Read SEBR SÕNGO, 1998 A Sofoni 3 Bible Online

A Sofoni 3 - SEBR SÕNGO, 1998 bible

A Sofoni 3

¹Toog bee tẽng ning sẽn yaa a tõatã zugu, bala, yẽnda nebã rẽgma b mense, la b maand taab pãnga!

²Bãmb ka sak n kelg Sẽn-Ka-Saabo, la b ka sak n deeg b remsgã ye. Bãmb ka sak n teeg Sẽn-Ka-Saab ye. La b ka kolg b Wẽnnaamã ye.

³Bãmb nanambsã sẽn be b sʋkã wẽnda wa gɩgmã sẽn kelemde, la b bʋ-kaoodbã yaa wa zaabr rigd-n-yĩidsi, bãmb ka yõkd n wãb n kell beoog yĩng ye.

⁴Bãmb no-rɛɛsdbã yaa bi-beese, la zãmb dãmba, bãmb maan-kʋʋdbã rẽgemda bũmb nins sẽn welg toor Wẽnnaam yĩngã, la b kɩɩsd tõogã.

⁵La Sẽn-Ka-Saab yaool n bee tẽngã pʋga, n yaa tɩrlem soaba, la b ka maand sẽn ka zems ye. Yibeoog fãa, bãmb pukda b tɩrlmã n ka basdẽ ye. La nin-wẽng ka mi yãnd ye.

⁶Sẽn-Ka-Saab yetame: «Mam menesa soolem wʋsgo, mam sãama b lalsã gõdsẽ gãsdã, mam kɩtame tɩ b soayã lebg vɩɩdo, tɩ ned ka leb n kẽnd soayã zut ye. B tẽmsã fãa sãamame tɩ ned ka leb n be b pʋsẽ ye.

⁷Mam dag n yetame tɩ Zeruzalɛm nebã na n zoeẽ-la maam, la b sak m demsgã, woto, mam dag n kõn menesẽ-b ye. La wakat fãa mam sã n sɩbg-ba, b ket n kẽngda taoor ne tʋʋm-wẽnsã maanego.»

⁸Dẽ wã, Sẽn-Ka-Saab yetame: «Beneere, gũ-y daar ning mam sẽn na n yik n bʋ ne yãmbã, bala, mam yãka yam n na n tigim bu-zẽmsã, la m tigim soolem toay-toayã, n dok m sũur ne-ba, tɩ m sũ-kãbrã rɩ-ba. Bala, mam sũ-puugrã bugum na n dɩɩ dũniyã zãnga.»

⁹«Dẽ, mam na n yɩlga buudã fãa nobɩmsã, tɩ b fãa tõe n waoog maam a Sẽn-Ka-Saab ne yam a yembre.

¹⁰Baa mam neb nins fãa sẽn sãeeg n be Kuus kʋɩlsã rʋʋndã na n waa ne kũuni, n wa waoog maam.»

¹¹«Badaare, mam nebã! Yãnd kõn leb n yõk yãmba, tʋʋm nins yãmb sẽn maan n kɩɩs maamã yĩng ye. Bala, wakat-kãnga, mam na n yiisa wuk-m-mens rãmbã, dẽ, fo kõn leb n maan f tɩtaamã mam tãn-sõngã zug ye.

¹²Mam na n basa naong rãmbã, ne ka-pãens rãmbã yãmb sʋka, la bãmb na n paama gũudum maam a Sẽn-Ka-Saab yʋʋrã yĩnga.

¹³La Israyɛll nebã bu-kellã kõn leb n maan sẽn yaa kegre, la b kõn leb n yag zĩrẽ ye. Bãmb kõn leb n gom n tudg taab ye. Bãmb na n tõog n dɩɩme la b gũsi, tɩ ned ba a ye ka be sẽn na n yɛɛs-b ye.»

¹⁴Sɩyõ tẽngã nebã, kils-y-yã! Israyɛll nebã, kaas-y ne sũ-noogo! Zeruzalɛm nebã, kɩdm-y ne y sũyã fãa!

¹⁵Bala, Sẽn-Ka-Saab ka na n leb n sɩbg yãmb ye. Bãmb kɩtame tɩ y bɛɛbã toeem sore. Sẽn-Ka-Saab sẽn yaa Israyɛll dĩmã bee ne yãmba, yãmb kõn leb n yɛɛs tɩ toog na n wa paam-y ye.

¹⁶Badaare, b na n yeelame: «Zeruzalɛm nebã, da-y zoe-y rabeem ye. Sɩyõ nebã, da-y boog-y raood ye!»

¹⁷Bala, Sẽn-Ka-Saab sẽn yaa yãmb Wẽnnaamã bee ne yãmba, b yaa gãndaoog sẽn fãagd yãmba, yãmb na n yɩɩ bãmb sũ-noogo. La bãmb sẽn nong yãmbã yĩnga, b na n sĩnda b noore, bãmb na n zẽka b koɛɛg n kaas ne kɩdeng yãmb wɛɛngẽ.

¹⁸Zeruzalɛm tẽnga, mam na n leb n tigma neb nins b sẽn yiis fo nengẽ n kẽng zĩ-zãrgẽ, tɩ b ka leb n tõe n maan sũ-noogã. La m yiis yãndã sẽn dag n be b zugã.

¹⁹Wakat-kãnga, mam na n sɩbga neb nins sẽn namsd yãmbã. Mam na n tɩpa sẽn pogl-bã, la m lebg n tall neb nins b sẽn yõg n kẽng tẽn-zẽmsã n wa, n kɩt tɩ b paam waoogr la yʋ-zẽk dũniyã zĩig ning fãa b sẽn dag n paoogd bãmbã.

²⁰Wakat-kãnga, mam na n tall-y lame n lebg n wa, Wakat-kãnga, mam na n tigm-y lame. Bala, mam na n kɩtame tɩ yãmb yʋʋrã yi, la m kɩt tɩ y paam waoogr dũniyã buud fãa sʋka. Wakat ning mam sẽn na n lebs yãmb y zĩigẽ wã, yãmb mensã nin na n yãndame. Yaa maam a Sẽn-Ka-Saab n yeele.