Read SEBR SÕNGO, 1998 Sõdbo 34 Bible Online

Sõdbo 34 - SEBR SÕNGO, 1998 bible

Sõdbo 34

¹Sẽn-Ka-Saab yeela a Moyiis

²t'a gom ne Israyɛll nebã n wilg-ba: «Yãmb sã n wa kẽ Kana soolmã pʋgẽ, Ade tẽng ning yãmb sẽn na n soogã todse.

³Nug-rɩgoab sẽnẽ, yãmb soolmã toadg na n sɩnga ne Sĩn weoogã n yegl Edom tẽngã. La yamsem ko-kãsengã sɛtmẽ n tees yaanga.

⁴La toadgã na n gõdga nug-rɩtgã n yi Akrabim tãngã rʋʋdgã, n tɩ yi Sĩn n baas Kadɛɛs-Barneya rɩtgã, n lɛɛg n yi Atsaar-Adaare, la Asmone.

⁵La a na n leb n yii Asmone, tɩ toadgã wẽnemd n tɩ sok Ezɩpt ko-soogã, n kẽng n tɩ ta ko-kãsengã.

⁶Nin-taoorã, yãmb soolmã toadgã na n yɩɩ ko-kãsengã wogellã.

⁷La rɩtgã, yãmb soolmã toadg na n yɩɩ ko-kãsengã sẽn tees Hoor tãngã.

⁸La a yi Hoor tãngã, n tũ lebo-Hamate, ne Sedaade.

⁹La a na n kell n yii Zɩfron, n tɩ baas Atsaar-Enan. Yãmb soolmã toadg rɩtgã na n yɩɩ woto.

¹⁰La yaangã, yãmb soolmã toadg na n yii Atsaar-Enan, n tees Sefam.

¹¹La a na yii be n tees Arbela sẽn be Ayin yaangã, la a na n kẽnga taoor n tɩ tãag Kinerɛt kʋɩlgã noor sigdsã sẽn be yaangã,

¹²n tɩ yek Zʋrdẽ n tall n tɩ tãag yamsem ko-kãsengã. Woto n na n yɩ yãmb tẽngã todse.»

¹³Dẽ, a Moyiis togsa Israyɛll nebã bũmb ning b sẽn wilg yẽnda wã. La a yeel-b yaa: «Tẽng ning Sẽn-Ka-Saab sẽn kõ noor tɩ b pʋɩ buud a wɛ a taabã, la Manaase buudã pʋɩ-sʋkã la woto.

¹⁴Bala, Rubɛn ne Gaad buudã, la Manaase buudã pʋɩ-sʋk zoe n paama b zĩisi.

¹⁵La zĩis nins b sẽn kõ-bã teesa Zeeriko, n be Zʋrdẽ kʋɩlgã yaanga.»

¹⁶Sẽn-Ka-Saab yeela a Moyiis yaa:

¹⁷«Ade, yaa maan-kʋʋd a Eleyazaare, ne a Nun biig a Zozoe, n na n pʋɩ zĩisã n kõ buud fãa.

¹⁸La buud fãa pʋgẽ yãmb na n yãka naab a ye t'a wa sõng bãmba.

¹⁹Nebã yʋy la woto: Zʋʋda buudã pʋgẽ, yaa a Yefune biig a Kalɛɛbe.

²⁰Sɩmyõ buudã pʋgẽ, yaa a Amiwuud biig a Semuyɛlle.

²¹Benzame buudã pʋgẽ, yaa a Kɩslõ biig a Elidaade.

²²Dan buudã pʋgẽ, yaa a Yogli biig a Buki.

²³A Zozɛf biig a Manaase buudã pʋgẽ, yaa a Efood biig a Haniyɛlle.

²⁴A Zozɛf biig a Efrayiim buudã pʋgẽ, yaa a Sɩftã biig a Kemuwɛlle.

²⁵Zabulõ buudã pʋgẽ, yaa a Parnak biig a Elisafan.

²⁶Isakaar buudã pʋgẽ, yaa a Azan biig a Paltɩyɛlle.

²⁷Asɛɛr buudã pʋgẽ, yaa a Selomi biig a Ayiwuudi.

²⁸Neftali buudã pʋgẽ, yaa a Amiwuud biig a Pedahɛlle.»

²⁹Neb nins Sẽn-Ka-Saab sẽn yãk tɩ b pʋɩ zĩisã n kõ Israyɛll nebã la woto.