Read SEBR SÕNGO, 1998 A Miise 5 Bible Online

A Miise 5 - SEBR SÕNGO, 1998 bible

A Miise 5

¹«Foom Betlehɛm Efrata, baa ne fo sẽn yaa buud sẽn paood Zʋʋda buud wʋsg sʋkã, mam na n kɩtame tɩ naab yi fo pʋgẽ, n soog Israyɛll nebã, La yẽnda yẽgrã sɩnga hal pĩnda, kʋdem-wẽndẽ.

²Yaa rẽ n kɩt tɩ Sẽn-Ka-Saab na n bas Israyɛll nebã, hal tɩ pag ning sẽn na n dog-a wã roge. Dẽ poore, yẽnda saam-biisã sẽn kellã, na n lebg n leba Israyɛll nebã nengẽ.

³La yẽnda na n yikame n ges a nebã yell ne Sẽn-Ka-Saab pãnga, wa pe-kɩɩm sẽn dɩlgd a piisi. Yẽnda na n gesa b yell ne Sẽn-Ka-Saab sẽn yaa yẽnda Wẽnnaamã yʋʋr sẽn tar ziirã, la yẽnda nebã nan zĩnda be. Bala, moasã, bãmb na n yɩɩ kãseng dũniyã tɛk fãa.

⁴La yẽnda na n waa ne vɩ-bãane! Asiiri nebã sã n wa yãmb tõnd tẽngã, la b kẽ d na-yiyã pʋse, tõnd na n kɩtame tɩ nanambs a yopoe, ne nin-kãsems a nii zab ne-ba.

⁵Bãmb na n sooga Asiiri tẽngã ne zabr sʋʋga, la a Nimrood tẽngã neb ne munumuni.»

⁶A Zakoob buudã neb nins sẽn kellã na yɩɩ wa meenem sẽn yit Sẽn-Ka-Saab nengẽ buud wʋsg sʋka, la wa saag sẽn madgd moodo. Bãmb ka teeg ninsaal pãnga, la b ka baood baa fɩ ninsaalb nengẽ ye.

⁷A Zakoob buudã neb nins sẽn kellã, sẽn be bu-zẽms sʋk ne buud wʋsg sʋkã na n yɩɩ wa gɩgemd sẽn be we-rũms sʋka. Bãmb na n yɩɩ wa gɩgem-poll sẽn be piis sʋka, n pɩʋʋgd n tabd n tat n gʋsda, tɩ ned ka be n na n fãag-b ye.

⁸Israyɛll nebã! Yik-y n zab-y ne y zabd-n-taasã, la y menes y bɛɛbã zãnga!

⁹Sẽn-Ka-Saab yetame: «Ade, badaare, mam na n menesa y wiidã, la m sãam y saar-dãmbã.

¹⁰Mam na n menesa y soolmã tẽmsã, la m lub y pãng zĩisã fãa.

¹¹Mam na n menesa y tɩtã tʋʋma, la bag-bʋgd kõn leb n zĩnd yãmb sʋk ye.

¹²M na n menesa y bõn-naandsã fãa, la y kug-vigindsã. Yãmb kõn leb n wõgemd n waoog bũmb nins yãmb nus sẽn naanã ye.

¹³Mam na n vigsa a Aseera ra-lugdsã, la m sãam y tẽmsã.

¹⁴Mam na n doka m sũurã ne bu-zẽms nins sẽn ka kelg maamã ne sũ-yikri, la sũ-puug-kãsenga.»