Read SEBR SÕNGO, 1998 A Aaze 1 Bible Online

A Aaze 1 - SEBR SÕNGO, 1998 bible

A Aaze 1

¹Rĩm a Daryʋʋs sẽn deeg naam tɩ yʋʋm yiiblẽ, kiuug a yoob soabã pipi daare, Sẽn-Ka-Saab tũnuga b no-rɛɛs a Aaze n gom ne a Saltiyɛll biig a Zorobabɛll sẽn dag n yaa Zʋʋda soolem gʋvɛrneerã, ne a Yehosadak biig a Zozoe sẽn dag n yaa maan-kʋʋr kãsmã. B yeela bãmb yaa:

²«Saasẽ-Pãng-Soabã yetame: ‹Nin-bãmbã yetame: Wakatã nan ka ta ye. Wakat ning b sẽn segd n lebs n me Sẽn-Ka-Saab roogã nan ka ta ye.› »

³Rẽ n kɩte, tɩ Sẽn-Ka-Saab tũnug b no-rɛɛs a Aaze n gom ne bãmb n yeele:

⁴«Rẽ yĩnga, zemsame tɩ yãmb be ro-neeb pʋsẽ, tɩ mam doogã yaool n lʋɩ zãnga?»

⁵Moasã, Saasẽ-Pãng-Soabã yetame yaa: «Tags-y n ges-y yãmb sẽn yaa-a soabã.

⁶Yãmb bʋda wʋsgo, la y tigsa bilfu. Yãmb dɩtame, la y ka tɩgd ye. Yãmb yũudame, la y nens ka yilimd ye. Yãmb yera futu, la y waoodã ka yit ye. La sẽn dɩkd-a yaood sã n deeg a ligdi, yaa wa a sui-a-la kor-wurung pʋga.»

⁷Ade, maam a Saasẽ-Pãng-Soabã yetame: «Tags-y n ges-y yãmb sẽn yaa-a soabã.

⁸Rʋ-y tãngã zug n tɩ bao raad n lebg n wa me m doogã, tɩ m sũur yɩ noog ne-a tɩ m wilg m ziirã beenẽ. Yaa maam a Sẽn-Ka-Saab n yeele.»

⁹Yãmb dag n tẽeda wʋsgo, la y wa n yasa ne bilfu, tɩ y wʋk rẽndã n kuili, la mam fʋʋs-a lame t'a looge. Bõe yĩng tɩ m maan a woto? Yaa maam a Saasẽ-Pãng-Soabã n sokde. Yaa mam doogã sẽn lʋɩ, tɩ yãmb ned kam fãa bas-a, n bas n get a meng roog yellã yĩnga.

¹⁰Yaa rẽ n kɩte, tɩ saag ka leb n niida, tɩ tẽn-gãongã bõn-koaadl ka womd ye.

¹¹Mam kɩtame tɩ war kẽ tẽngã, tɩ tãmsã zut kʋɩ, tɩ bɩle wã, ne reezẽ rãamã la kaamã sɛ, la m kɩt tɩ tẽn-gãongã bõn-koaadl kʋɩ, tɩ ninsaalb ne rũms namsdẽ, la y tʋʋmã fãa yɩɩ zaalem.

¹²A Saltiyɛll biig a Zorobabɛlle, ne a Yehosadak biig a Zozoe sẽn yaa maan-kʋʋr kãsmã, la neb a taabã fãa kelga Sẽn-Ka-Saab sẽn yaa bãmb Wẽnnaamã koɛɛga, wa sẽn zems no-rɛɛs a Aaze sẽn togsã, la wa sẽn zems Sẽn-Ka-Saab sẽn yaa bãmb Wẽnnaamã sẽn tʋm-a t'a togsã. La rabeem yõka nebã Sẽn-Ka-Saab taoore.

¹³Sẽn-Ka-Saab koe-toagsd a Aaze goma ne nebã n yeel-b tɩ Sẽn-Ka-Saab yetame: «Mam bee ne yãmba. Yaa maam a Sẽn-Ka-Saab n yeele!»

¹⁴Sẽn-Ka-Saab neka a Saltiyɛll biig a Zorobabɛll sẽn yaa Zʋʋda gʋvɛrneerã yam, la b nek a Yehosadak biig a Zozoe sẽn yaa maan-kʋʋr kãsmã yam, ne neb a taabã fãa. Bãmb wa n sɩnga Saasẽ-Pãng-Soabã sẽn yaa bãmb Wẽnnaamã roog meeb tʋʋmde.

¹⁵Yaa rĩm a Daryʋʋs sẽn deeg a naamã tɩ yʋʋm yiiblẽ, kiuug a yoob soabã rasem pisi la a naas daare.