɛɛlga, n tall-b n ta tẽng ning yãmb sẽn kãab tɩ y na n kõ b yaab-rãmbã.

¹³Mam na n yãnda nemd yɛɛnẽ n kõ nin-bãmbã fãa? Bala, bãmb yãbda ne maam n yetẽ tɩ rẽnd mam kõ bãmb nemd tɩ b wãbe.

¹⁴Maam m yembr ka tõe n zã bãmba fãa ye. Bala, yɩɩda mam pãnga.

¹⁵Sã n yaa woto la y na n maan maam, bɩ y tolg n kʋ-m tɩ sɛ! Y sã n kʋ-ma, y maan-m-la neere. Woto, mam ka na n yãnd toog ning sẽn na n paam maamã ye.»

¹⁶Sẽn-Ka-Saab yeela a Moyiis yaa: «Bɩ f yãk neb pis-yopoe Israyɛll kãsem-dãmbã sẽn yaa nanambsã sʋka, n tall-b n wa kɩt tɩ b yals mam taoor ne foom sɛk roogã noore.

¹⁷Mam na n siga beenẽ n gom ne foom. La mam na n yãka Sɩɩg ning fo sẽn tarã bilfu, n kõ bãmba, tɩ b tõe n sõng foom n zã nebã. Dẽ, fo ka na n leb n yɩ f yembr ye.

¹⁸Dẽ yĩngã, bɩ f yeel Israyɛll nebã yaa: yɩlg-y y mens tɩ beoogo, y na n paama nemd n wãbe. Bala, yãmb yẽgmame n yeel tɩ y na n maana a wãn n paam nemd n wãbe, la y yeel tɩ yãmb sẽn dag n be Ezɩpt tẽngã, bũmb da ka paoogd yãmb ye.» Dẽ, Sẽn-Ka-Saab wʋmame, la b yeelame: «Ka nemd la yãmb dat la? Y na paam nemd n wãbe.

¹⁹La ka daar a ye bɩ a yiib bal la yãmb na n paam nemdã n wãb ye. Leb n ka rasem a nu, bɩ rasem piiga, wall rasem pisi tɛk bal ye.

²⁰Yãmb na n wãba nemdã kiuug tõre. Y na n wãb-a lame t'ɩ loog-yã, hal n wa yit y yõ-bogdẽ wã, tɩ y yamã yi-a. Bala yãmb basa Sẽn-Ka-Saab sẽn be ne yãmbã, n yẽgem n yeel tɩ maana a wãn tɩ b yiis yãmb Ezɩpt tẽngã.»

²¹A Moyiis leoka Sẽn-Ka-Saab yaa: «Nebã sẽn be ne maam n kẽndã sõor taa neb tus kobs-yoobe. Yãmb tagsdame tɩ y na n tõog n yãnda nemd n kõ-b tɩ b wãb kiuug tõre!

²²Baa tõnd sã n kʋ d piisã, ne d bʋʋsã, la d niigã fãa n kõ-ba, ka tõe n sek-b ye. La baa tõnd sã n dag n tõe n yõg zĩmã fãa sẽn be ko-kãsengã pʋgẽ wã, baoosgo, yõwã ka tõe n sek ye.»

²³Sẽn-Ka-Saab leoka a Moyiis yaa: «Dẽ yĩngã, mam ka tar pãng tɩ sek sɩda? Ade, moasã la fo na n yãnd gomd ning mam sẽn yeel foomã sã n na n paama pidsgu, wall a sã n ka na n paam pidsgu.»

²⁴Dẽ, a Moyiis yiime n togs nebã Sẽn-Ka-Saab sẽn yeel bũmb ningã. Rẽ zugẽ, yẽnda tigma Israyɛll kãsem-dãmb pis-yopoe wã n kɩt tɩ b yals n gũbg sɛk roogã.

²⁵La Sẽn-Ka-Saab siga sawad-taokã pʋgẽ, n gom ne a Moyiisi. La bãmb yãka Sɩɩg ning sẽn da be ne a Moyiisã bilfu, n kõ kãsem-dãmb pis-yopoe wã. La wakat ninga Sɩɩgã sẽn sig bãmb zutã, b sɩngame n gomd pĩnd-n-bãngr goamã, la b ka leb n gom a buud nindaar ye.

²⁶Kãsem-dãmb pis-yopoe wã sʋk neb a yiib n dag n pa sik zĩigẽ wã, yaa a Ɛldaade, ne a Medaade. La bãmb da paa sik zĩigẽ wã, n ka yi n tũ n kẽng sɛk roogẽ wã ye. La ne rẽ fãa, Sɩɩgã siga bãmb zutu, n kɩt tɩ b gom pĩnd-n-bãngr goam sik zĩigẽ wã.

²⁷La bi-bɩɩg a ye n zoe n tɩ togs a Moyiis t'a Ɛldaad ne a Medaad bee sik zĩigẽ wã n gomd pĩnd-n-bãngr goamã.

²⁸La a Nun biig a Zozoe sẽn yaa a Moyiis sõangd hal a yãadem wakatã yeela a Moyiis yaa: «M zu-soaba, kɩt-y tɩ b sĩndi.»

²⁹A Moyiis leoka a Zozoe yaa: «Fo maanda sũ-kiir mam yĩng la? Baa Sẽn-Ka-Saab sã n dag n pʋdg b Sɩɩgã Israyɛll nebã fãa zutu, n kɩt tɩ b lebg no-rɛɛsdba, yõwã ka yell ye!»

³⁰Rẽ zugẽ, a Moyiis ne kãsem-dãmb pis-yopoe wã lebg n leba sik zĩigẽ wã.

³¹Sẽn-Ka-Saab kɩtame tɩ sobg yik ko-kãsengẽ wã. La sebgã fugame n peng kodens tɩ b wa rʋʋg sik zĩigẽ wã. Kodensã rag n gũbga sik zĩigã. B yɛdg n taa daar ye kẽnde, la b samame n kolg kãntɩɩg a yiibu.

³²La Israyɛll nebã sõsa ne kodensã wʋkr badaar wĩntoog ne a yʋngã tõre, la a vẽkembeoogo. Neb nins sẽn ka wʋk-b wʋsg yaa pet piiga, la b yɛdg-b lame n gilg sik zĩigã.

³³La Israyɛll nebã sẽn wa n sɩng nemdã wãbr bala, Sẽn-Ka-Saab sũurã puuga ne bãmba, la b sɩbga bãmb ne to-kãsenga.

³⁴Dẽ, b pʋda zĩ-kãng yʋʋr tɩ Kibrot-Taava, sẽn dat n togs tɩ «veles yaado.» Bala yaa beenẽ la b mum Israyɛll neb nins velmã sẽn yõkã.

³⁵Dẽ poore, Israyɛll nebã yii Kibrot-Taava n kẽng Aserote, la yaa beenẽ la bãmb tɩ ti fu-rotã.