Read SEBR SÕNGO, 1998 A Nahum 2 Bible Online

A Nahum 2 - SEBR SÕNGO, 1998 bible

A Nahum 2

¹Zʋʋda nebã, koe-toagsd n be tãmsã zut n watẽ. Yẽnda wata ne koe-noogo, la laafɩ koɛɛga! Dẽ yĩngã, bɩ y maan y tigã, la y pids y pʋlendã! Bala, sãamdã ka na n leb n pɩʋʋg yãmb sʋk ye. Yẽnda pãngã sɛɛ zãnga.

²Niniiv rãmba, tãb-biis n wat n na n zab ne yãmba, Bɩ y gũ y tẽngã lalse, la y gũ y soayã! Sẽbg-y y sɛɛga, la y paam daood n yɩ gãndaado.

³Bala, Sẽn-Ka-Saab lebsda a Zakoob yagensã b waoogrã, la b lebsd Israyɛll a ziirã. Bala, fãadbã rag n fãa bãmba, n sãam bãmb wa b sẽn kao wila.

⁴Tãb-biisã gãnd yaa miidu, Gãndaadã yera fu-miidu. B saar-dãmbã b sẽn segl zabrã yĩngã pãrda wa bugum, tɩ b kãnã zẽgsdẽ.

⁵Saar-dãmbã zoeta soayã zut ne tʋʋlem, n pɩʋʋmd zĩisã fãa wa bug-vɩlense, la b zoeta ne tʋʋlem wa sa-yãgbo

⁶Niniiv rĩmã tigsda a tãb-bi-gãndaadã, la b kẽndame n lagsdẽ. Zab-zabdbã zoet n wata tẽngã lalg sẽnẽ, la b soonda lalgã poore.

⁷Tẽngã rignoy nins sẽn tees kʋɩlsã sẽnẽ wã pagsame, la na-yirã neb pɛleng yɩkame tɩ b rigda.

⁸B rɩka wẽn-poakã naandã[1] n looge, t'a tʋmtʋmd-pogsã wũusd wa manwala, n pĩisd b yãado.

⁹Niniiv tẽngã lebga wa ko-baoor sẽn wurg t'a koomã raagdẽ, B boonda tãb-biisã sẽn zoetã n yetẽ: «Yals-y-yã! Yals-y-yã!» La bãmb ned ba a yembr ka wẽnemded a poorẽ ye.

¹⁰B rag n yetame: «Zɛ-y wanzuri wã! Zɛ-y sãnemã!» Tẽngã laogã ka tar tɛk ye. Laog buud toor-toor sẽn tar yõod bee be.

¹¹Zɛɛbo! Wãabo! Sãoongo! Nebã fãa raood sɛɛme, tɩ b rũmã pãbd taaba. Bãmb digda ne rabeem, tɩ b nensã bondge.

¹²Gɩgma wã gãag zĩig bee yɛ? Gɩgem-poalã sẽn dag n paamd b rɩɩb ziig ningã bee yɛ? Gɩgem-daoogã ne gɩgem-yãangã sã n da yi n bas gɩgem-bi wã, ned ka be n na n saag n sɩɩs-b ye.

¹³Gɩgem-daoogã rag n yit n yõgd n gʋsdame, n wat n kõt gɩgem-yãangã ne gɩgem-bi wã, gɩgemdã gãag zĩig pida ne rũms a sẽn yõg nemdo.

¹⁴Saasẽ-Pãng-Soabã yetame: «Niniiv tẽnga, mam na n zaba ne foom! Mam na n ninga fo saar-dãmbã bugum, la fo kom-bɩɩsã sẽn yaa wa gɩgem-poalã na n paa tãp pʋgẽ. Fo kõn leb n tõog n fã dũniyã nebã paoong yɛs ye. La b kõn leb n wʋm fo koe-toagsdbã rãamd ye.»