Read SEBR SÕNGO, 1998 A Sofoni 2 Bible Online

A Sofoni 2 - SEBR SÕNGO, 1998 bible

A Sofoni 2

¹Buud sẽn ka zoet yãnde, tigm-y taab n tagse,

²sẽn deng yam-yãkrã daar sẽn na n wa ling yãmbã, sẽn deng daarã sẽn na n wa loog wa sobg sẽn dɩkd wudgu, la sẽn deng Sẽn-Ka-Saab sũ-puug-kãsengã daar sẽn na n wa sig yãmb zugã, ne sẽn deng Sẽn-Ka-Saab sũ-puugrã daar sẽn na n wa sig yãmb zugã!

³Bɩ yãmb a sik-m-mens rãmbã fãa sẽn be tẽngã pʋgã bao Sẽn-Ka-Saabo. Yãmb dãmb sẽn sakd noy nins Sẽn-Ka-Saab sẽn luglã, bao-y tɩrlem, la y bao sik-m-menga, tɩ daar ninga, y na paam n põs Sẽn-Ka-Saab sũ-puugrã daare.

⁴Bala, Gaaza tẽngã na n lebga vɩʋʋgo, b na n sãama Askalon tẽngã, la b rig Asdood nebã ne wĩnto-sʋk n yiisi, la b wã Ekron tẽngã.

⁵Kerɛt buudã neb sẽn be ko-kãsengã noorã, yãmb na paam toogo! Ad Sẽn-Ka-Saab sẽn yet yãmb wɛɛngẽ: «Kana sẽn yaa Filistẽ-dãmbã tẽnga, mam na n sãama foom, la ned kõn leb n zĩnd f pʋgẽ ye.

⁶Soolem ning sẽn be ko-kãsengã noorã, na n tekame n lebg yamd zĩiga, la pe-kɩɩmbã rũms wãbneg zĩiga, la yãg zĩis piisã yĩnga.

⁷Soolem-kãng na n lebga Zʋʋda roogã bu-kellã rẽnda. Bãmb na n tɩ wãbna b rũmsã beenẽ, la zaabre, bãmb na n tɩ gãanda Askalon rotã pʋse. Bala, Sẽn-Ka-Saab sẽn yaa bãmb Wẽnnaamã na n wa n sõnga bãmb n lebs n maneg b yellã.»

⁸Mam wʋma tʋy nins Moaab nebã sẽn tʋ mam nebã, la paoogr ningã Amo nebã sẽn paoog bãmbã. Bãmb paoogda mam nebã, la b reeg b zĩisã n sooge.

⁹Rẽ kɩtame tɩ maam a Saasẽ-Pãng-Soabã, sẽn yaa Israyɛll Wẽnnaamã sẽn vɩ wã wẽend n yetẽ: «Ade, Moaab na n lebga wa Sodom, la Amo tẽngã na n lebga wa Gomoore. Tẽngã na n pida ne gõose, la a lebg yamsem zĩisi, b na n sãam-a-la wakat fãa yĩnga. Mam nebã bu-kellã na n zɛɛ bãmba, la b reeg b tẽngã n sooge.

¹⁰Bõn-kãng na n paama bãmb b wuk-m-mengã yĩnga, bala, bãmb tʋʋsa Saasẽ-Pãng-Soabã nebã, la b paoog-ba.

¹¹Sẽn-Ka-Saab ka na n zoe bãmb nimbãaneg ye, bãmb na n sãama dũniyã fãa wẽnnaam-dãmbã, la buud toay-toayã tẽms nins fãa koom sẽn gũbgã neb na n pa b sẽn beẽ wã n wõgemd n waoog Sẽn-Ka-Saabo.»

¹²Yãmb a Kuus tẽng nebã, mam na n kɩtame tɩ yãmb pa tãpẽ.

¹³Sẽn-Ka-Saab na n tẽega b nugã n tees rɩtg kɩrengã la b na n menesa Asiiri tẽngã, bãmb na n sãama Niniiv tẽngã, la tẽngã na n lebga koɛɛng wa raoogo.

¹⁴Tẽnga fãa na n yɩɩ yir rũms zĩiga, la we-rũms buud toor-toor na n zĩnda be. Bakardã ne yʋgempɛlã na n kẽe ra-lugdsã pugli pʋsẽ n gãande. B na n wʋma viut yãbr rotã võyẽ, la sẽn sɩng ne tẽngã rignoorã fãa lebga raboogo, bala, b na n luba sɛɛdr tɩɩsã ra-lugdsã fãa.

¹⁵Tẽng ning sũur sẽn dag n noom ne-a mengã, n tagsdẽ tɩ bũmb ka tõe n maan yẽnda wã, n yetẽ tɩ ned ka be sẽn zem yẽnda wã, ade, yẽnda lebga raboogo, la we-rũms gãag zĩiga, ned ning fãa sẽn loogd be, na n fɩɩlame la a mobg a noore.