Read SEBR SÕNGO, 1998 Sõdbo 28 Bible Online

Sõdbo 28 - SEBR SÕNGO, 1998 bible

Sõdbo 28

¹Sẽn-Ka-Saab yeela a Moyiisi,

²t'a gom ne Israyɛll nebã n yeel-b yaa: «Ade, yãmb tog n talla y maandã ne y kũunã sẽn yõogd bugmã n wa kõ maam wa sẽn zems a wakate. La bõn-kãng na n yɩɩ yũ-noog sẽn tat maam a Sẽn-Ka-Saab yam.

³La daar fãa, yãmb tog n talla pe-ribli a yiib sẽn ka tar zanga, n wa maan maoong sẽn yõogd bugum n kõ maam. La y na n maanda maoon-kãng daar fãa.

⁴Bɩ b rɩk pe-ribl a yembr n maan maoong yibeoogo, la b rɩk a to wã n maan maoong zaabre.

⁵La b tog n paasa zom wam a tã sẽn nag ne oliiv kaam lengr la pʋɩ-sʋka.

⁶Daar fãa maoon-kãngã, sẽn yaa maoong sẽn yõogd bugum t'a yũugã sẽn yaa noogã tat mam yamã, na n kell n yɩɩ wa maoong ning b sẽn maan n kõ maam Sɩnayi tãngã zugã.

⁷La y sã n na n maan yibeoog pe-riblã maoongo, bɩ y paas reezẽ rãam litr a ye la pʋɩ-sʋka, tɩ b tall n wa ne Sẽn-Ka-Saab taoore.

⁸La zaabre, bɩ y rɩk pe-ribl a yiibẽ soabã n maan maoongo, la y paas reezẽ rãam lɩng a yembr la pʋɩ-sʋka, wa yãmb sẽn paas yibeoog maoongã. La a na n yɩɩ maoong sẽn yõogd bugum t'a yũugã yaa noog n tat maam a Sẽn-Ka-Saab yam.

⁹La vʋʋsg daarã, yãmb na n talla yʋʋmd pe-ribli a yiib sẽn ka tar zanga, n wa maan maoongo. Yãmb tog n paasa ne zom wũmbli a yoob sẽn nag ne kaam, la ne reezẽ rãam.

¹⁰La vʋʋsg daar fãa, bɩ y maan maoon-kãng n paas daar fãa maoongã b sẽn maande, n naagd ne zom la reezẽ rãamã.

¹¹Kiuug fãa pipi daare, yãmb na n maana maoong sẽn yõogd bugum n kõ maam a Sẽn-Ka-Saabo. Maoon-kãng yaa lulli a yiibu, ne pe-raoog a ye, la yʋʋmd pe-ribli a yopoe sẽn ka tar zanga.

¹²La yãmb na n naga zom ne kaam n tũnug rũng fãa. Lull fãa yaa zom kɩlo a wɛ, la pe-raoog yaa zom kɩlo a yoobe.

¹³La pe-ribl fãa na n yɩɩ zom kɩlo a tãabo, la bõn-kãens na n yɩɩ maoong sẽn yõogd bugum t'a yũug yaa noog n tat maam a Sẽn-Ka-Saab yam.

¹⁴La yãmb sã na n wa ne reezẽ rãam kũuni, loalg fãa yaa reezẽ rãam lɩms a tãabo, la pe-raoog yaa lɩms a yiibu, la pe-ribl fãa yaa lɩng a ye la pʋɩ-sʋka. Woto yaa maoong b sẽn tog maan yʋʋmdã pʋgẽ kiuug fãa pipi daare.

¹⁵La yãmb tog n maana boɛɛg maoongo, y yel-wẽnã sugr kũun yĩnga, n paas daar fãa maoongã b sẽn maande, n naagd ne reezẽ rãam n kõtẽ wã.

¹⁶Yʋʋmdã pipi kiuugã rasem piig la a naas daarã, yãmb na n tigma taab Pak tigrã yĩng n waoog maam a Sẽn-Ka-Saabo.

¹⁷La kiu-kãng rasem piig la nu wã daare, yãmb na n sɩngame n maan tigrã rasem a yopoe, la rasem a yopoe wã pʋgẽ, yãmb tog n wãba bur sẽn ka ning bɩlle.

¹⁸La tigrã pipi daare, yãmb ka tog n tʋm tʋʋmd ye, la y segd n tigma taab n waoog maam a Sẽn-Ka-Saabo.

¹⁹Yãmb tog n talla lulli a yi, la pe-raoog a ye, ne yʋʋmd pe-ribli a yopoe sẽn ka tar zãnga, n wa maan maoong sẽn yõogd bugum n kõ maam a Sẽn-Ka-Saabo.

²⁰La rũng fãa, yãmb na n paasa zom sẽn nag ne kaam. Lull fãa yaa zom kɩlo a wɛ, la pe-raoog yaa zom kɩlo a yoobe.

²¹La pe-ribli a yopoe wã, a yembr fãa yaa zom kɩlo a tãabo.

²²La yãmb na n talla boɛɛg n wa tɩ b kʋ n maan maoong y yel-wẽnã sugr kũun yĩnga.

²³Maan-bãmbã fãa na n paasa yibeoog fãa maoongã b sẽn yõogd bugmã.

²⁴La tigrã rasem a yopoe wã pʋgẽ, bɩ y maan dɩɩb kũun daar fãa, n yõog bugum t'a yũug yɩ noog n ta Sẽn-Ka-Saab yam. La kũun-kãens tog n naaga daar fãa maoongã ne a reezẽ rãamã b sẽn tũnugdã.

²⁵La rasem a yopoe wã daare, bɩ y tigim taab n waoog maam a Sẽn-Ka-Saabo, la yãmb ka tog n tʋm tʋʋmd badaar ye.

²⁶Daar ninga yãmb sẽn na n tigs y pipi bõn-koaadlã, bɩ y yãk y koodã dẽenem biisi, n tall n wa kõ maam a Sẽn-Ka-Saabo. La badaare, bɩ y tigim taab n waoog maam. La y ka tog n tʋm tʋʋmd badaar ye.

²⁷Yãmb tog n talla lols a yi, la pe-raoog a ye, ne yʋʋmd pe-ribli a yopoe sẽn ka tar zãnga, n wa maan maoong sẽn yõogd bugum n kõ maam a Sẽn-Ka-Saabo.

²⁸La rũng fãa, yãmb na n paasa zom sẽn nag ne kaam. Lull fãa yaa zom kɩlo a wɛ, la pe-raoog yaa zom kɩlo a yoobe.

²⁹La pe-ribli a yopoe wã, a yembr fãa yaa zom kɩlo a tãabo.

³⁰La yãmb na n talla boɛɛg n wa tɩ b kʋ n maan maoong y yel-wẽnã sugr kũun yĩnga.

³¹La yãmb tog n maana maoon-kãngã, n paas daar fãa maoongã b sẽn maande, n naag ne a zomã, la a reezẽ rãamã. Bɩ y wa ne rũms sẽn ka tar zanga, n paas reezẽ rãamã b sẽn naagdã.