Read SEBR SÕNGO, 1998 Sõdbo 19 Bible Online

Sõdbo 19 - SEBR SÕNGO, 1998 bible

Sõdbo 19

¹Sẽn-Ka-Saab yeela a Moyiis ne Aarõ yaa:

²«Ad tõod nins mam sẽn kõt yãmba: Yeel Israyɛll nebã tɩ b tall nag-zẽeg sẽn ka tar zanga, la sẽn nan ka zɩlg zɩɩbo, n wa kõ-yã.

³La yãmb na n dɩka naafã n kɩs maan-kʋʋd a Eleyazaare. La yẽnda na n tall-a lame n yi sik zĩigã kirẽng n kɩt tɩ b kodg-a yẽnda nifẽ.

⁴Dẽ, maan-kʋʋd a Eleyazaar na n tẽka naafã zɩɩm ne a nug-bila, n tees sɛk roogã noorã n mes naoor a yopoe.

⁵La b na n yõoga naafã ne a gãongã, la a nemdã ne a zɩɩmã n paas a pʋ-teedã maan-kʋʋd a Eleyazaar nifẽ.

⁶Dẽ, maan-kʋʋd a Eleyazaar na n dɩka sɛɛdr raado, la izop ne pe-kõbd b sẽn moneme, n naag b fãa n lob bugmã sẽn dɩt naafã pugẽ.

⁷Dẽ zugẽ, maan-kʋʋdã na n pegsa a futã, la a so koom, n yaool n leb sikã zĩigẽ. La baoosgo, yẽnda na n kell n yɩɩ rẽgd hal n tãag zaabre.

⁸Ned ning sẽn na n yõog-a naafã na n pegsa a futã, la a so koom. La baoosgo, a na n kell n yɩɩ rẽgd hal n tãag zaabre.

⁹La bɩ ned sẽn ka rẽgem a meng wʋk naafã tompeglmã, n yi sikã zĩig kɩreng n tɩ bao zĩig sẽn welg toor n dʋʋg-a be. La b na n bĩng-a-la be tɩ Israyɛll nebã yãkd n maand yɩlgr koom. Woto fãa yaa sẽn na yɩl n paam yel-wẽnã sugri.

¹⁰La ned ning sẽn na n wʋk-a naafã tompeglmã me na n pegsa a futã, la baoosgo, yẽnda na n kell n yɩɩ rẽgd hal n tãag zaabre. Bõn-kãng na n yɩɩ no-tũudg sẽn ka sɛta, Israyɛll nebã ne sãamb nins sẽn be bãmb sʋkã yĩnga.»

¹¹«Ned sã n sɩɩs ninsaal kũum, a na n yɩɩ rẽgd hal tɩ ta rasem a yopoe.

¹²La rasem a tãab daarã ne a rasem a yopoe daarã, yẽnda tog n mesa a meng ne yɩlgr koomã, n lebg yɩlemde. Yẽnda sã n ka yɩlg a meng a rasem a tãab daarã ne rasem a yopoe daarã, yẽnda nan ket n yaa rẽgdo.

¹³Ned sã n sɩɩs ninsaal kũum n yaool n ka yɩlg a menga, yẽnda soab rẽgemda maam a Sẽn-Ka-Saab sɛk zĩigã, la b na yiisa yẽnda Israyɛll buudã sʋka. Bala, b sẽn ka mes yẽnda ne yɩlgr koomã yĩnga, yẽnda ket n yaa rẽgdo.

¹⁴Ad tõod a taab mam sẽn kõt foom: Ned sã n wa ki fu-roog pʋgẽ, neb nins sẽn kẽed-b fu-roogã pʋgẽ, wall sẽn be fu-roogã pʋgẽ wã yaa rẽgd hal tɩ ta rasem a yopoe.

¹⁵La laok sã n be fu-roogã pʋg tɩ b ka lud-a sõama, bũmb ning fãa sẽn be laokã pʋgẽ wã na n lebga rẽgdo.

¹⁶Ned sẽn be weoogẽ sã n kẽn n tɩ lak kũum tɩ yaa ned b sẽn kʋ ne sʋʋga, wall ned sẽn ki a meng yĩnga, yẽnda soab na n yɩɩ rẽgd hal tɩ tãag rasem a yopoe. A na n yɩɩ woto me ne ned sẽn kẽn n tɩ lak ninsaal kõaba, bɩ yaoogo.

¹⁷Sẽn na yɩl n yɩlg nin-kãngã, b na n yãka naafã b sẽn kʋ n yõog yel-wẽnã sugr kosg yĩnga tompeglem, n ning laok pʋgẽ, la b yãk ko-yɩlemd n ningi.

¹⁸La bɩ ned sẽn ka rẽgem a meng rɩk izop wãad n sũk ko-kãng pʋg n mes fu-roog ning kũumã sẽn ki-a pʋgẽ wã, la a mes teed nins fãa la neb nins fãa sẽn da be roogã pʋgẽ wã. Ka rẽ bɩ a mes ned ning sẽn sɩɩs-a ninsaal kõabã, bɩ ninsaal kũumã, wall yaoogã.

¹⁹La rasem a tãab daarã ne rasem a yopoe daarã, ned ning sẽn ka rẽgem a mengã na n yãka yɩlgr koomã, n mes ned ning sẽn dẽgem a mengã. La rasem a yopoe wã daare, yẽnda na n pegsa a futã, la a so koom, la zaabr sã n ta, yẽnda na n lebga yɩlemde.

²⁰La ned sẽn dẽgem sã n ka yɩlg a menga, b na n yiisa yẽnda Israyɛll buudã sʋka, tɩ bala, yẽnda rẽgemda Sẽn-Ka-Saab zĩ-sõngã. Bala, b sẽn ka mes yẽnda ne yɩlgr koomã yĩnga, yẽnda ket n yaa rẽgdo.

²¹Yõwã yaa no-tũudg sẽn ka sɛta, Israyɛll nebã yĩnga. Ned sã n yãk yɩlgr koomã n mes ned sẽn dẽgem a menga, a tog n pegsa a futã, la ned ning sẽn sɩɩs-a ko-kãng na n yɩɩ rẽgd hal tɩ ta zaabre.

²²Ned sã n yaa rẽgdo, a sẽn sɩɩs bũmb ning fãa lebgda rẽgdo, la ned ning sẽn sɩɩs-a nin-kãng me na n lebga rẽgd hal tɩ ta zaabre.»