Read SEBR SÕNGO, 1998 A Sofoni 1 Bible Online

A Sofoni 1 - SEBR SÕNGO, 1998 bible

A Sofoni 1

¹Sẽn-Ka-Saab goma ne a Sofoni, a Amo biig a Zoziyaas sẽn wa n dɩt Zʋʋda naamã wakate. A Sofoni yaa a Kusi biiga t'a Kusi yaa a Gedaliya biiga, t'a Gedaliya yaa a Amariya biiga, t'a Amariya yaa a Ezekɩyaas biiga.

²Sẽn-Ka-Saab yeelame yaa: «Ade, mam na n sãama bõn-vɩɩs nins fãa sẽn be dũniyã zugã.

³Mam na n sãama ninsaalbã ne rũmsã fãa, la m sãam liuuli wã sẽn yɩgd yĩngrã fãa, ne zĩmã sẽn be ko-kãsengã pʋgã, mam na n sãama nin-wẽnsã ne b tʋʋm-beedã fãa, la m menes ninsaalbã fãa dũniyã zugu. Yaa maam a Sẽn-Ka-Saab n yeele!»

⁴Mam na n tẽega m nugã n sɩbg Zʋʋda ne Zeruzalɛm nebã, la m na n menesa bũmb ning sẽn ket zĩ-kãngã pʋgẽ, n yaa wẽn-naandg a Baall dẽndã, la m menes a Baall tʋmtʋmdbã sẽn yaa a maan-kʋʋdbã.

⁵Mam na n menesa neb nins fãa sẽn dʋʋd rot zut n wõgemded n waoogd yĩngr ãdsã, la m menes neb nins sẽn wõgemded maam a Sẽn-Ka-Saab taoore, n yaool n wẽend ne tẽn-kugr a Milkom yʋʋrã.

⁶Mam na n menesa neb nins sẽn basd maam a Sẽn-Ka-Saabã, ne neb nins sẽn ka baood maamã la sẽn ka baood-b mam saglgã.

⁷Sĩnd-y sɩɩ Wẽnnaam Sẽn-Ka-Saabã taoore, bala, bãmb daarã kolgame! Sẽn-Ka-Saab seglame n na n maan maoongo, la bãmb welga neb nins bãmb sẽn boolã toore.

⁸Sẽn-Ka-Saab yeelame: Mam maoongã daare, mam na n sɩbga nanambsã, ne na-biisã, la neb nins fãa sẽn yer bu-zẽms futã.

⁹Badaare, mam na n sɩbga neb nins sẽn gãndgd Wẽnd doogã rigno-koakã,[1] la neb nins sẽn pidsd b soaalã roog ne wẽng la zãmbã.

¹⁰Maam a Sẽn-Ka-Saab yetame: «Badaare, b na n wʋma kelems sẽn yit dignoor ning b sẽn boond tɩ Zĩm Dignoorã sẽnẽ, la b wʋm wiisg sẽn yit Sag-paallã pʋgẽ, ne bʋr-kãseng sẽn yit tãmsã sẽnẽ.

¹¹Maktɛɛs tẽng nebã, wiis-y-yã! Bala, Kana tẽngã neb na n sãama zãnga, la lɛɛbdbã fãa na n kiime.

¹²Badaare, mam na n widga fɩtl n vɛɛs Zeruzalɛm, la m na n sɩbga neb nins sẽn zĩ-b bãane, n tagsdẽ tɩ Sẽn-Ka-Saab ka tõe n maan sõama bɩ wẽngã.

¹³B na n zɛɛ bãmb paoongã, la b sãam b rotã, bãmb meta roto, la b ka na n kẽ b pʋsẽ ye, bãmb senda reezẽ tɩɩse, la b ka na n yũ b reezẽ rãamã ye.»

¹⁴Sẽn-Ka-Saab daarã sẽn yaa ra-kãsengã kolgame, a kolgame, la a wata tao-tao! Sẽn-Ka-Saab daarã rãamd sã n wa zẽkdẽ, baa ne gãndaadã na n wiisa ne sũ-toogo!

¹⁵Daarã na n yɩɩ sũ-puugr daare, a na n yɩɩ toog la yel-pakr daare, namsg la sãoong daare, yaa lik la lik bida daare, sawad-taok la lik tuu daare.

¹⁶Badaare, tãb-biis na n peeba bardo, n kaas zabr kaasgo, n zab ne tẽms nins sẽn gũbg ne lalsã, la b zab ne b lalsã gõdsẽ gãs-bɛdã.

¹⁷Mam na n kẽesa ninsaalbã yel-pakr pʋga, bãmb na n kẽna wa zoense, bala, bãmb beega Sẽn-Ka-Saabo. B zɩɩmã na n daaga zĩig zãng wa tom sẽn yɛdge, la bãmb yãadã na n yʋlma zĩig zãng wa sagdo.

¹⁸Bãmb wanzuri wã ne b sãnemã, ka na n tõog n fãag-b Sẽn-Ka-Saab sũ-puugrã daar ye. Sẽn-Ka-Saab sũ-yikrã bugum na n dɩɩ dũniyã fãa, bala, na n yɩɩ to-kãseng daare, la Sẽn-Ka-Saab na n sãama dũniyã nebã zãnga.