Read SEBR SÕNGO, 1998 Sõdbo 14 Bible Online

Sõdbo 14 - SEBR SÕNGO, 1998 bible

Sõdbo 14

¹Israyɛll nebã sẽn wʋm goam nins b sẽn togsã, bãmb zẽka b koeesã n yãb yʋngã tõr hal tɩ beoogã vẽege.

²Dẽ, bãmb yẽgma ne a Moyiis la a Aarõ n yeel-b yaa: «Tõnd sã n dag n kiẽ Ezɩpt tẽngã, bɩ weoogã pʋg n são.

³Yaa bõe tɩ Sẽn-Ka-Saab talld tõnd n na n kẽes tẽng a woto pʋgẽ? Tõnd na n kii zabrẽ wã, tɩ b wʋk d pagbã ne d kambã. Tõnd sã n lebg n leb Ezɩpt tẽngã n são.»

⁴Dẽ, bãmb goma ne taab n yeele yaa: «Wa-y tɩ d yãk ned t'a yɩ d taoor soaba, tɩ d lebg n leb Ezɩpt tẽngã!»

⁵A Moyiis ne a Aarõ lʋɩ n fõgna b nens tẽng Israyɛll nebã fãa taoore.

⁶A Nun biig a Zozoe, ne a Yefune biig a Kalɛɛb sẽn yaa neb nins sẽn tɩ ges tẽngã sʋk neb a yiibã sũy sãama hal wʋsgo, tɩ b pãrs b futã.

⁷La bãmb yeela nebã yaa: «Tẽng ning tõnd sẽn kẽng n tɩ gesã yaa tẽn-sõng wʋsgo.

⁸Tẽngã tara bĩisim ne sɩɩd wʋsgo. Sẽn-Ka-Saab sã n nong tõndo, bãmb na n talla tõnd n tɩ kẽes tẽn-kãng pʋgẽ, la b na n deega tẽngã n kõ-do.

⁹Bũmb ning sẽn be bala, bɩ y ra kɩɩs Sẽn-Ka-Saab noorã, la y ra zoe tẽn-kãngã nebã ye. Tõnd na n tõog-b lame. Bala, bãmb wẽnnaam-dãmbã bas-b lame. La Sẽn-Ka-Saab bee ne tõndo. Dẽ wã, bɩ y ra zoe bãmb ye.»

¹⁰La nebã fãa yeelame tɩ b lob bãmb ne kug n kʋ. La wakat-kãng bala, Sẽn-Ka-Saab ziirã puka sɛk roogã zug nebã fãa taoore.

¹¹Dẽ, Sẽn-Ka-Saab yeela a Moyiis yaa: «Nin-bãmbã na n kell n kɩɩsa maam hal tɩ ta dabʋre? Baa ne bõn-bãn-kãsems nins mam sẽn maan bãmb sʋkã, bãmb ket n ka tẽed maam ye.

¹²Mam na n sɩbg-b-la ne bã-longdem n kɩt tɩ b sãam zãnga. Dẽ poore, mam na n kɩtame tɩ f rog buud sẽn yaa wʋsgo, n tar pãng n yɩɩd Israyɛll nebã.»

¹³La a Moyiis leoka Sẽn-Ka-Saab yaa: «Ezɩpt nebã bãngame tɩ yãmb yiisa y nebã bãmb soolmẽ wã ne y pãn-kãsengã.

¹⁴La bãmb dɩka bõn-kãng n togs tẽn-kãngã nebã, tɩ bãmb miẽ tɩ yãmb a Sẽn-Ka-Saab bee y nebã sʋka. La yãmb pukda y meng ne y nebã vẽeneg-vẽenega. La b wʋmame me tɩ yãmb gũuda y nebã, la y lʋɩta bãmb taoor n kẽnda. Wĩndga, yaa sawad-taok pʋg la y be. La yʋngo, y bee bug-witim pʋgẽ.

¹⁵La moasã, yãmb sã n kʋ y nebã wakat a ye pʋgẽ, buud a taabã sẽn wʋm tɩ b gomd yãmb tʋʋm-kãsẽmsã yellã na n yeelame yaa:

¹⁶Sẽn-Ka-Saab ka tõog n na n tall b nebã n tɩ kẽes tẽng ning bãmb sẽn dag n kãab n yeel tɩ b na n kõo bãmbã pʋgẽ ye. Yaa rẽ n kɩt tɩ b kʋ-b zãng weoogã pʋgẽ.»

¹⁷Dẽ wã yĩnga, mam kot-y lame yaa, Zu-soaba, tɩ y wilg y pãngã, n maan wa yãmb sẽn da yeelã.

¹⁸Yãmb yeelame: «Mam yaa Sẽn-Ka-Saabo, mam yaa sũ-maasem soaba, la maan-neer soaba. Mam kõta yel-wẽn ne kɩɩsg sugri. La mam ka basd yel-wẽnã soab taal ye. Mam sɩbgda yẽnda ne a yagensã hal tɩ ta zamaan a tãabo, wall a naase.

¹⁹Sẽn-Ka-Saabo, yãmb sẽn yaa sõmblem soabã yĩnga, bɩ y kõ y nebã sugri, tɩ bala, hal sẽn sɩng ne daar ning b sẽn yi Ezɩpt tẽngã tɩ ta moasã, yãmb kõt-b-la sugri.»

²⁰Sẽn-Ka-Saab yeela a Moyiis yaa: «Mam kõt-b-la sugr wa fo sẽn kosã.

²¹Sã n yaa tɩ mam vɩɩme, la mam ziirã sã n pida dũniyã gilli, mam wẽendame tɩ nin-bãmbã ba a yembr ka na n kẽ Kana tẽngã pʋg ye. Bala, bãmb yãnda mam ziirã ne tʋʋm-kãsems nins mam sẽn maan Ezɩpt pʋgẽ wã, ne weoogã pʋgã, la b baas n yaool n kell n paooga maam la b kɩɩs maam. Rẽ yĩngã, bãmb ned ba n ye nif ka na n yãnd tẽng ning mam sẽn dag n kãab b yaab-rãmbã ye.

²⁴La mam tʋmtʋmd a Kalɛɛb paama yam toor n sak m noorã. Rẽ wã yĩnga, mam na n kɩtame tɩ yẽnda kẽ tẽng ning a sẽn tɩ gesã pʋgẽ, la m kɩt tɩ tẽn-kãng lebg yẽnda kambã ne a yagensã rẽnda.

²⁵Amalɛk nebã ne Kana nebã na n paa tãn-longẽ wã. La beoogo, bɩ y wẽnemd n lebg n pɩʋʋg weoogã n tees tãnwĩis ko-kãsengã sẽnẽ.»

²⁶Sẽn-Ka-Saab leb n yeela a Moyiis ne a Aarõ yaa:

²⁷«Mam wʋma Israyɛll nebã sẽn yẽgemd ne maamã. La nin-wẽn-kãensã na n yẽgma ne maam hal tɩ ta dabʋre?

²⁸Ade, kẽng-y n tɩ yeel-b tɩ maam a Sẽn-Ka-Saab sẽn vɩ wã meng wẽendame n yetẽ: Mam na n maana bãmb wa sẽn zems b no-goamã.

²⁹Neb nins fãa sẽn be yãmb sʋkã n tar yʋʋm pisi la sẽn yɩɩd dẽ tɩ b sõd-bã na n kii we-raoogã pʋgẽ. Bala, bãmb yẽgma ne maam.

³⁰Mam wẽendame tɩ yãmb ned ba a yembr ka na n kẽ tẽng ninga mam sẽn da kãab tɩ y na n zĩnda a pʋgẽ wã ye. Yaa a Yefune biig a Kalɛɛb ne a Nun biig a Zozoe bal n na kẽ tẽn-kãng pʋgẽ.

³¹La yãmb kambã yãmb sẽn dag n yeel tɩ b na yɩ y bɛɛbã yembsã, yaa kom-bãmb la mam na n kɩt tɩ b kẽ tẽng ning yãmb sẽn dag n sãbsã pʋgẽ. La bãmb na n bãnga tẽngã.

³²La yãmb mensã na n kii weoogẽ wã.

³³Yãmb kambã na n yeeba weoogã pʋg yʋʋm pis-naase. La yãmb kɩɩsgã sɩbgr na n lʋɩɩ bãmb zutu, hal tɩ yãmb fãa wa sɛ.

³⁴Yãmb dɩka rasem pis-naas n gilg n ges Kana tẽngã. La yãmb kɩɩsgã yĩnga, y na n namsa yʋʋm pis-naase, sẽn dat n togs tɩ daar a yembr yaa yʋʋmde. Woto, yãmb na bãng mam kɩɩsg sẽn wat ne bũmb ninga.

³⁵Maam a Sẽn-Ka-Saab n yet yãmb woto. La mam yeta yãmb vẽenega, tɩ m na n maan-y-la wa m sẽn yeelã. Bala, yãmb yaa nin-wẽns buudu, la y naaga taab n kɩɩs maam. Yãmb fãa na n kii weoogã pʋga, la yãmb ned ba a yembr ka na n põs ye.»

³⁶Dẽ, neb nins a Moyiis sẽn da tʋm tɩ b tɩ ges tẽngã sẽn lebg n wa gom a yell wẽng to-to wã, kɩtame tɩ Israyɛll nebã yẽgem ne a Moyiisi.

³⁷La nin-bãmb sẽn bilg-b tẽngã yellã kii zĩig pʋgẽ. Bala, Sẽn-Ka-Saab wẽe bãmba, b sẽn gom tẽngã yell n yeel tɩ ka tẽn-sõngã yĩnga.

³⁸La nin-bãmb sʋkã, yaa a Zozoe ne a Kalɛɛb bal n ka ki.

³⁹A Moyiis togsa Israyɛll nebã Sẽn-Ka-Saab sẽn yeel yẽnda bũmb ningã, la Israyɛll nebã sũy sãama wʋsg ne bõn-kãnga.

⁴⁰La vẽkembeoog yibeoog pĩnda, bãmb yik n dɩka sor n tees tẽms nins sẽn be tãmsã zutã sẽnẽ. Bãmb dag n kẽndame la b yetẽ: «Sɩd-sɩdã, tõnd beegame, la moasã, tõnd bee sorẽ n dabd zĩig ning Sẽn-Ka-Saab sẽn wilg tõnd tɩ d kẽngã.»

⁴¹Dẽ, a Moyiis soka bãmb yaa: «Yaa bõe la yãmb sẽn maandã? Yaa Sẽn-Ka-Saab noor la yãmb sẽn kɩɩsdã, la y ka na n tõog n maan y sẽn dat n maanã ye.

⁴²Bala, Sẽn-Ka-Saab ka be ne yãmb ye. Dẽ yĩngã, bɩ ra n wa saag n kẽng tɩ y bɛɛbã na n tõog-y lame.

⁴³Amalɛk ne Kana nebã bee taoor n gũud yãmba. La b na n tõoga yãmb n kʋ-y zãng zabrã pʋgẽ. Bala, yãmb wẽnemdame n bas Sẽn-Ka-Saabo. Dẽ wã, Sẽn-Ka-Saab ka na n zĩnd ne yãmb ye.»

⁴⁴La baoosg zãnga, Israyɛll nebã kell n kenga b sũy n na n kẽng n tɩ zab ne tẽms nins sẽn be tãmsã zutã. La a Moyiis kell n paa sik zĩigẽ wã ne Sẽn-Ka-Saab kaoolã koglgã.

⁴⁵La Amalɛk ne Kana nebã yii tãmsã zut n sig n zab ne Israyɛll nebã, n tõog-b n dig n tãag Horma.