Read SEBR SÕNGO, 1998 Sõdbo 24 Bible Online

Sõdbo 24 - SEBR SÕNGO, 1998 bible

Sõdbo 24

¹A Balaam bãngame tɩ Sẽn-Ka-Saab tolg n dat n ninga Israyɛll nebã barka. Dẽ, a Balaam ka leb n nams a meng n na n bao vẽnegr wa pĩndã ye. Yẽnda wẽnemda a neng n tees weoogã.

²A Balaam sẽn zẽk a nenga, a yãnda Israyɛll buudã neb sẽn be b sikã zĩigẽ. La Wẽnnaam Sɩɩgã siga a Balaam zugu.

³La a Balaam goma gom-minim goam n yeel yaa: «Ade, maam a Balaam, a Bewoor biigã n gomde. Yaa soab ninga nin sẽn puk t'a neẽ wã n gomde.

⁴Ade, maam n gomde, mam yaa soab ning sẽn wʋmd Wẽnnaam goamã, La m yaa soab ning sẽn ne Pãng-Soab a Wẽnnaam vẽnegrã. La m yaa Soab ning sẽn wõgemded n waoogd Wẽnnaam, Tɩ nin pukdẽ tɩ m wʋmd goamã.

⁵Israyɛll nebã, a Zakoob yagense, Ad-y y fu-rotã sɩd be neere.

⁶Y fu-rotã yɛdga wa ko-soayã, Wa zẽed zĩig sẽn be kʋɩlg noore, Wa Alowɛs tɩɩs Sẽn-Ka-Saab sẽn sele, Wa sɛɛdr tɩɩs sẽn sel kʋɩlg noor wogle,

⁷Bãmb wẽnda koom sẽn pid bulg n puugdẽ, Tɩ pʋtã paamd koom wʋsgo, Israyɛll rĩma na n tõoga Agaag-rãmbã, La bãmb soolmã pãng na n paasame.

⁸Yaa Wẽnnaam n yiis bãmb Ezɩpt soolmã pʋgẽ, La yɩɩ ne pãn-kãseng sẽn wẽnd we-naaf pãnga. La buud nins sẽn wat n zabd ne bãmbã, bãmb sãamd-b-la zãnga. Bãmb wõrda b bɛɛbã kõaba. La b tãood-b ne pɛɛma.

⁹Bãmb wũunduda wa gɩgemde, N wũg wa gɩgem-yãanga, La ãnda n tõe n modg-b tɩ b yiki? Israyɛll nebã, ned ning fãa sẽn ningd yãmb barka, A soab na n paama barka, La ned ning fãa sẽn kãabd yãmb wẽnga, A soab na n paama kãab-wẽnga.»

¹⁰A Balak sũurã puuga hal wʋsg ne a Balaam. Dẽ, a Balak mesa a nus n yeel a Balaam yaa: «Mam boola foom ka, n yet tɩ f wa kãab m bɛɛbã wẽng n kõ-ma. La yaa naoor a tãabẽ soab la woto, fo sẽn tar bãmb bark ningr bala!

¹¹Moasã wã, kẽng n looge, kuil f yiri. Mam da pʋlma foom tɩ m na n kõ-f-la waoogr wʋsgo, la Zu-soabã mong-f-la waoog-kãnga.»

¹²A Balaam yeela a Balak yaa: «Mam yaool n dag n pɩnd n togsa neb nins fo sẽn tʋmã n yeel-b yaa:

¹³Ba a Balak sã n kõ maam wanzuri wã ne sãnemã sẽn pid yẽnda na-yirã, mam ka tõe n kɩɩs Sẽn-Ka-Saab sẽn yaa mam Wẽnnaamã noor ye. La yaa Sẽn-Ka-Saab sẽn na n wilg maam koɛɛg ningã bal la m na n togse.»

¹⁴Moasã, m na n lebg n leba m nebẽ. La sẽn deng rẽ, wa tɩ m wilg-f Israyɛll nebã sẽn na n maan Moaab nebã bũmb ninga wakat sẽn wate.

¹⁵Dẽ, a Balaam goma gom-minim n yeel yaa: «Ad maam a Balaam, a Bewoor biigã gomde, Soab ning sẽn ne sẽn watã.

¹⁶Ad ned ning sẽn wʋmd-a Wẽnnaam goamã sẽn yeta. Yaa ned ning sẽn tar-a Saasẽ-Pãng-Soab bãngrã koɛɛga. Soab ning sẽn wõgemded n waoogd Pãng-Soabã, la nin sẽn puk-a wã goamã.

¹⁷Mam nee sẽn wat beoogo, la ka rũndã ye. Mam ne-a lame, la a ket n zãrame, Mam nee ãdg sẽn puk a Zakoob yagensã sʋka. Rĩm n na n zĩnd Israyɛll buudã pʋgẽ, La yẽnda na n pogla Moaab zugã ne-a naamã dasaare. La a kʋ a Sɛt kambã fãa.

¹⁸Yẽnda na n deega Edom n sooge, La a tõog Seyɩɩr nebã sẽn yaa a bɛɛbã, n deeg b tẽngã n sooge. Israyɛll nebã na n paama tõogre.

¹⁹A Zakoob yagengã na n sooga a bɛɛbã, la a na n sãama tẽngã neb nins sẽn kellã.»

²⁰Dẽ zugẽ, a Balaam sẽn yã Amalɛk nebã, a goma gom-minim n yeel yaa: «Amalɛk tẽngã tara pãng n yɩɩd tẽmsã fãa, La daar n wate, tɩ b na n sãam-a zãnga.»

²¹A Balaam sẽn yã Kɛn nebã me, a goma gom-minim n yeel yaa: «Kɛn nebã, yãmb vɩ y tẽngẽ tɩ y pɛlg yaa kãenkãe, Wa liuul sẽn tɩʋ a tʋk pĩig zugu.

²²La baoosgo, Kayẽ rotã na n dɩɩ bugum, Asiiri nebã sã n a tall-y n tɩ kẽes yembdo.»

²³A Balaam leb n goma gom-minim n yeel yaa: «Wẽnnaam sã n yãk yam n na n sãame, Ãnda soab n tõe n põse?

²⁴Neb na n yii Sɩpr ne koom kogend n wa, La bãmb na n sãama Asiiri ne Ebɛɛr nebã, La Ebɛɛr me na n sãamame.»

²⁵A Balaam sẽn gom woto n sɛ, a lebg n kuila a yiri, la a Balak me lebg n loogame.