Read SEBR SÕNGO, 1998 A Miise 6 Bible Online

A Miise 6 - SEBR SÕNGO, 1998 bible

A Miise 6

¹M kotame tɩ y kelg Sẽn-Ka-Saab sẽn yeta: «Togs-y yẽgengã võore, tɩ tãmsã ne kunkubã kelge!»

²Tãmse! Kelg-y Sẽn-Ka-Saab sẽn bʋʋd ne b nebã. Yãmb sẽn yaa tẽngã yẽbgr sẽn be wakat fãa wã, kelg-y-yã! Bala, maam a Sẽn-Ka-Saab rat n bʋʋ ne m nebã, la m tara yell ne Israyɛlle.

³Mam nebã, m maan-y-la bõe? M nams-y-la ne bõe? Leok-y-ma!

⁴Bala, mam yiisa yãmb Ezɩpt tẽnga. Mam fãaga yãmb y yembdã pʋga. Mam tʋma a Moyiis ne a Aarõ, la a Miryam tɩ b wa lʋɩ yãmb taoore.

⁵Mam nebã, m kotame tɩ y tẽeg Moaab rĩm a Balak sẽn dag n sagl a Balaam t'a maan bũmb ningã, la a Bewoor biig a Balaam sẽn leok yẽnda to-to wã. Tẽeg-y bũmb nins sẽn maan yãmb y sẽn wa n na n pɩʋʋg Sitim n kẽng Gilgallã yelle, tɩ yãmb tõe n bãng tɩ maam a Sẽn-Ka-Saab sẽn maan bũmb ninsã zemsame.

⁶Bõe la mam na n tall n kẽng Sẽn-Ka-Saab taoore? M na n talla bõe n tɩ wõgemd Wẽnnaam sẽn be saasẽ wã taoore? Mam na n waa bãmb taoor ne maand sẽn yõogd bugum bɩ? Bɩ m na n waa bãmb taoor ne nag-bi sẽn tar yʋʋmde?

⁷Mam sã n kõ Sẽn-Ka-Saab pe-raad tusa, wall m kõ-b kaam sẽn yaa wʋsg wa ko-zoetem, bãmb sũur na n yɩɩ noog bɩ? Mam na n dɩka m bi-rẽeng n kõ-b n paam m beegrã sugr bɩ? Mam na n dɩka m bi-roak n kõ-b n paam m yel-wẽnã sugri bɩ?

⁸Ninsaala, b kɩtame tɩ fo bãng sẽn yaa sõamã, Sẽn-Ka-Saab sẽn dat tɩ f maan bũmb ning bala, yaa tɩ f maan sẽn yaa tɩrga, la f nong maan-neere, la f kẽn ne f Wẽnnaamã ne sik-m-menga.

⁹Sẽn-Ka-Saab koɛɛg moonda tẽnga pʋgẽ, sẽn tar-b yamã zoeta bãmb yʋʋrã. Kelg-y sɩbgr koɛɛga

¹⁰Dẽ yĩnga, mam na n sakame tɩ nin-wẽnsã tigsd laog b sẽn paam ne zãmbã, la bãmb tar zãmb-makdsã n magd tɩ yikd mam sũurã?

¹¹Mam tõe n kõ neb nins sẽn tar-b zãmb makdsã bʋʋm sɩda?

¹²Tẽngã arzegs rãmb maanda wẽnga, tẽnga neb yagda zĩrẽ, bãmb noyã gomda belgr goamã.

¹³Rẽ n kɩte, tɩ mam me na n sɩbg yãmb tɩ y namse, la m sãam yãmb y yel-wẽnã yĩnga.

¹⁴Yãmb na n dɩɩme, la y kõn tɩg ye, kom na n ket n tara yãmba! Yamb na n kẽgsame, la y kõn yã zĩig n bĩng ye, la bũmb ning fo sẽn bĩngã, mam na n kɩtame tɩ b zab ne yãmb n deeg-a.

¹⁵Yãmb na n bʋdame, la y kõn kẽeb ye, y na n wõda oliiv kaam, la y kõn paam-a n zɛ ye, y na n wẽka reezẽ biis koom, la kõn yũ a reezẽ rãamã ye.

¹⁶Nebã sakda a Omri no-tũudsã, la b rɩkd a Akaab roogã rãmb manesmã fãa, tɩ yãmb sakd bãmb saglsã. Woto yĩnga, mam na n basame tɩ y sãame, n kɩt tɩ y lebg bɛɛb laada, la mam nebã paoogr na n lʋɩɩ yãmb zugu.