Read SEBR SÕNGO, 1998 Sõdbo 6 Bible Online

Sõdbo 6 - SEBR SÕNGO, 1998 bible

Sõdbo 6

¹Sẽn-Ka-Saab yeela a Moyiis

²t'a togs Israyɛll nebã yaa: «Rao bɩ pag sã n maan pʋlengo, n yeel tɩ yẽnda na welga toor n lebg Sẽn-Ka-Saab rẽnda,

³yẽnda soab ka tog n yũ reezẽ rãam wall rã-toos ye. A ka tog n yũ reezẽ rã-miisenga, wala rã-kumdum ye. La yẽnda ka tog n yũ bõn-yũudl sẽn maan ne reezẽ ye, la a ka tog n leb n dɩ reezẽ-maasa, wall a wãb a koeems ye.

⁴Yẽnda pʋlengã sɩngr hal n tãag a sɛɛbo, a ka tog n tol n leb n dɩ reezẽ bila, la baa reezẽ-paok ka tog n kẽ a noor ye.

⁵La sẽn paas me, Yẽnda sẽn pʋlm t'a na n welga toor Sẽn-Ka-Saab yĩngã pʋgẽ, barg ka tog n sɩɩs a zugã, hal n tãag a pʋlengã a sẽn maan ne Sẽn-Ka-Saabã pidsg daare ye.

⁶La yẽnda pʋlengã sɩngr n tɩ tãag a sɛɛbo, a leb n ka tog n kolg kũum me ye.

⁷La baa sã n yaa yẽnda ba, bɩ a ma, wall a ba-bi-raoogo, bɩ a ba-bi-poak n ki, a ka tar noor tɩ kolg kũumã n dẽgem a meng ye. Bala yẽnda welga toor Wẽnnaam yĩnga. La yẽnda zoobdã sẽn ka põngã wilgda bõn-kãnga.

⁸La nin-kãngã pʋlengã sɩngr n tɩ tãag a sɛɛbo, a welga toor n lebg Sẽn-Ka-Saab rẽnda.

⁹La yẽnda pʋlengã wakatã pʋgẽ, ned sã n be yẽnda sɛɛgẽ, n wẽneg n ki zĩig pʋgẽ, yẽnda lebga rẽgdo, tɩ bala, a sɩɩsa kũum. Dẽ, rasem a yopoe wã daare, yẽnda na n leb n lebga yɩlemde, la a tog n põnga a zugã.

¹⁰La rasem a nii wã daare, a tog n talla wal a yiibu, wall manwal a yiib n wa kɩs maan-kʋʋdã sɛk roogã noore.

¹¹Dẽ, maan-kʋʋdã na n dɩka a yembre, n maan maoong yel-wẽnã sugr kũun yĩnga, la a rɩk a yembrã, n maan maoong sẽn yõogd bugum. Rẽ poore, maan-kʋʋdã na n maana b paoosg a soabã zugu, t'a sẽn sɩɩs kũumã n lebg rẽgdã bɩ a lebg yɩlemde. La badaar bala, maan-kʋʋdã lebd n dɩka yẽnda n kõ Sẽn-Ka-Saabo.

¹²Dẽ, pʋlengã soab lebd n maneg n maana pʋleng ne Sẽn-Ka-Saab wa sɩngrẽ wã. La yẽnda wata ne yʋʋmd pe-ribla, tɩ b maan maoong a yel-wẽnã sugr kũun yĩnga. La b ka tog n leb n geelg ray nins yẽnda sẽn dag n zoe maan tɩ loogã ye. Bala, yẽnda pʋlengã sãamame.»

¹³Ad no-tũudr ning b sẽn tog n tũ sẽn pʋlm-a ne Wẽnnaamã yĩnga: Yẽnda pʋlengã rasem sõor sẽn na n pidã daare, b talld-a lame n wa sɛk roogã noore.

¹⁴Dẽ, yẽnda tallda a kũunã, n wa kõ Sẽn-Ka-Saabo. Yẽnda tog n waa ne rũms a tãab sẽn ka tar zanga. Yaa yʋʋmd pe-ribla, maoong sẽn yõogd bugmã yĩnga, la yʋʋmd pe-sadga, yel-wẽnã sugr kũun maoong yĩnga, n paas ne pe-raoogo, zems-n-taar maoong yĩnga.

¹⁵Yẽnda leb n tog n waa ne bur-maas b sẽn nag ne kaam n ka ning bɩlle, peoog a yembre, la zom sẽn nag ne kaam n maan maasa. La a tog n tũnuga zom ne reezẽ rãam sẽn yaa kũun maoongã maaneg yĩnga.

¹⁶Dẽ, maan-kʋʋdã rɩkda kũun-kãensã fãa n wa maam a Sẽn-Ka-Saab taoore, n maan yel-wẽnã sugr kũun maoongã, ne maoong sẽn yõogd bugmã.

¹⁷Rẽ poore, a na n dɩka pe-raoogã n maan zems-n-taar maoongo, la a rɩk bur sẽn ka ning bɩllã, ne peoogã, la ne zomã, la reezẽ rãamã n kõ Sẽn-Ka-Saabo.

¹⁸La ned ning sẽn dag n pʋlm-a a meng ne Sẽn-Ka-Saabã na n põnga a zugã sɛk roogã noore, n dɩk a zoobdã n lob zems-n-taar maoongã bugum pʋga.

¹⁹La yẽnda sã n põnga a zugã n sɛ, maan-kʋʋdã na n yãka pe-raoogã b sẽn dʋgã bãoko, la a yãk bur-maas sẽn ka ning bɩllã a ye, ne miisug n ning sẽn dag n pʋlm-a wã nusẽ.

²⁰Rẽ poore, maan-kʋʋdã meng na n dɩka kũunã n wilg Sẽn-ka-Saabo, la a maan b rog-n-mikã. La kũun-kãens welga toor Sẽn-Ka-Saab yĩnga, la b yaa maan-kʋʋdã n so, n paas ne rũngã yãoogã, la a gerã sẽn tog n yɩ maan-kʋʋdã rẽndã. La rẽ fãa zugẽ, ned ning sẽn dag n pʋlm-a wã tõe n leb n yũu reezẽ rãam.

²¹Woto n yaa no-tũudri, ned ning sẽn pʋlem a meng ne Sẽn-Ka-Saab wɛɛngẽ. La woto me yaa kũun ninsi, ned sẽn maan pʋleng sẽn tog n kõ Sẽn-Ka-Saabo. La a soabã sã n tar pãn-tõog n tõe n paas bũmbu, a tõe n paasame, la bũmb sẽn be bala, yaa t'a tog n modgame n kõ kũun ning yẽnda sẽn pʋlmã, wa sẽn zems pʋlengã no-tũudsã.

²²Sẽn-Ka-Saab yeela a Moyiis yaa:

²³«Gom ne a Aarõ, ne a kom-dibli wã n yeel-b yaa: Yãmb sã n wa ningd Israyɛll nebã barka, ad goam nins yãmb sẽn tog n gomã:

²⁴Bɩ Sẽn-Ka-Saab ning-y bark la b gũ-yã!

²⁵Bɩ Sẽn-Ka-Saab sulg b neng n ges-yã, la b zoe y nimbãanega!

²⁶Bɩ Sẽn-Ka-Saab ges y yelle, n maan-y neere!»

²⁷Dẽ, bãmb sã n wa n pʋd mam yʋʋrã Israyɛll nebã zugu, mam na n ning-b-la barka!