Read SEBR SÕNGO, 1998 Sõdbo 12 Bible Online

Sõdbo 12 - SEBR SÕNGO, 1998 bible

Sõdbo 12

¹A Moyiis da rɩka Kuus tẽng bi-pugl n maan a paga, la a Aarõ ne a Miryam wɩda yẽnda yi-kãadem-kãng yĩnga.

²Bãmb yeelame yaa: «Ka a Moyiis a ye bal la Sẽn-Ka-Saab gom ne ye. B goma ne tõnd me» La Sẽn-Ka-Saab wʋma a Aarõ ne Miryam goamã.

³La a Moyiis yaool n dag n yaa sik-m-meng soab hal wʋsgo, n yɩɩd ninsaalbã fãa sẽn be dũniyã zugã.

⁴La tao-tao bala, Sẽn-Ka-Saab yeela a Moyiis ne a Aarõ la a Miryam yaa: «Bɩ yãmb y tãabã fãa yik n wa sɛk roogẽ wã.» La bãmb yikame n kẽnge.

⁵Dẽ, Sẽn-Ka-Saab siga sawad-taokã pʋgẽ n yals sɛk roogã noore. La bãmb boola a Aarõ ne a Miryam. La bãmb b yiibã kolgame.

⁶La Sẽn-Ka-Saab yeelame yaa: «Kelg-y bũmb ning mam sẽn na n yeel yãmbã neere. No-rɛɛs sã n be yãmb sʋkã, maam a Sẽn-Ka-Saab vẽnegda m mengã ne a soab zãmsd pʋgẽ.

⁷La sã n yaa ne mam tʋmtʋmd a Moyiis nengẽ wã, yaa toore. Bala, yẽnda maanda sɩd mam nebã yell gesg pʋgẽ.

⁸Mam gomda ne yẽnda neng ne nenga. Mam ka solgd m meng n gom ne yẽnda ye. La yaa bõe tɩ yãmb ka zoe rabeem tɩ wɩd mam tʋmtʋmd a Moyiisi?»

⁹Sẽn-Ka-Saab sũurã puugame tɩ b looge.

¹⁰Sawadgã sẽn wa n zẽk n bas sɛk roogã, b mikame t'a Miryam yĩn-gãongã tẽgsa pɛɛla, n yaa wa lampalga. Yaa yĩn-gãong bãaga. La Aarõ sẽn wẽnemd n ges a Miryam, a mikame tɩ yaa wãood n tar-a.

¹¹Dẽ, a Aarõ yeela a Moyiis yaa: «M zu-soaba, y sugri! Tõnd beegame, la d kot-y lame tɩ y ra sɩbg tõnd d kongrã yĩng ye.

¹²Bɩ a Miryam yĩngã ra fiu wa bi-kɩɩng yĩng sẽn fiuud to-to a rogem wakatã ye.»

¹³Dẽ, a Moyiis pʋʋsa Sẽn-Ka-Saab n yeel yaa: «Mam Wẽnnaam, mam kot-y lame tɩ y maag a Miryam!»

¹⁴La Sẽn-Ka-Saab yeel a Moyiis yaa: «Dẽ yĩnga, a Miryam ba wã sã n dag n tʋbs a nengã kolkoodo, yẽnda rag n kõn zĩnd ne yãnd rasem a yopoe sɩda? Dẽ wã, bɩ b yiis a Miryam sik zĩigẽ wã, t'a maan dasem a yopoe, n yaool n lebg n wa.»

¹⁵Dẽ, b yiisa a Miryam sik zĩigẽ wã t'a tɩ maan rasem a yopoe. La Israyɛll nebã kell n paa b sik zĩigẽ wã hal t'a Miryam lebg n wa.

¹⁶Dẽ poore, Israyɛll nebã yii Hatserot n kẽng n tɩ tilg b fu-rotã Paarã we-raoogẽ wã.