Read SEBR SÕNGO, 1998 A Aaze 2 Bible Online

A Aaze 2 - SEBR SÕNGO, 1998 bible

A Aaze 2

¹Kiuug a yopoe soabã rasem pisi la a yembrã daare, Sẽn-Ka-Saab goma ne b no-rɛɛs a Aaze n yeel-a yaa:

²«Mam kot-f lame tɩ f gom ne a Saltiyɛll biig a Zorobabɛll sẽn yaa Zʋʋda gʋvɛrneerã, ne a Yehosadak biig a Zozoe sẽn yaa maan-kʋʋr kãsmã, ne neb a taabã n yeel-b yaa:

³Yãmb sʋkã nin-bʋg n dag n yãnd Wẽnnaam doogã sẽn dag n tar ziir ningã? La yãmb sẽn get-a rũndã wã, a yaa a wãn-wãna? M mi tɩ yãmb yetame t'a ka baa fɩ yãmb nifẽ la?»

⁴Moasã, maam a Sẽn-Ka-Saab yetame: «Zorobabɛlle, paam daoodo! A Yehosadak biig a Zozoe sẽn yaa maan-kʋʋr kãsmã, paam daoodo! Yãmb a tẽngã gill fãa nebã, paam-y raoodo! Yaa maam a Sẽn-Ka-Saab n yeele. Tʋm-y-yã! Bala, mam bee ne yãmba, yaa maam a Saasẽ-Pãng-Soabã n yeele.

⁵Yãmb sẽn wa n yit Ezɩpt tẽngã, mam kõo yãmb m gomdã ne m sɩɩgã sẽn be yãmb sʋkã. Da zoe-y rabeem ye!»

⁶Bala, maam a Saasẽ-Pãng-Soabã yetame: «Keta bilfu, keta bilf bala, tɩ mam kɩt tɩ saasẽ la tẽng rigimdi, la m kɩt tɩ ko-kãsengã ne tẽn-gãongã rigimdi.

⁷Mam na n kɩtame tɩ tẽmsã fãa zũndgi. B na n wʋka laog nins fãa sẽn tar yõodã n wa, la mam na n kɩtame tɩ ro-kãngã pid ne ziiri. Yaa maam a Saasẽ-Pãng-Soabã n yeele.

⁸Wanzuri wã yaa maam n so, la sãnemã me yaa maam n so. Yaa maam a Saasẽ-Pãng-Soabã n yeele.»

⁹Ro-kãngã sẽn na n paam ziir ningã, na n yɩɩga a sẽn dag n tar pĩndã. Maam a Saasẽ-Pãng-Soabã n yeele. Mam na n kɩtame tɩ vɩ-bãan zĩnd zĩ-kãngã. Maam a Saasẽ-Pãng-Soabã n yeele.

¹⁰Rĩm a Daryʋʋs sẽn deeg a naamã tɩ yʋʋm yiiblẽ, kiuug a wɛ wã rasem pisi la a naasã daare, Sẽn-Ka-Saab goma ne no-rɛɛs a Aaze n yeele:

¹¹«Maam a Saasẽ-Pãng-Soabã yetame: ‹M kotame tɩ f sok maan-kʋʋdbã a woto: Ned sã n dɩk maoong nemd n ning a fuugẽ,

¹²ned sã n dɩk maoong nemd n sẽbg a fuug noorẽ, t'a fuugã noor sɩɩs buri, rɩɩbo, reezẽ rãam, kaam, wall sẽn yaa rɩɩb ning fãa, rẽ yĩnga, bõn-kãng me na n lebga bũmb sẽn welg toor bɩ?» La maan-kʋʋdbã leokame tɩ ayo!

¹³Dẽ, a Aaze yeelame yaa: «La ned sã n sɩɩs kũum n dẽgem a menga, n sɩɩs bũmb a yembr bõn-kãensã sʋka, bõn-kãng lebga rẽgd bɩ?» La maan-kʋʋdbã leokame yaa: «N-yẽe, a lebga bõn-dẽgdo.»

¹⁴Dẽ, a Aaze yeelame yaa: «Nin-bãmbã me yaa woto, nimbuiidã sẽn yas mam taoorã me yaa a woto. Maam a Sẽn-Ka-Saab n yeele. Bãmb nusã tʋʋm fãa me yaa a woto. B sẽn wat ne bũmb ning tẽn-kugrẽ wã yaa bõn-dẽgdo.»

¹⁵Mam kot-y lame tɩ y maan gũusg moasã. Maag-y y meng n ges bũmb ning sẽn na n maan sẽn sɩng ne rũndã daarã, la wakat sẽn watã. Sẽn deng b sẽn na n dɩk tãn-koeemd n dogl a to zug Wẽnnaam doogã meeb wɛɛngẽ,

¹⁶b sã n dag n tog n paam ka-bɛɛl peoog pisi, b wat n yasa ne ka-bɛɛl peoog piiga. B sã n kẽng reezẽ rãam wẽkr n tẽed yʋy pis-nu, b wat n yasa ne yʋy pisi bala.

¹⁷Mam kɩtame tɩ wãoongo, gãnem ne la sapɩlem sãam y koodã, tɩ b zelge, tɩ yãmb nusã tʋʋm lebg zaalem, la yãmb baas n ka lebg n wa mam nengẽ ye. Yaa maam a Sẽn-Ka-Saab n yeele.

¹⁸Mam kot-y lame tɩ y maan gũusg ne bũmb ning sẽn na n maan sẽn sɩng ne rũndã daarã, la wakat sẽn watã. Sẽn sɩng ne kiuug a wɛ soabã rasem pisi la a naasã daare, sẽn sɩng ne Wẽnnaam doogã yẽbgr daare, bɩ y gũus n gese!

¹⁹Rẽ yĩnga, kood leb n keta baoorẽ sɩda? Baa reezẽ tɩɩsã, kankamsã, gernaad tɩɩsã ne oliiv tɩɩsã ka tol n wom ye. Sẽn sɩng ne rũndã, mam na n leb n ninga barka.

²⁰Kiuugã rasem pisi la a naasã daare, Sẽn-Ka-Saab leb n goma ne a Aaze naoor a yiibẽ soab n yeele:

²¹«Togs Zʋʋda gʋvɛrneer a Zorobabɛll tɩ mam na n kɩtame tɩ saasẽ la tẽng rigimdi.

²²Mam na n luba soolem-dãmbã nanambse. Mam na n sãama bu-zẽmsã soolem-dãmbã pãnga. Mam na n luba saar-dãmb ne b wed-rʋʋdba, n kɩt tɩ wiid ne b wed-rʋʋdb rʋʋg tẽnga. Ned kam fãa na n wẽneg n kʋ a ba-biig ne zabr sʋʋga.»

²³Maam a Saasẽ-Pãng-Soabã yetame: «Badaare, mam na n dɩka foom a Zorobabɛll sẽn yaa mam tʋmtʋmd a Saltiyɛll biigã. Maam a Sẽn-Ka-Saab n yeele, tɩ m na n dɩka foom n kɩt tɩ f yɩ nug-tikr bãnde, bala, yaa foom la mam yãk yã. Maam a Saasẽ-Pãng-Soabã n yeele.»