Read SEBR SÕNGO, 1998 Sõdbo 7 Bible Online

Sõdbo 7 - SEBR SÕNGO, 1998 bible

Sõdbo 7

¹Daar ning a Moyiis sẽn ti sɛk roogã n sɛ wã, a rɩka kaam n pʋdg sɛk roogã zugu, ne a teedã fãa zutu, tɩ b lebg Sẽn-Ka-Saab rẽnda. La a pʋdg kaamã tẽn-kugrã ne a teedã fãa zutu, tɩ lebg Sẽn-Ka-Saab n so.

²Dẽ, Israyɛll nebã nanambs nins sẽn dag n sõng a Moyiis tɩ b sõd Israyɛll nebã talla b kũun n wa.

³Bãmb sẽn tall kũun nins n wa kõ Sẽn-Ka-saabã, yaa saar-dãmb yoobe, niig piig la yiibu, dat n yeel tɩ naab fãa ne a naafo, la nanambs a yiib fãa yaa saar a yembre. Dẽ, bãmb talla b kũunã fãa n wa sɛk roogã noore.

⁴Sẽn-Ka-Saab yeela a Moyiis yaa:

⁵«Bɩ f sak n deeg b kũunã. Bala, b na n dɩka saar-dãmbã ne niigã n maan sɛk roogã tʋʋmde. Bɩ f rɩk saar-dãmbã ne niigã n pʋɩ n kõ Leevi buudã wa sẽn zems tʋʋmd ning bãmb sẽn tog n maanã.»

⁶Dẽ, a Moyiis sak n deega saar-dãmbã ne niigã, la a rɩk-b lame n kõ Leevi buudã nebã.

⁷A Moyiis rɩka saar-dãmb a yiib ne niig a naas n kõ Gɛrsõ yagensã, tɩ b tõe n tall n maan b tʋʋmdã sɛk roogã pʋgẽ.

⁸La yẽnda kõo Meraari yagensã saar-dãmb a naase, la niig a nii, tɩ b tõe n maan b tʋʋmd sɛk roogã pʋgẽ. La yaa maan-kʋʋd a Aarõ biig a Itamaar n yaa bãmb taoor soaba.

⁹La a Moyiis ka kõ Kehat yagensã bũmb ye. Bala, yaa bãmb n get zĩ-sõngã pʋgẽ teedã yelle, la b rag n tog n zɩɩ te-bãmb b bãgdẽ.

¹⁰Daar ning b sẽn na n pʋdg kaam tẽn-kugrã zug n ning-a barkã, Israyɛll buudã nanambsã waa ne kũun n wa kõ Sẽn-Ka-Saabo.

¹¹Dẽ, Sẽn-Ka-Saab yeela a Moyiis yaa: «Nanambsã tog n waa ne b kũunã pʋgdg-pʋgdga, la yaa ned kam fãa ne a daare.»

¹²Pipi daarã yɩ a Aminadaab biig a Nakõ sẽn yaa Zʋʋda buudã naabã n wa. Rasem a yiibẽ daarã yɩɩ a Suwaar biig a Netaneyɛll sẽn yaa Isakaar buudã naabã n wa. Rasem a tãabẽ daarã yɩɩ a Elõ biig a Elyaab sẽn yaa Zabulõ buudã naabã n wa. Rasem a naasẽ daarã yɩɩ a Sedewʋʋr biig a Elisʋʋr sẽn yaa Rubɛn buudã naabã n wa. Rasem a nu wã daare, yɩɩ a Suurisadayi biig a Selumiyɛll sẽn yaa Simyõ buudã naabã n wa. Rasem a yoobã daare, yɩɩ a Dehuwɛll biig a Elyazaf sẽn yaa Gaad buudã naabã n wa. Rasem a yopoe wã daare, yɩ a Amiwuud biig a Elisama sẽn yaa Efrayiim buudã naabã n wa. Rasem a nii wã daare, yɩ a Pedasʋʋr biig a Gamaliyɛll sẽn yaa Manaase buudã naabã n wa. Rasem a wɛ wã daare, yɩ a Gidoni biig a Abidãn sẽn yaa Benzame buudã naabã n wa. Rasem piigã daare, yɩɩ a Amisadayi biig a Ayiyezɛɛr sẽn yaa Dan buudã naabã n wa. Rasem piig la a yembrã daare yɩɩ a Okrã biig a Pagiyɛll sẽn yaa Asɛɛr buudã naabã n wa. Rasem piig la yiibã daare, yɩɩ a Enan biig a Ayira sẽn yaa(...)

⁸⁴Ad kũun nins fãa Israyɛll nanambsã sẽn tall n wa, daar ning b sẽn pʋdg kaam tẽn-kugrã zug n ning-a barkã: Yaa wanzuri laas piig la a yiibu, la wanzuri la-bãooneg piig la a yiibu. La sãnem laas piig la a yiibu.

⁸⁵Laag fãa zɩslem rag n taa kɩlo a ye, la garem kobs-tã, la la-bãoonegã a ye fãa zɩslem tata garem kobs-yopoe, wa sẽn zems sɛk roogã pʋgẽ makdgã. Laasã fãa zɩslem taa kɩlo pisi la a naase.

⁸⁶La sãnem laag fãa zɩslem yaa garem koabga, dẽ sãnem laas piig la a yiibã fãa zɩslem yaa kɩlo la garem kobs-yi, la b pida ne tɩdare, wisdã yõogr yĩnga.

⁸⁷Maoong sẽn yõogd bugmã rũms sõor yaa lols piig la a yiibu, ne pe-raad piig la yiibu, la yʋʋmd pe-ribli piig la a yiibu, b sẽn na n maan maoong sẽn yõogd bugmã, ne bõn-koaadlã kũun nins sẽn tũudã, boees piig la a yiib b sẽn na n maan maoong yel-wẽnã sugr kũun yĩnga.

⁸⁸La maoongã rũmsã fãa sõor yɩɩ lols pisi la a naase, pe-raad pis-yoobe, boees pis-yoobe, la yʋʋmd pe-ribli pis-yoobe, b sẽn na n maan zems-n-taar maoongã. Kũun nins b sẽn tall n wa kõ tẽn-kugrã bark ningr yĩngã yɩɩ woto.

⁸⁹A Moyiis sã n mi n kẽ sɛk roogã pʋgẽ n na n gom ne Sẽn-Ka-Saabo, a rag n wʋmda Sẽn-Ka-Saab koɛɛgã sẽn yit Serubẽ-rãmb a yiibã sẽn be kaoolã koglgã limdã zugã sʋka, n gomd ne yẽnda.