Read SEBR SÕNGO, 1998 A Zakari 11 Bible Online

A Zakari 11 - SEBR SÕNGO, 1998 bible

A Zakari 11

¹Libã tẽnga, pak f kʋɩlemse, tɩ bugum dɩ f sɛɛdr tɩɩsã.

²Sɩprɛs tɩɩga, yãbe, bala, sɛɛdr tɩɩgã lʋɩɩme, tɩ-bɛdã sãamame. Basã sɛn tɩɩse, yãb-y-yã, Bala, b kɛɛ kãgr ning ned sẽn dag n ka tõe n kẽ a pʋgẽ wã!

³B wʋmda pe-kɩɩmbã yãbre, bala, b sãama bãmb ra-sãndã. B wʋmda gɩgem-poalã yãbre, bala, b luba Zʋrdẽ kʋɩlgã kãgrã.

⁴Sẽn-Ka-Saab sẽn yaa mam Wẽnnaamã yeelame yaa: «Kɩɩm piis nins b sẽn tog n kʋ wã,

⁵Neb nins sẽn daad bãmbã kʋʋda bãmb tɩ ned ka sokdẽ ye. Neb nins sẽn koosd bãmbã ned kam fãa yetame: ‹Bɩ Sẽn-Ka-Saab paam pẽgre, bala, mam lebga arzɛk soaba!› La sẽn kɩɩmd-b piisã ned ba a yembr ka zoet piisã nimbãaneg ye.

⁶Ayo, mam ka na n leb n zoe tẽngã neb nimbãaneg ye. Yaa maam a Sẽn-Ka-Saab n yeele. Sɩd me, mam na n basa ned kam fãa a to nugẽ, la a rĩm nugẽ. Rĩm-dãmbã na n sãama tẽngã, la mam ka na n fãag ned ba a yembr ye.»

⁷Dẽ, mam kɩtame tɩ b kɩɩm piisã b sẽn tog n kʋ wã raadbã yĩnga. Mam dɩka rasab a yiibu, n pʋd a yembr yʋʋr t'a ‹Bʋgsem›, la m pʋd yembrã t'a ‹Lagem-n-taare›, la mam gesa m piisã yelle.

⁸La mam menesa pe-kɩɩmb a tãabã kiuug a yembr pʋgẽ. Mam maana sũ-mar ne piisã n konge, la bãmb me yamã wa n yii maam.

⁹Dẽ, mam yeelame: «Mam ka na n leb n kɩɩm yãmb ye! Bɩ sẽn segd n ki-a ki! Tɩ sẽn na n menem-a menem! La bɩ sẽn na n põs-bã wãb taaba!»

¹⁰Mam dɩka m dasaar ning sẽn boond t'a ‹Bʋgsmã› n kaooge, n na n sãam kaool ning mam sẽn dag n maan ne nebã fãa wã.

¹¹Kaoolã sãama badaare, la piisã lɛɛbdb sẽn dag n get maamã bãngame tɩ rag n yaa Sẽn-Ka-Saab n gomde.

¹² Dẽ, mam yeela bãmb yaa: «A sã n taa yãmb yam, bɩ y yao maam m yaoodã, la sã n ka ta y yam bɩ y base.» Woto, bãmb maka wanzuri wakɩ-koeems pis-tã n yao maam.

¹³Sẽn-Ka-Saab yeela maam yaa: «Lob wanzuri wã tɩ yagbã wʋke. Bãmb sẽn yãnd yaood sẽn segd ne maam la woto.» Mam dɩka wanzuri wakɩ-koeems pis-tã wã n tɩ lob Sẽn-Ka-Saab roogẽ wã tɩ yagbã wʋke.

¹⁴Rẽ poore, mam kaooga m dasaar a yiibẽ soabã sẽn boond t'a ‹Lagem-n-taarã›, n sãam ba-biir lagem-n-taarã sẽn be Zʋʋda ne Israyɛll sʋkã.

¹⁵Sẽn-Ka-Saab yeela maam yaa: «Moasã, rɩk pe-kɩɩm-yalmã teedo!

¹⁶Bala, mam na n yãka pe-kɩɩm tẽngã pʋga. La yẽnda ka na n tɩ gẽes rũms nins sẽn menemdã ye. Yẽnda ka na n bao peosg ning sẽn meneme, a ka na n tɩp peosg ning sẽn pogle, a ka na n ges peosg ning sẽn tar laafɩ wã yell ye. Yẽnda na n wãbda pe-nobdsã, la a fʋgsd b nao-bendã.»

¹⁷Toog bee zãmb pe-kɩɩm ning sẽn basd-a piisã zugu! Bɩ zabr sʋʋg koms a kangã, la a pusg a rɩtg nifã! Bɩ a kangã kʋɩ! Bɩ a rɩtg nifã pãng booge!