Read SEBR SÕNGO, 1998 Sõdbo 25 Bible Online

Sõdbo 25 - SEBR SÕNGO, 1998 bible

Sõdbo 25

¹Israyɛll nebã kẽng n tɩ zĩnda Sitim, la beenẽ, bãmb maana yoob ne Moaab kom-pugli wã.

²La Moaab kom-pugli wã kɩtame tɩ Israyɛll nebã kʋ maand n kõ bãmb wẽn-naandsã. Dẽ, Israyɛll nebã naaga Moaab kom-pugli wã n wãb b maandã nemdo, la b pʋʋs b wẽn-naandsã.

³Woto, Israyɛll nebã tɩ naag n pʋʋsa Pewoor wẽn-naandg a Baalle, la Sẽn-Ka-Saab sũurã puuga ne Israyɛll nebã.

⁴Dẽ, Sẽn-Ka-Saab yeela a Moyiis yaa: «Yõg Israyɛll buudã taoor dãmb n kɩt tɩ b luul-b wĩnto-sʋka mam taoore, dẽ, mam sũurã sẽn yik wʋsg ne Israyɛll nebã na n sigame.»

⁵Dẽ, a Moyiis yeela Israyɛll bʋ-kaoodbã yaa: «Bɩ yãmb ned kam fãa kʋ a buudã neb nins sẽn pʋʋsd Pewoor wẽn-naandg a Baallã.»

⁶Wakat ning a Moyiis ne Israyɛll nebã sẽn wa n be sɛk roogã noor n yãbdã, b yãnda Israyɛll ned a yembr sẽn tall Madiyã bi-pugl n wa kẽ a roogẽ.

⁷La Eleyazaar biig a Fineyaas sẽn yaa a Aarõ yagengã yika nebã sʋk n dɩk kãnde.

⁸Yẽnda pʋgla raoã n tɩ kẽ n bʋʋg yẽnda ne pagã fu-roogẽ wã, n kõs bãmb b yiibã fãa pɛlã, tɩ b ki. La wakat-kãng bala, bãagã sẽn dag n kʋʋd Israyɛll nebã yalsame.

⁹La bãagã sẽn da zoe n kʋ neb ninsã sõor yaa neb tus-pisi la a naase.

¹⁰Sẽn-Ka-Saab yeela a Moyiis yaa:

¹¹«Gese, maan-kʋʋd a Aarõ yageng a Fineyaas sẽn yaa a Eleyazaar biigã kɩtame tɩ mam sũurã sẽn da yik ne Israyɛll nebã sigi. Bala, bãmb sʋkã, yaa yẽnda n ka sak mam poorẽ, rẽ kɩtame tɩ mam sẽn ka sakd tɩ b waoog wẽnd a to n paas maamã yĩnga, mam ka kʋ Israyɛll nebã zãng ye.

¹²Woto yĩngã, bɩ f yeel a Fineyaas tɩ m na n maana zems-n-taar kaool ne-a.

¹³Kaool-kãng yaa yẽnda ne a yagensã yĩnga, la a kɩtdame tɩ bãmb lebg maan-kʋʋdb zamaan fãa yĩnga. Bala, yẽnda wilgame tɩ mam sẽn yaa yẽnda Wẽnnaamã, yẽnda sɩd bee mam poorẽ. Bũmb ning yẽnda sẽn maanã kɩtame tɩ mam kõ Israyɛll nebã b yel-wẽnã sugri.

¹⁴Israyɛll ned ning a Fineyaas sẽn lagem ne Madiyã bi-puglã n kʋ wã yʋʋr boondame t'a Zimri, n yaa Sɩmyõ buudã taoor soab a Salu biiga.

¹⁵La Madiyã bi-puglã b sẽn kʋ wã yʋʋr da boondame t'a Kozbi. A baaba yʋʋr la a Sʋʋre, n yaa Madiyã buud a yembr rot wʋsg naaba.»

¹⁶Sẽn-Ka-Saab yeela a Moyiis yaa:

¹⁷«Yik-y n Zab-y ne Madiyã nebã n sãam-b zãnga!

¹⁸Bala, bãmb maana sɩlem ne yãmba, bãmb sẽn kɩt tɩ yãmb pʋʋs Pewoor wẽn-naandg a Baallã yĩnga. Bãmb naab a yembr bi-pugl a Kozbi kii wakat ning Sẽn-Ka-Saab sẽn wa n sɩbgd nebã. Bala, bãmb tɩ pʋʋsa Pewoor wẽn-naandg a Baalle.»

¹⁹Toogã loogr zugẽ.