Read SEBR SÕNGO, 1998 Sõdbo 20 Bible Online

Sõdbo 20 - SEBR SÕNGO, 1998 bible

Sõdbo 20

¹Israyɛll nebã fãa taa Sĩn weoogã pʋg pipi kiuugã pʋgẽ, n tɩ zĩnd Kadɛɛse. La yaa beenẽ la a Miryam ki yã, tɩ b mum-a.

²La koom dag n ka be be nebã sẽn na n yũ ye. Dẽ, bãmb tigma taab n na n zab ne a Moyiis ne a Aarõ.

³Bãmb yeela a Moyiis yaa: «Tõnd sã n dag n naagẽ d saam-biisã n ki Sẽn-Ka-Saab taoor n são.

⁴Bõe yĩng tɩ y tall tõnd sẽn yaa Sẽn-Ka-Saab nebã n wa weoogẽ ka, tɩ tõnd ne d rũmsã na n ki?

⁵Bõe yĩng tɩ y yiis tõnd Ezɩpt soolmẽ wã, n tall-d n wa zĩ-yo-kãngã pʋgẽ? Zĩ-kãngã ka zĩig tõnd sẽn tõe n bʋd bũmb ye. Kankams ka be, reezẽ tɩɩs ka be, la tɩɩs sẽn womd biis me ka be, la koom meng ka be n yũud ye.»

⁶Dẽ, a Moyiis ne Aarõ basa nebã n loog n kẽng sɛk roogã noore. La bãmb wõgemdame n fõgen b nensã tẽnga, la Sẽn-Ka-Saab puka b ziirã ne bãmba.

⁷Dẽ, Sẽn-Ka-Saab yeela a Moyiis yaa:

⁸«Dɩk f rasaarã tɩ foom ne f kẽem a Aarõ kẽng n tɩ tigim Israyɛll nebã. La y yals bãmb taoor n gom ne pĩigã yãmb sẽn ne wã, la pĩigã na n pusga koom tɩ y yũ. Fo na n maana woto n kɩt tɩ koom yi pĩigã pʋgẽ, tɩ Israyɛll nebã ne b rũmsã fãa yũ.»

⁹Dẽ, a Moyiis rɩka a rasaarã sẽn da be Sẽn-Ka-Saab sɛk roogẽ wã.

¹⁰A Moyiis ne a Aarõ tigma nebã pĩigã sɛɛgẽ, n yeel bãmb yaa: «Yãmb a tõatbã, kelg-y-yã! Tõnd tõeeme n kɩt tɩ koom pusg n yi pĩ-kãngã zug sɩda?»

¹¹Dẽ, a Moyiis zẽka a rasaarã n wẽ pĩigã naoor a yiibu, la wakat-kãng bala, koom pusga pĩigã zug n yi wʋsgo, tɩ Israyɛll nebã ne b rũmsã yũ.

¹²La Sẽn-Ka-Saab yeela a Moyiis ne Aarõ yaa: «Yãmb sẽn ka maan tẽeb ne maam, n wilg Israyɛll nebã tɩ mam yaa Wẽnnaam sɩd-sɩdã yĩnga, ka leb n yaa yãmb n na n tall Israyɛll nebã n tɩ kẽes tẽng ning mam sẽn kõ-bã pʋgẽ ye.»

¹³Bõn-kãng yĩng kɩtame tɩ b boond ko-kãng tɩ Meriba koom, sẽn dat n togs tɩ ‹zabr koom.› Bala, yaa beenẽ, la Israyɛll nebã zab ne Sẽn-Ka-Saabo, n kɩt tɩ Sẽn-Ka-Saab wilg-b tɩ bãmb la Wẽnnaam sɩd-sɩda.

¹⁴La a Moyiis zĩnda Kadɛɛs n tʋm neb tɩ b kẽng Edom rĩmã nengẽ n tɩ yeel-a yaa: «Ade, fo saam-biisã sẽn yaa Israyɛll nebã yeelame yaa: Yãmb miime tɩ tõnd paama tood buud toor-toore.

¹⁵Hal pĩnda, tõnd yaab-rãmbã rag n kẽng n tɩ kẽe Ezɩpte, n zĩnd be n kaoos wʋsgo, la Ezɩpt nebã namsa tõnd ne d yaab-rãmbã.

¹⁶Tõnd kelmame n bool Sẽn-Ka-Saabo, la bãmb wʋma tõnd kelemsã n tʋm malɛɛk t'a wa yiis tõnd Ezɩpt tẽngã. Moasã, tõnd bee Kadɛɛse, tẽng ning sẽn yaa toadg ne fo tẽngã.

¹⁷Bɩ y kõ-d sor tɩ d pɩʋʋg y tẽngã n looge. Tõnd ka na n bʋdg y koodã, wall f reezẽ tɩɩs pʋtã n loog ye. La d ka na n yũ tẽngã buls koom me ye. Yaa so-kõodrã bal la d na n tũ, la d ka na n bʋdg goabg bɩ rɩtgo, hal n wa tɩ yi y tẽngã ye.»

¹⁸La Edom naabã leokame yaa: «Ayo! Y ka na n pɩʋʋg mam tẽngã n loog ye! Yãmb sã n kɩɩse, m na n yika zabr ne-yã.»

¹⁹La Israyɛll nebã kell n leb n yeelame: «Yaa sorã bal la d na n tũ, la tõnd ne d rũmsã sã n yũ y tẽngã koom, y d na n yao a ligdi. Tõnd sẽn kot yãmb bũmb ning bala, yaa tɩ y bas tõnd tɩ d pɩʋʋg y tẽngã n looge.»

²⁰La Edom naabã yeelame: «Ayo! Yãmb ka na n tũ ka ye!» Dẽ, Edom nebã yii ne tãb-biis wʋsg sẽn tar pãnga, n na n seg Israyɛll nebã,

²¹n gɩdg-b tɩ b ra pɩʋʋg b tẽngã n loog ye. La Israyɛll nebã wẽnemdame n dɩk sor a to.

²²Israyɛll nebã fãa yii Kadɛɛse, n loog n kẽng Hoor tãngã

²³sẽn be Edom tẽngã toadgẽ wã. La beenẽ, Sẽn-Ka-Saab yeela a Moyiis ne a Aarõ yaa:

²⁴A Aarõ na n kiime n sak a saam-dãmba. Yẽnda ka na n kẽ tẽng ning mam sẽn kõ Israyɛll nebã ye. Bala, Meriba koomã zĩigẽ, yãmb kɩɩsa mam noorã.

²⁵Bɩ foom a Moyiis tall a Aarõ ne a biig a Eleyazaare, n kɩt tɩ b rʋ Hoor tãngã zugu.

²⁶La y sã n ta tãngã zugu, bɩ f yees a Aarõ futã n yeelg a biig a Eleyazaare. Bala yaa beenẽ la a Aarõ na n ki n sak a saam-dãmba.

²⁷A Moyiis maana wa Sẽn-Ka-Saab sẽn yeelã. Bãmb b tãabã fãa rʋʋ Hoor tãngã zugu, Israyɛll nebã fãa nifẽ.

²⁸La a Moyiis yeesa a Aarõ futã n yeelg a Eleyazaare, la a Aarõ kii tãngã zug beenẽ. Dẽ poore, a Moyiis ne Eleyazaar yii tãngã zug n sigi.

²⁹La Israyɛll nebã fãa sẽn yã t'a Aarõ kiime wã, b yãba a kʋʋrã rasem pis-tã.