Read SEBR SÕNGO, 1998 Sõdbo 13 Bible Online

Sõdbo 13 - SEBR SÕNGO, 1998 bible

Sõdbo 13

¹Sẽn-Ka-Saab yeela a Moyiis yaa:

²«Tʋm neb tɩ b tɩ ges Kana tẽngã mam sẽn na n kõ Israyɛll nebã. La bɩ b yãk Israyɛll buud fãa pʋgẽ nanambsã sʋk nin-yɛnga, n kɩt tɩ b kẽnge.»

³Dẽ, a Moyiis maana wa Sẽn-Ka-Saab sẽn yeelã, n tʋm neb tɩ b yi Paarã weoogã n na n kẽnge, la nin-bãmb fãa rag n yaa Israyɛll buudã nanambse.

⁴Ad neb nins b sẽn tʋmã yʋy: Rubɛn buudã pʋgẽ, yaa a Zakʋʋr biig a Samuwa.

⁵Sɩmyõ buudã pʋgẽ, yaa a Hori biig a Safate.

⁶Zʋʋda buudã pʋgẽ, yaa a Yefune biig a Kalɛɛbe.

⁷Isakaar buudã pʋgẽ, yaa a Zozɛf biig a Yigalle.

⁸Efrayiim buudã pʋgẽ, yaa a Nun biig a Ooze.

⁹Benzame buudã pʋgẽ, yaa a Rafu biig a Palti.

¹⁰Zabulõ buudã pʋgẽ, yaa a Sodi biig a Gadiyɛlle.

¹¹A Zozɛf biig a Manaase roogã pʋgẽ, yaa a Susi biig a Gadi

¹²Dan buudã pʋgẽ, yaa a Gemali biig a Amiyɛlle.

¹³Asɛɛr buudã pʋgẽ, yaa a Mikayɛll biig a Setuure.

¹⁴Neftali buudã pʋgẽ, yaa a Vofsi biig a Nabi.

¹⁵Gaad buudã pʋgẽ, yaa a Maki biig a Guwɛlle.

¹⁶A Moyiis sẽn tʋm neb nins tɩ b tɩ ges Kana tẽngã, yʋy yɩɩ woto. La a Moyiis pʋda a Nun biig a Ooze yʋʋr t'a Zozoe.

¹⁷A Moyiis sẽn wa n na n tʋm bãmb tɩ b tɩ ges Kana tẽngã, a yeel-b lame yaa: «Bɩ y yi Negɛɛv sẽnẽ, n tɩ rʋ tãmsã n paam n kẽ Kana.

¹⁸La y ges tẽngã sẽn yaa to-to. Ges-y neb nins sẽn be tẽngẽ wã sã n tara pãnga, bɩ b ka tare. La y ges b sõorã sã n waoogame bɩ ka waooge.

¹⁹La y ges tẽng ning pʋg b sẽn be wã sã n yaa sõama, bɩ a ka sõama. La y ges b tẽmsã sã n tara lals sẽn gũbgi, bɩ b ka tare.

²⁰La y ges tẽngã sã n sakda bɩle bɩ a ka sakde. La y ges tɩɩs sã n bee be bɩ ka be. Paam-y raoodo, n kẽng n tɩ tall tẽngã tɩɩs biis n wa.» La rẽ wakat tɩ reezẽ rag n sɩngda moogre.

²¹B sẽn tʋm-b rãmbã kẽngame n tɩ ges tẽngã, sẽn sɩng ne Sĩn weoogã, hal n tɩ tãag Rehoob sẽn be Lebo-Hamat tẽngã noorã.

²²Bãmb kẽname n tɩ kẽ Negɛɛv soolmã, n kolg Ebrõ tẽngã. La yaa Ahima, ne Sesayi, la a Talmayi buudã sẽn yaa a Anak yagensã n dag n be beenẽ. Ebrõ tẽngã meeb tɩ yʋʋm-yopoɛɛlẽ, la b yaool n na n me Sowan tẽngã sẽn be Ezɩptã soolmẽ wã.

²³Dẽ zugẽ, bãmb kẽnga Ɛskoll ko-soogẽ wã, la bãmb kɛɛga reezẽ tɩɩg will ne reezẽ-gĩnd a ye, n naag ne tɩ-biis a taab sẽn boond tɩ gernaade, ne kankama, n yagl ra-paads zut tɩ neb a yiib tʋk n palg b bãgdo.

²⁴La b pʋda zĩ-kãng yʋʋr tɩ Ɛskoll ko-soogo, sẽn dat n togs tɩ ‹reezẽ-gĩnd ko-soogo› Israyɛll nebã sẽn yãk reezẽ-gĩnd beenẽ wã yĩnga.

²⁵La rasem pis-naas zugẽ, neb nins b sẽn tʋm tɩ b tɩ ges Kana tẽngã lebg n waame.

²⁶La bãmb lebg n leba a Moyiis ne a Aarõ nengẽ, la Israyɛll nebã fãa sẽn be Kadɛɛsã Paarã weoogã pʋgẽ wã nengẽ. Dẽ, bãmb togsa a Moyiis bũmb ning fãa bãmb sẽn yãndã, la b wilga bãmb tẽngã tɩɩs biisi.

²⁷Ad koees nins bãmb sẽn togs a Moyiisã: «Yãmb sẽn tʋm tõnd tɩ d kẽng tẽng ningã, tõnd kẽngame. La tẽngã sɩd pida ne sɩɩd la bĩisim. Dẽ, tẽngã tɩɩs biis la woto.

²⁸La yell ning sẽn be, yaa tɩ tẽn-kãng nebã tara pãnga, la b tara tẽm-bɛd b sẽn me lals n gũbgi. La tõnd tol n yãnda nin-wobg a Anak yagensã beenẽ.

²⁹La Amalɛk nebã bee Negɛɛv tẽngã, tɩ Hɛt-dãmbã ne Zebuus-rãmbã, la Amoor-dãmbã be tãmsẽ wã. La Kana-rãmbã n be ko-kãsengã, ne Zʋrdẽ kʋɩlgã noore.»

³⁰Dẽ, a Kalɛɛb kɩtame tɩ neb nins sẽn da yẽgemd ne a Moyiisã sĩndi, la a yeele: «Yik-y tɩ d kẽng n tɩ reeg tẽngã. Tõnd na n tõog-b-lame!»

³¹La a Kalɛɛb tũud-n-taasã yeelame yaa: «Tõnd ka tõe n zab ne nin-bãmbã ye. Bala, b tara pãng n yɩɩd tõndo.»

³²Dẽ, nin-bãmb sɩngame n gom n sãbs tẽng ning bãmb sẽn kẽng n tɩ gesã Israyɛll nebã taoor n yeele: «Tẽng ning tõnd sẽn tɩ gilg n gesã rɩta a nebã, la sẽn paase, neb nins fãa tõnd sẽn yãnd be wã yaa nin-wobdo.

³³La tõnd tol n yãnda nin-wobdã sẽn yaa a Anak yagensã beenẽ, la tõnd sã n yas b sɛɛgẽ, tõnd geta d mensã wa sʋy bala, la bãmb mensã sẽn get tõndã, d sɩd yaa woto me.»