Read SEBR SÕNGO, 1998 Sõdbo 23 Bible Online

Sõdbo 23 - SEBR SÕNGO, 1998 bible

Sõdbo 23

¹A Balaam yeela a Balak yaa: «Me tẽn-kug a yopoe ka, la f tall lols a yopoe, ne pe-raad a yopoe n wa kõ-ma.»

²La a Balak saka a Balaam gomdã. La tẽn-kugr fãa zugu, bãmb dɩka loalg a ye, ne pe-raoogo, n maan maoongo.

³Dẽ, a Balaam yeela a Balak yaa: «Pa ka, n yals maoongã fo sẽn maanã sɛɛgẽ, tɩ m leb kɛɛnga, n ges Sẽn-Ka-Saab kõn vẽneg b meng ne-ma. B sã n vẽneg b meng ne-ma, m na togs-f koɛɛg ning b sẽn na n kõ-ma.»

⁴Woto, Wẽnnaam vẽnega b meng ne a Balaam. La a Balaam yeela Wẽnnaam yaa: «Ade, mam mee tẽn-kug a yopoe, la tẽn-kugr fãa zugu, m maana loalg ne pe-raoog maoongo.»

⁵Dẽ, Sẽn-Ka-Saab wilga a Balaam gomd ninga yẽnda sẽn tog n tɩ togsã.

⁶A Balaam lebg n leba naab a Balak nengẽ, n tɩ mik t'a ket n yas maoongã sɛɛgẽ, yẽnda ne Moaab nanambsã.

⁷Dẽ, a Balaam goma gom-minim goam n yeel yaa: «Moaab naab a Balak kɩtame tɩ b bool maam, Yẽnda kɩtame tɩ m yi Siiri tãmsã sẽn be yaangã n wa, Yẽnda yeela maam yaa: Wa kãab a Zakoob yagensã wẽng n kõ-ma, Wa kãab Israyɛll nebã wẽnga!

⁸La mam na n yɩɩ wãna, N kãab Wẽnnaam sẽn ka kãab b rãmb wẽngã wẽnga?

⁹Mam zĩnda tãmsã zut n get nin-bamba, Mam da bee tãmsã zut n get-ba, La mam mikame tɩ yaa buud sẽn welg toore, La bãmb miime tɩ b welga toor ne buud a taabã.

¹⁰Ãnda n tõe n sõd Israyɛll nebã n sɛ? Ãnda n tõe n bãng a Zakoob yagensã sõore? Bãmb yaa wʋsg n yɩɩd tẽng tom. Bɩ m kũumã yɩ wa nin-bãmbã sẽn yaa nin-tɩrsã kũum, La bɩ m baoosgã yɩ wa Israyɛll nebã baoosgo!»

¹¹Woto, a Balak yeela a Balaam yaa: «Yaa bõe la fo sẽn maan maam woto wã? Mam boola foom tɩ f wa kãab m bɛɛbã wẽnga, la maan a wãn tɩ fo wa kãabd bãmb kãab-noogo!»

¹²La a Balaam leoka a Balak yaa: «Dẽ yĩnga, ka Sẽn-Ka-Saab sẽn yeel maam bũmb ningã la mam tog n togs sɩda?»

¹³La a Balak yeela a Balaam yaa: «Wa tũ maam tɩ d kẽng zĩig a to, la be, fo na n tõog n yãnd-b-la gilli, dẽ, f na kãab-b wẽng n kõ-ma. Bala, ka wã, fo nee bãmb bɛk bala.»

¹⁴Dẽ, a Balak talla a Balaam n kẽng Sofim pʋʋgã sẽn be Pisga tãngã zugã. La beenẽ, a Balak leb n mee tẽn-kug a yopoe, la tẽn-kugr fãa zugu, yẽnda kʋʋ loalg ne pe-raoog n maan maoongo.

¹⁵A Balaam yeela yẽnda yaa: «Pa ka n yals n pẽneg maoongã fo sẽn maanã, tɩ m leb kɛɛng n tɩ gũ koɛɛg ning Sẽn-Ka-Saab sẽn na n kõ-ma.»

¹⁶Dẽ, Sẽn-Ka-Saab wa n sega a Balaam, n wilg-a gomd ninga yẽnda sẽn tog n tɩ gomã. La bãmb yeela a Balaam t'a lebg n leb a Balak nengẽ.

¹⁷A Balaam lebg n leba a Balak nengẽ, n tɩ mik t'a ket n yas a maandã sɛɛgẽ, yẽnda ne Moaab nanambsã.

¹⁸Dẽ, a Balaam goma ne gom-minim n yeel yaa: «Sipoor biig a Balake, Yik n kelg maam neere!

¹⁹Wẽnnaam ka ninsaal n yagd zĩrẽ ye, La bãmb leb n ka ninsaal n tekd yam ye! Bãmb sã n yeel bũmbu, b pidsd-a lame.

²⁰Ade, yaa Wẽnnaam meng n kõ maam noore, N yeel tɩ m ning nin-bãmbã barka. Dẽ wã, mam ka tõe n tek bũmb ye.

²¹Sẽn-Ka-Saab ka ne yell a Zakoob yagensã zug ye, La b ka ne wẽng a Zakoob buudã sʋk ye. Bala, Sẽn-Ka-Saab yaa Israyɛll Wẽnnaam, La bãmb bee b nebã sʋka. La Sẽn-Ka-Saab reegda b nebã waoogre.

²²Yaa Wẽnnaam n yiis bãmb Ezɩpt soolmã pʋgẽ, Ne pãn-kãseng sẽn wẽnd we-naaf pãnga.

²³Tɩɩm ka tõe n maan a Zakoob yagensã bũmb ye, La bagr me ka tõe Israyɛll nebã ye. Wẽnnaam vẽnegda bãmb bũmb fãa, Wa sẽn zems a wakate.

²⁴Ade, nin-bãmbã yikda wa gɩgem-yãanga, N yikd n yas wa gɩgem-daoogo. A ka gãanded t'a ka wãb rũng ning a sẽn yõka nemdo, La a ka gãanded t'a ka yũ rũng ning a sẽn kʋ wã zɩɩm ye.»

²⁵A Balak yeela a Balaam yaa: «Fo sã n mi tɩ f ka rat n kãab nin-bãmbã wẽnga, bɩ f ra ning-b bark me wɛ.»

²⁶La a Balaam leoka a Balak yaa: «Mam pĩnd n togsa foom tɩ yaa Sẽn-Ka-Saab sẽn na n yeel maamã bal la m na n maane!»

²⁷Dẽ, a Balak leb n yeela a Balaam yaa: «Sã n yaa woto bɩ f wa tɩ m tall f tɩ d kẽng zĩig a to, tɩ daar ning bɩ Sẽn-Ka-Saab sak tɩ f kãab nin-bãmbã wẽng n kõ-ma.»

²⁸La a Balak talla a Balaam n dʋ Pewoor tãngã zugu, zĩig ning sẽn teesd weoogã.

²⁹Dẽ, a Balaam yeela a Balak yaa: «Me tẽn-kug a yopoe ka, la f tall lols a yopoe, ne pe-raad a yopoe n wa kõ-ma.»

³⁰La a Balak saka a Balaam gomdã. La a Balak rɩka loalg ne pe-raoogo, n maan maoong tẽn-kugr fãa zugu.