Read SEBR SÕNGO, 1998 A Miise 2 Bible Online

A Miise 2 - SEBR SÕNGO, 1998 bible

A Miise 2

¹Toog bee neb nins sẽn tagsd n dat n maan wẽngã zutu. Bãmb gãe b gãagẽ n saagd wẽnga, tɩ beoog sã n vẽeg bɩ b pids-a, bãmb sẽn tar pãn-tõog n tõe n pids-a wã yĩnga.

²Bãmb sã n dat ned pʋʋg n deege, b reegd-a lame. La b sã n dat ned roog n deege, b reegd-a lame n sooge. Bãmb maanda ned ne a zak rãmb pãnga, n deegd bũmb nins b sẽn so wã.

³Yaa rẽ tɩ Sẽn-Ka-Saab yetẽ yaa: «Ade, mam segendame n na n sɩbg nin-bãmbã rãmba. Yãmb kõn tõog n põse, la y kõn leb n tõog n kẽn ne zu-zẽkr ye, bala, yaa toog wakate.»

⁴Badaare, b na n dɩka yãmb tɩ y lebg yel-bũndi, la b pʋt sũ-sãang yɩɩl yãmb wɛɛngẽ n yetẽ, «Ade, b sãama tõnd zãng fasɩ! B reesda mam nebã zĩisi! Maana a wãn tɩ b wa reesd tõnd zĩisi? B reesa tõnd pʋtã n pʋɩ kɩɩsdba!»

⁵Yaa rẽ tɩ Wẽnnaam nebã sã n wa pʋɩt b zĩisã, yãmb sʋkã ned ba a yembr kõn paam pʋɩɩr ye.

⁶B rag n zʋbsdame n yetẽ: «Da-y zʋbs-y ye, da-y zʋbs-y-yã a woto tɩ wẽnd wa tõnd paoogrã ka na n tol n sɛ ye.

⁷Zakoob yagense, rẽ yĩnga, d tog n goma a woto sɩda? Sẽn-Ka-Saab sũ-marã sɛɛme la? Bãmb minim n maanda a woto sɩda? Rẽ yĩnga, mam goamã ka gom-nood ned ning sẽn kẽnd-a tɩrlem pʋg yĩng sɩda?»

⁸Sẽn-Ka-Saab yetame: «Sẽn nan ka kaoose, yãmb yikame n lebg mam nebã bɛɛba. Bala, neb sã n yi zabr zĩigẽ n wat ne bãane, yãmb yekd-b lame n yeesd b fu-tagdã.

⁹Yãmb digda mam nebã pagba, tɩ ned kam fãa yi n bas a roog a sẽn nonge. La mam sẽn kõ b kambã waoogr ningã, yãmb yiisd-a-la wakat fãa yĩnga.

¹⁰Yik-y n loog-y tɩ yãmb ka leb n tõe n paam vʋʋsg zĩ-kãngã ye. Yãmb tʋʋm-dẽgdã yĩnga, y na n sãamame, la sãoongã na n yɩɩ kãsenga.»

¹¹Ned sã n yik a meng yĩng n yagd zĩrẽ n yeele: «Yãmb sã n kõ maam reezẽ rãam la rã-toos tɩ m yũ, mam na n togsa pĩnd-n-bãngr goam y yĩnga» yaa nin-kãng soabã n tog ne yãmba.

¹²N-yẽe, mam na n tigma yãmb fãa sẽn yaa a Zakoob yagensã, la m tigim Israyɛll bu-kellã. Mam na n tigma bãmb wa piis sẽn be yãgr pʋgẽ, la wa rũms sẽn be b wãbneg zĩigẽ. B na n leb n wʋma neb rãamd tẽngã pʋga.

¹³Sẽn pakd-a sorã na n lʋɩɩ bãmb taoore, la b na n paka sorã n yi be n looge. Bãmb dĩma yiime n be bãmb taoore, la Sẽn-Ka-Saab bee bãmb taoore.