Read SEBR SÕNGO, 1998 Sõdbo 2 Bible Online

Sõdbo 2 - SEBR SÕNGO, 1998 bible

Sõdbo 2

¹Sẽn-Ka-Saab yeela a Moyiis ne a Aarõ yaa:

²«Israyɛll ned kam fãa tog n ti a fu-roog n yegl a buudã tãb-sikã, n pẽneg a buudã tãb-kaoorã. La bãmb tog n zãaga bilf n ti n gũbg sɛk roogã.»

³Tãb-bi-sul nins sẽn gũbg Zʋʋda tãb-kaoorã tog n zĩnda yaanga. Dẽ, ad buud fãa ne a tãb-biis naaba:

⁴Zʋʋda buudã tãb-biisã naab yaa a Aminadaab biig a Nakõ. Yẽnda tãb-biisã sõor yaa neb tus pis-yopoe la a naas la kobs-yoobe.

⁵La Isakaar buudã tãb-biisã naab yaa a Suwaar biig a Netaneyɛlle.

⁶Yẽnda tãb-biisã sõor yaa neb tus pis-nu la a naas la kobs-naase.

⁷Sẽn pʋgd yaa Zabulõ. Yẽnda tãb-biisã naab yaa a Elõ biig a Elyaabe.

⁸A Zabulõ tãb-biisã sõor yaa neb tus-pis-nu la a yopoe la kobs-naase.

⁹Tãb-bi-sul nins sẽn gũbg Zʋʋda tãb-kaoorã yaa tãb-biis tus koabg la pis-nii la a yoob la kobs-naase. La yaa bãmb n na yɩ pipi n yiki.

¹⁰Nug-goabgã, yaa tãb-bi-sull ning sẽn gũbg Rubɛn tãb-kaoorã n na n ti be. La Rubɛn buudã raop nins b sẽn sõd n yãk tɩ b na n yɩ tãb-biisã, b naab yaa a Sedewʋʋr biig a Elisʋʋre. Rubɛn buudã tãb-biisã sõor yaa neb tus pis-naas la a yoob la kobs-nu. Sɩmyõ buudã tãb-biisã naab yaa a Suurisadayi biig a Selumiyɛlle. Yẽnda tãb-biisã sõor yaa neb tus pis-nu la a wɛ la kobs-tã. Gaad buudã tãb-biisã naab yaa a Rehuwɛll biig a Elyazafe. Yẽnda tãb-biisã sõor yaa neb tus pis-naas la a nu la kobs-yoob la pis-nu.

¹⁶Dẽ, tãb-bi-sul nins sẽn gũbg Rubɛn tãb-kaoorã yaa tãb-biis tus koabg la pis-nu la a ye, la kobs-naas la pis-nu. La yaa bãmb n na n pʋgl pipi sullã.

¹⁷Sẽn pʋgde, yaa Leevi buudã n na n yik ne sɛk roogã n pʋgle. Dẽ, bãmb na n zĩnda sʋka. La sulã fãa me na n yikda pʋgdg-pʋgdg wa bãmb sẽn ti to-to wã, ned kam fãa ne a zĩiga la a tãb-kaoore.

¹⁸Nin-taoorã yaa tãb-bi-sull ning sẽn gũbg a Efrayiim tãb-kaoorã n na n ti be. Efrayiim buudã tãb-biisã naab yaa a Amiwuud biig a Elisama. Yẽnda tãb-biisã sõor yaa neb tus pis-naas la kobs-nu. La Manaase buudã tãb-biisã naab yaa a Pedasʋʋr biig a Gameliyɛlle. Yẽnda tãb-biisã sõor yaa neb tus pis-tã la a yiib la kobs-yi. Benzame buudã tãb-biisã naab yaa a Gidoni biig a Abidãn. Yẽnda tãb-biisã sõor yaa neb tus pis-tã la a nu la kobs-naase.

²⁴Dẽ, tãb-bi-sul nins sẽn gũbg a Efrayiim tãb-kaoorã yaa tãb-biis tus koabg la a nii la koabga. Bãmb n na n yɩ sull a tãabẽ soab n yiki.

²⁵Nug-rɩtgã, yaa tãb-bi-sull ning sẽn gũbg a Dan tãb-kaoorã n na n ti be. Dan buudã tãb-biisã naab yaa a Amisadayi biig a Ayiyezɛɛre. Yẽnda tãb-biisã sõor yaa neb tus pis-yoob la yiib la kobs-yopoe. A Asɛɛr buudã tãb-biisã naab yaa a Okrã biig a Pagiyɛlle. Yẽnda tãb-biisã sõor yaa neb tus pis-naas la a ye la kobs-nu. Neftali buudã tãb-biisã naab yaa a Enan biig a Ayira. Yẽnda tãb-biisã sõor yaa neb tus pis-nu la a tãab la kobs-naase.

³¹Dẽ, tãb-bi-sul nins sẽn gũbg Dan tãb-kaoorã yaa tãb-biis tus koabg la pis-nu la a yopoe la kobs-yoobe. Bãmb n na n yɩ yaoolem n yiki. Sull fãa na n gũbga a tãb-kaoor n kẽnda.

³²Israyɛll nebã fãa b sẽn sõd buud-buudu, la tãb-bi-sull-sullã fãa sõor yɩɩ neb tus kobs-yoob la a tã la kobs-nu la pis-nu.

³³La bãmb maana wa Sẽn-Ka-Saab sẽn dag n yeel a Moyiisã, n ka naag Leevi buudã ne Israyɛll buud a taabã n sõd ye.

³⁴Israyɛll nebã kell maana wa Sẽn-Ka-Saab sẽn dag n wilg a Moyiisã. Tãb-bi-sull fãa dag n tiid n pẽnega a tãb-kaoore, la b yikrã wakate, b yikda buud-buudu, la roog-roogo.