Read SEBR SÕNGO, 1998 Sõdbo 15 Bible Online

Sõdbo 15 - SEBR SÕNGO, 1998 bible

Sõdbo 15

¹Sẽn-Ka-Saab yeela a Moyiis t'a yeel Israyɛll nebã yaa: «Yãmb sã n wa tɩ kẽ tẽng ning mam sẽn na n kõ yãmbã pʋgẽ,

³n wa rat n maan maoong n kõ Sẽn-Ka-Saabo, sã n yaa maoong sẽn yõogd bugum, wall yaa zems-n-taar maoongo, ka rẽ bɩ pʋleng pidsg maoongo, wall y yamleoog kũuni, wall tigr daar maoongo, bɩ y yãk y rũm-bɛdã, bɩ y rũm-bãoonegã sʋk n maan maoongã, tɩ yɩ yũ-noog sẽn tat Sẽn-Ka-Saab yam.

⁴Ned sã n dat n maan maoong sẽn yõogd bugum n kõ Sẽn-Ka-Saabo, bɩ a paas zom wamd sẽn nag ne kaam lengr pʋɩ-sʋka, n tall n wa.

⁵La sã n yaa pe-ribl la yẽnda tall n wa n na n maan maoong sẽn yõogd bugmã, wall zems-n-taar maoongã, a tog n naaga ne reezẽ rãam lɩnga.

⁶Sã n yaa pe-raoog maoongo, yẽnda na n paasa zom wam a yiib sẽn nag ne kaam lens a yiibu.

⁷La a paas reezẽ rãam lɩms a yiibu, la bõn-kãng na n yɩɩ yũ-noog sẽn tat maam a Sẽn-Ka-Saab yam.

⁸La sã n yaa lull la b tall n na n maan maoong sẽn yõogd bugum, wall zems-n-taar maoongo, ka rẽ bɩ yamleoog maoongo, wall pʋleng pidsg maoongo,

⁹bɩ b paas zom wam a tã sẽn nag ne kaam lens a tãabo, n naag ne rũngã n tall n wa.

¹⁰La b paas reezẽ rãam lɩms a tãabo, tɩ bõn-kãng yɩ yũ-noog sẽn tat mam yam.

¹¹La wakat fãa, y sẽn na n maan loalg maoongo, bɩ pe-raoog maoongo, wall pe-ribl maoongo, ka rẽ bɩ bʋʋg maoongo, yaa woto la y segd n maane.

¹²Baa rũms nins yãmb sẽn dat n kõ wã sõor sẽn yaa to-to, yãmb tog n paasa kũun nins b sẽn wilgã rũng fãa zugã.

¹³Israyɛll ned ning fãa sẽn dat n maan-a maoong sẽn yõogd bugum sẽn tar yũ-noog mam yĩnga, a soab tog n maana a boto.

¹⁴La sãamb nins sẽn nan wa-b yãmb sʋk tɩ ka kaoosã, wall sãamb nins sẽn sɩng n be-b ne yãmb hal sẽn kaoosã sã n wa rat n maan maoong sẽn yõogd bugum sẽn tar yũ-noog sẽn tat mam yam, bɩ b tũ tõod nins yãmb sẽn tũudã.

¹⁵Tõodã na n yɩɩ bũmb a yembr nebã fãa yĩnga, sã n yaa yãmb sẽn yaa Israyɛll nebã, wall sãamb nins sẽn be-b yãmb sʋkã. La no-tũudg sẽn ka sɛta, yãmb yagensã fãa yĩnga. Sẽn-Ka-Saab taoore, welgr ka be Israyɛll nebã ne sãambã sʋkã ye.

¹⁶Tõodã ne noyã na n yɩɩ bũmb a yembre, yãmb Israyɛll nebã ne sãambã yĩnga.»

¹⁷Sẽn-Ka-Saab yeela a Moyiis

¹⁸t'a yeel Israyɛll nebã yaa: «Yãmb sã n wa tɩ kẽ tẽng ning mam sẽn na n tall yãmb n kẽngã pʋgẽ,

¹⁹n paam tẽngã bɩle n na n dɩ, bɩ y reng n yãk kũun n kõ maam a Sẽn-Ka-Saabo.

²⁰Yãmb na n yãka zom-bãaneg sẽn nan nag paalem, n maan bur-maasr n kõ maam, tɩ bõn-kãng tõe n yɩ dẽenem biis kũuni, yãmb sẽn yãk y zom-nagdmã pʋgẽ, y koodã pãbr zugẽ wã.

²¹Woto, yãmb na n kõo maam dẽenem bur-maasre, y sẽn kɩɩme. Tõ-kãngã na n yɩɩ zamaan woo zamaan sẽn wat yĩnga.»

²²Maam a Sẽn-Ka-Saab sẽn tũnug a Moyiis n kõ yãmb ne y yagensã tõod ninsã, yãmb sã n kɩɩs tõ-bãmb ne yĩdgu, n ka sak-ba, la sã n mikame tɩ nebã ka bãng tɩ yãmb kɩɩsa tõogã ne yĩdgu, bɩ b fãa naag taab n tall lull n wa maan maoong sẽn yõogd bugum n kõ maam a Sẽn-Ka-Saabo, t'a yɩ yũ-noog mam yĩnga. La bɩ b paas zom-bãaaneg ne reezẽ rãam tɩ yɩ kũuni, wa sẽn zems tõogã sẽn yeelã, ne boɛɛg sẽn na n maan maoong yel-wẽnã sugr kũun yĩnga.

²⁵Rẽ poore, bɩ maan-kʋʋdã maan b sugr kosg tʋʋmdã tɩ Israyɛll nebã fãa tõe n paam b yel-wẽnã sugri. Bala, yaa maoong sẽn yõogd bugum ne sugr kũun maoong b sẽn maan n kõ maam a Sẽn-Ka-Saabo, b sẽn kɩɩs tõogã ne yĩdgã yĩnga.

²⁶La Israyɛll nebã fãa ne sãamb nins fãa sẽn be bãmb sʋkã na n paama sugri. Bala, nebã fãa naag n beega ne yĩdgu.

²⁷La sã n mikame tɩ yaa nin-yɛng n beeg ne yĩdgu, a soab tog n waa ne bʋʋg sẽn ta yʋʋmde, n maan maoong yel-wẽnã sugr yĩnga.

²⁸Dẽ poore, maan-kʋʋdã na n yalsa mam taoor n maan b sugr kosg tʋʋmdã bɛɛgdã zugu, t'a tõe n paam a yel-wẽnã sugri.

²⁹La tõ-kãngã na n yɩɩ bũmb a yembr neb nins sẽn na n beeg ne yĩdgã yĩnga, sã n yaa Israyɛll neda, wall sãambã sẽn be bãmb sʋkã.

³⁰La Israyɛll ned wall sãan sã n maan yel-wẽnd ne yamleoogo, a beega maam, la b tog n diga a soabã n yiis Israyɛll nebã sʋka.

³¹Yẽnda soab paooga Sẽn-Ka-Saab goamã, la a kɩɩs bãmb tõodã. Dẽ, bɩ b yiis nin-kãngã soab Israyɛll nebã sʋka, la a yellã be a meng zugu.

³²Daar a yembre, Israyɛll nebã sẽn wa n be we-raoogã pʋgã, bãmb sʋkã neb kẽer n tɩ ling rao a yembr t'a wɩɩsd raad vʋʋsgã daarã.

³³Dẽ, bãmb talla nin-kãng n kẽng a Moyiis ne a Aarõ, la Israyɛll nebã fãa taoore.

³⁴La b baoo zĩig n ning-a, bala, b rag n nan ka wilg b sẽn tog n maan-a bũmb ning ye.

³⁵Dẽ, Sẽn-Ka-Saab yeela a Moyiis yaa: «Nin-kangã soab segda ne kʋʋbo. Dẽ wã, bɩ y tall-a n yiis sik zĩigã pʋgẽ, tɩ Israyɛll nebã fãa lob-a ne kug n kʋ.»

³⁶Dẽ, Israyɛll nebã maana wa Sẽn-Ka-Saab sẽn yeel a Moyiisã. Bãmb talla raoã n yiis sik zĩigã pʋg n tɩ lob-a ne kug t'a ki.

³⁷Sẽn-Ka-Saab yeela a Moyiis

³⁸t'a yeel Israyɛll nebã yaa: «Bɩ yãmb ne y yagensã ning y futã noy zerdo, n bao gĩs-kẽeg haoo n ning zerdã zutu.

³⁹Dẽ, bɩ y ningd fut sẽn tar zerdo, tɩ yãmb sã n wa n ges zerdã, bɩ y tẽeg maam a Sẽn-Ka-Saab tõodã yell n sak-ba. Woto, yãmb kõn tol n leb n maan y sẽn date, n bas tɩ y tagsgã ne y ninã gesgã tus yãmb n kẽes wẽn-naands pʋʋsg pʋg ye.

⁴⁰Dẽ, yãmb na n tẽega mam tõodã fãa yell n sak-ba. Yãmb na n welga toor y Wẽnnaamã yĩnga.

⁴¹Mam yaa Sẽn-Ka-Saab sẽn yaa yãmb Wẽnnaam. Mam yiisa yãmb Ezɩpt tẽngã pʋga, n na n lebg yãmb Wẽnnaam. N-yẽe! Yaa maam n yaa yãmb Wẽnnaam.»