Read SEBR SÕNGO, 1998 Sõdbo 36 Bible Online

Sõdbo 36 - SEBR SÕNGO, 1998 bible

Sõdbo 36

¹A Manaase biig a Makɩɩr biig a Galaad roogã taoor-dãmbã sẽn yaa a Zozɛf yagensã, waa a Moyiis ne Israyɛll kãsem-dãmbã nengẽ n yeel-b yaa:

²«Sẽn-Ka-Saab kɩtame tɩ yãmb maan poeer n pʋɩ tẽngã n kõ Israyɛll buudã. La b leb n kõo yãmb noor tɩ y rɩk tõnd saam-biig a Selofaad pʋɩɩrã n kõ a kom-pugli wã.

³Dẽ, bãmb sã n kẽ kãadem ne Israyɛll buud a to neda, b na n welga bãmb pʋɩɩr toor ne tõnd ba-rãmbã pʋɩɩre, n paas buud ning bãmb sẽn tɩ naagã pʋɩɩre. Woto na n booga poeerã sẽn n kõ tõnd pʋɩɩr ningã.

⁴La Israyɛll nebã yʋʋm pis-nu tigrã sã n wa ta, b na n dɩka bãmb pʋɩɩrã n paas buud ning sẽn na n soog bãmbã pʋɩɩre. Dẽ, tõnd ba-rãmbã pʋɩɩr na n boogame.»

⁵Dẽ, a Moyiis togsa Israyɛll nebã Sẽn-Ka-Saab sẽn wilg bũmb ninsã, n yeel-b yaa:

⁶«Ade, a Zozɛf yagensã tara bʋʋm, la ad Sẽn-Ka-Saab koɛɛg a Selofaad kom-pugli wã yĩnga: bãmb tõe n kẽe kãadem ne ned ninga b sẽn date, la yaa tɩ tog n yɩɩ bãmb ba wã buud pʋga.

⁷B ka tog n dɩk Israyɛll buud a ye pʋɩɩr n kõ buud a to ye. Israyɛll buud fãa tog n sooga a ba-rãmb pʋɩɩre.

⁸Bi-pugl sã n tar pʋɩɩr Israyɛll buudã pʋgẽ, a tog n kẽe kãadem ne a ba wã buudã neda, sẽn na n yɩlẽ tɩ Israyɛll ned fãa kell n soog a ba-rãmb pʋɩɩre.

⁹B ka tog n dɩk Israyɛll buud a ye pʋɩɩr n kõ buud a to ye. Israyɛll buud fãa tog n sooga a ba-rãmb pʋɩɩre.»

¹⁰Dẽ, a Selofaad kom-pugli wã maana wa Sẽn-Ka-Saab sẽn wilg a Moyiisã.

¹¹A Selofaad kom-pugli wã, a Mala, a Tɩrsa, a Hogla, a Milka, ne a Noa kẽe kãadem ne b ba wã saam-biis kom-dibli.

¹²Bãmb kẽe kãadem ne a Zozɛf biig a Manaase yagensã. Dẽ, bãmb pʋɩɩrã paa b ba wã buud pʋgẽ.

¹³Woto n yɩ tõod la noy nins Sẽn-Ka-Saab sẽn kõ a Moyiis t'a kõ Israyɛll nebã, Moaab weoogã pʋgẽ, Zʋrdẽ kʋɩlgã noor sẽn teesd Zeeriko wã.