Read SEBR SÕNGO, 1998 Sõdbo 21 Bible Online

Sõdbo 21 - SEBR SÕNGO, 1998 bible

Sõdbo 21

¹Araad naabã sẽn be Negɛɛv soolmẽ wã rag n yaa Kana neda. Yẽnda sẽn wʋm tɩ Israyɛll nebã rɩka Atarim tẽngã sor n watẽ, a yiime n tɩ zab ne bãmb n yõg bãmb neb kẽere.

²Dẽ, Israyɛll nebã pʋlma Sẽn-Ka-Saab n yeel yaa: «Yãmb sã n sõng tõnd tɩ d tõog tẽn-kãngã nebã, d na n sãama a tẽmsã zãnga.»

³Dẽ, Sẽn-Ka-Saab leoka Israyɛll nebã pʋʋsgo, n kɩt tɩ bãmb tõog Kana nebã. Israyɛll nebã kʋʋ Kana nebã, la b sãam b tẽngã zãnga, la b pʋda zĩ-kãng yʋʋr tɩ Hoorma, sẽn dat n togs tɩ ‹Raboogo.›

⁴Israyɛll nebã yii Hoor tãngẽ wã n dɩk Mog-miuugã sore, sẽn na n yɩl n gil Edom tẽngã. La bãmb sẽn wa n be weoogã pʋg n kẽnda, b raoodã boogame.

⁵Dẽ, Israyɛll nebã sɩngame n yẽgem ne Wẽnnaam, la ne a Moyiis n yeele: «Bõe yĩng tɩ yãmb yiis tõnd Ezɩpt tẽngã tɩ d na n wa ki weoogẽ ka? Bur ka be ka, koom me ka be ka. La tõnd yamã me yaa n yii ne mandã sẽn yaa nin-bãan-dɩɩbã»

⁶Dẽ, Sẽn-Ka-Saab tʋma wag-toos Israyɛll nebã sʋka, la wiisã rũma bãmb neb wʋsg tɩ b ki.

⁷La neb nins sẽn ket-bã kẽnga a Moyiis nengẽ n tɩ yeel-a yaa: «Tõnd beegame! Bala, tõnd yẽgma ne Sẽn-Ka-Saabo, la ne foom. Dẽ yĩngã, bɩ f pʋʋs n kos Sẽn-Ka-Saab tɩ b kɩt tɩ wiisã loog n bas-do.» Dẽ, a Moyiis pʋʋsa nebã yĩnga.

⁸La Sẽn-Ka-Saab yeela a Moyiis yaa: «Rõog wag-toaagã naand ne zũudu, n dɩk-a n yagl ra-lugdg zugu. Woto, waaf sẽn dũm ned ninga fãa, a sã n nak n ges zũudã waafã, a ka na n ki ye.»

⁹Dẽ, a Moyiis rõoga zũud waaf n yagl ra-lugdg zugu. La ned ning fãa waaf sẽn dũm t'a nak n ges zũud waafã, a soabã rag n ka kiid ye.

¹⁰Dẽ poore, Israyɛll nebã yika be, la bãmb tɩ siga Obote.

¹¹La bãmb yika Obot n tɩ sig Ye-Abarim sẽn be weoogã pʋga, Moaab yaangã sẽnẽ.

¹²Bãmb leb n yii be n kẽng n tɩ sig n Zerɛɛd ko-soogã noore.

¹³La bãmb leb n yii zĩ-kãng n kẽng n tɩ ti Arno kʋɩlgã rʋʋnde. Arno kʋɩlgã ko-zoetem pɩʋʋgda Amoor-dãmbã soolem, n dabd weoogã pʋga. Bala, Arno kʋɩlgã n yaa toadga, Moaab tẽngã ne Amoor-dãmbã soolem sʋka.

¹⁴Yaa rẽ tɩ Sẽn-Ka-Saab zab yɩɩl sebr pʋga, b gomdã Wahɛɛb tẽngã sẽn be Sufa soolmẽ wã ko-soayã yelle, la a leb n gomda Arno ko-soayã yelle.

¹⁵La Arno koomã sẽn zoet n teesd Aar tẽngã, n yaa Moaab tẽngã toadga.

¹⁶Israyɛll nebã yii Arno n ta zĩig ning b sẽn boond tɩ ‹Bulgã.› La yaa beenẽ la Sẽn-Ka-Saab yeel a Moyiis t'a tigim Israyɛll nebã tɩ b kõ-b koom tɩ b yũ.

¹⁷Dẽ, Israyɛll nebã pʋda yɩɩll n yeel yaa: «D kaas ne sũ-noogo, tɩ bulgã pusga koom!

¹⁸Bul-kãng yaa nanambsã n tuki, Bul-kãng yaa kasem-dãmbã n tuki, B tuk-a-la ne b naam dasabã.» Dẽ, Israyɛll nebã yii weoogẽ wã n kẽng Mataniya,

¹⁹n yi Mataniya n kẽng Nahalɩyɛlle, la bãmb yii Nahalɩyɛlle n kẽng Baamote,

²⁰n yaool n yi Baamot n kẽng tãn-long ning sẽn pasgd Moaab tẽngã n teesd Pisga tãngã. Ned sã n be tãn-kãng zugu, a nee weoogã fãa gilli.

²¹Israyɛll nebã tʋma neb tɩ b tɩ yeel Amoor-dãmbã naab a Sihon yaa:

²²«Tõnd kot n na n pɩʋʋga yãmb tẽngã n looge. Tõnd ka na n bʋdg y koodã, wall f reezẽ tɩɩs pʋtã n loog ye. La d ka na n yũ tẽngã buls koom me ye. Yaa so-kõodrã bal la d na n tũ, la d ka na n bʋdg goabg bɩ rɩtgo, hal n wa tɩ yi y tẽngã ye.»

²³La baoosgo, Amoor-dãmbã naab a Sihon ka sak tɩ Israyɛll nebã pɩʋʋg a tẽngã n loog ye. Yẽnda tigma a tãb-biisã fãa n na n yi n seg Israyɛll nebã weoogẽ wã. Yẽnda kẽng n tɩ zaba ne Israyɛll nebã Yakaas tẽngã.

²⁴La Israyɛll nebã tõoga Amoor-dãmbã n deeg b tẽngã, sẽn sɩng ne Arno kʋɩlgã n tɩ tãag Yaaboke, n ta Amo nebã tẽngã toadga, bala, Amo nebã tẽngã toadgã rag n meeme n gũbgi.

²⁵Dẽ, Israyɛll nebã reega Amoor-dãmbã tẽmse, ne Hɛsbon la a tẽn-kɩremsã n sooge, la bãmb tɩ zĩnda be.

²⁶Hɛsbon rag n yaa Amoor-dãmbã naab a Sihon na-tẽnga. Bala, yẽnda rag n zaba ne Moaab rãmbã pipi naabã n deeg a soolmã tẽmsã fãa, hal n tãag Arno.

²⁷Yaa rẽ tɩ yɩɩn-yɩɩndbã yɩɩnd n yetẽ: «Wa-y Hɛsbon tẽngã, Tɩ d lebs n me a Sihon tẽngã t'a yalse.

²⁸Bala, bugum n yi Hɛsbon, Bug-witim n yi a Sihon tẽngã, Bugmã rɩɩ Aar tẽngã sẽn be Moaabã, La a rɩɩ Arno tãmsã zut wẽn-naandsã.

²⁹Moaab nebã, yãmb paama toogo! Wẽn-naandg a Kemok pʋʋsdba, yãmb yaa kũum! Bãmb kɩtame tɩ b kom-dibli wã lebg zoɛtba, N kɩt tɩ b kom-pugli wã, Lebg Amoor tẽng naab a Sihon yembse.

³⁰Tõnd tãoo Amoor-dãmbã ne d pɛɛmã. Moasã, Hɛsbon sãama zãnga, la tẽngã fãa sãamame n tɩ tãag Dɩbõ. Tõnd wãa tẽnga fãa hal n tãag Nofa. Wakat-kãnga, bugmã rɩɩme n tãag Medeba.»

³¹Yɩɩ woto la Israyɛll nebã reeg Amoor-dãmbã tẽngã n kẽ.

³²A Moyiis tʋma neb tɩ b tɩ gilg n ges Yazɛɛr tẽngã. La Israyɛll nebã zab n deega Yazɛɛr tẽngã, ne a tẽn-kɩremsã, n dig Amoor-dãmbã sẽn da be beenẽ wã.

³³Rẽ poore, bãmb toeema sore, n wẽnemd n dɩk Basan sorã. La Basan naab a Oog yii ne a tẽngã nebã fãa n na n zab ne Israyɛll nebã Edreyi.

³⁴La Sẽn-Ka-Saab yeela a Moyiis yaa: «Da zoe Basan naab a Oog ye! Bala mam na n kɩtame tɩ f tõog yẽnda ne a nebã fãa, ne a tẽngã zãnga. Fo na n maana yẽnda wa fo sẽn da maan Amoor-dãmbã naab a Sihon sẽn dag n be Hɛsbondã.»

³⁵Israyɛll nebã tõoga naab a Oog ne a kom-dibli wã, la a tãb-biisã fãa. Bãmb kʋ-b-la zãnga, n ka bas tɩ ned ba a yembr põs ye. La bãmb deega a tẽngã n sooge.