Read SEBR SÕNGO, 1998 Sõdbo 9 Bible Online

Sõdbo 9 - SEBR SÕNGO, 1998 bible

Sõdbo 9

¹Israyɛll nebã sẽn wa n yi Ezɩpt tẽngã tɩ yʋʋm yiiblẽ, pipi kiuugã pʋgẽ, Sẽn-Ka-Saab goma ne a Moyiis Sinayi we-raoogẽ wã n yeel-a yaa:

²«Bɩ Israyɛll nebã maan Pak tigrã wa sẽn zems wakat ning b sẽn yãkã.

³Bɩ y maan Pak tigrã kiu-kãnga rasem piig la naasã daar zĩ-sobdo, la y maan wa sẽn zems tõod la minind nins fãa sẽn kẽed ne Pak tigrã wɛɛngẽ wã.»

⁴Dẽ, a Moyiis kõo Israyɛll nebã noor tɩ b maan Pak tigrã.

⁵La Israyɛll nebã kell n maana wa Sẽn-Ka-Saab sẽn dag n yeel a Moyiisã. Bãmb maana Pak tigrã Sinayi we-raoogẽ wã, pipi kiuugã rasem piig la a naasã daar zĩ-sobdo.

⁶La mikame tɩ neb n dag n be be n sɩɩs kũum n dẽgem b mense, n ka tõe n maan Pak tigrã badaar ye. Dẽ, nin-bãmb yikame n kẽng n tɩ yãnd a Moyiis ne a Aarõ.

⁷La bãmb yeela a Moyiis yaa: «Tõnd sɩɩsa kũum n dẽgem d mense, n ka leb n tar noor tɩ tall d kũunã n wa kõ Sẽn-Ka-Saabo, wa Israyɛll neb a taabã sẽn maandã ye. Dẽ wã, tõnd na n maana a wãna?»

⁸La a Moyiis leoka bãmb yaa: «Bɩ y yaas tɩ m sok Sẽn-Ka-Saab n ges b sẽn na n yeel tɩ bũmb ninga.»

⁹La Sẽn-Ka-Saab yeela a Moyiis yaa:

¹⁰«Wilg Israyɛll nebã tɩ Pak tigrã maaneg wakate, ned sã n be bãmb sʋkã, n sɩɩs kũum n dẽgem a menga, wall a soab sã n tog so-woko, baoosgo, a soab tog n maana Pak tigrã n waoog maam a Sẽn-Ka-Saabo. La yaa kiuug ning sẽn na n pʋgl-a wã rasem piig la naasã daar zĩ-sobdo. Bãmb tog n dɩɩ tigrã ne bur sẽn ka ning bɩlle, la ne zẽ-vã-toodo. La tõ-kãngã yaa bãmb ne b kambã la b yagensã yĩnga.

¹²La bɩ bãmb ra bas rɩɩb baa a yembr tɩ kell n vẽeg beoog ye. La bɩ b ra tol n kaoog rũngã kõbr baa a yembr me ye. Bɩ b maan Pak tigrã wa sẽn zems a rog-n-mikã.

¹³La ned sã n zãgs n ka maan Pak tigrã, n yaool n yaa yɩlemde, la a ka tog sor me, bɩ b yiis a soab Israyɛll buudã sʋka. Bala, yẽnda sẽn ka wa ne kũun n wa kõ Sẽn-Ka-Saab wa sẽn zems wakat ning b sẽn yãkã, yẽnda beegame.

¹⁴La sãamb sã n be yãmb sʋkã n dat n maan Pak tigrã, b tõe n maaname. La yaa tɩ bãmb tog n tũu Pak tigrã tõod ne a rog-n-mikã. Tõ-kãngã na n yɩɩ bũmb a yembr nebã fãa yĩnga, sã n yaa sãana, wall Israyɛll buudã neda.»

¹⁵Daar ning b sẽn ti sɛk roogã n sɛ wã, sawad-taok n wa n lud sɛk roogã zĩig ning kaoolã koglgã sẽn be a pʋgẽ wã. La zĩigã sã n sobge, sawaodgã lebgda vẽenem hal tɩ beoogã vẽege.

¹⁶La rag n yaa woto wakat fãa. Zĩigã sã n sobge, sawad-taokã luta sɛk roogã, la yʋngo, a rag n lebgda vẽenem.

¹⁷La sawad-taokã sã n wa zẽk n bas sɛk roogã, Israyɛll nebã yikdame n sɩng kẽna. La sawad-taokã sẽn tɩ yals zĩig ningã, yaa beenẽ la bãmb tiid b fu-rotã.

¹⁸Israyɛll nebã sã n na n yik n looge, rẽnd tɩ b paam Sẽn-Ka-Saab noore. La b sã n na n tɩ tilg me, rẽndame tɩ b leb n paam Sẽn-Ka-Saab noore. La sã n ka sawaodgã n wa n zẽk n bas sɛk roogã, Israyɛll nebã ka yikd ye.

¹⁹La baa sawaodgã sẽn pa sɛk roogã zug n kaoosd to-to, Israyɛll nebã sakda Sẽn-Ka-Saab noorã n ka yik ye.

²⁰La wakat ninga, sawaodgã yalsda rasem bilf bala. La ne rẽ fãa, Israyɛll nebã sakda Sẽn-Ka-Saab noor n ti b fu-rotã, la b sã n na n yik n loog me, yaa ne Sẽn-Ka-Saab noore.

²¹La wakat ning me, sawaodgã yalsda zaabr n tãag vẽkembeoogo, wall daar a yembre, bɩ yʋng a ye. La a sã n wa yik bala, Israyɛll nebã me viigda b fu-rotã n looge.

²²La baa sawadgã sã n yals sɛk roogã zug rasem a yiibu, bɩ kiuugu, wall a kaoos n yɩɩg rẽ, Israyɛll nebã ka yikd tɩ sã n ka sawaodgã n zẽk ye.

²³Yaa ne Sẽn-Ka-Saab noor la Israyɛll nebã tilgd b fu-rotã, la yaa ne bãmb noor me la b yikda. Bãmb dag n sakda bũmb nins fãa Sẽn-Ka-Saab sẽn dag n wilgd a Moyiis t'a taasd bãmbã.