Read SEBR SÕNGO, 1998 A Zakari 13 Bible Online

A Zakari 13 - SEBR SÕNGO, 1998 bible

A Zakari 13

¹Badaare, ko-bundum n na n pusg n yi a Davɩɩd buudã ne Zeruzalɛm nebã yel-wẽnã ne b rẽgdã pekr yĩnga.

²Saasẽ-Pãng-Soabã yetame: «Badaare, mam na n yiisa wẽn-naandsã yʋy tẽngã pʋga, la b kõn tol n leb n tẽeg bãmb yell ye. La m na n yiisa no-rɛɛsdbã me tẽngã pʋga, ne b rẽgdã sɩɩgã.

³Dẽ, ned sã n ket n be beenẽ n maand no-reesg tʋʋmde, yẽnda meng ba wã ne a ma wã, sẽn dog-b yẽnda wã, na n yeela yẽnda yaa: ‹Fo tog n kiime, bala, fo togsda zĩrẽ-be-goam ne Sẽn-Ka-Saab yʋʋre.› » La yẽnda ba wã ne a ma wã na n kõs-a-la wakat ning a sẽn togsd pĩnd-n-bãngr goamã.

⁴Badaare, no-rɛɛs fãa sã n wa togsd pĩnd-n-bãngr goamã, yãnd na n yõk-a-la a vẽnegrã yĩnga. Bãmb kõn leb n yeelg fuug sẽn wʋg ne pe-kõbd n belg nebã ye.

⁵Bãmb ned kam fãa na n yeelame yaa: «Mam ka no-rɛɛs ye, mam yaa ka-koaada. Hal mam bi-bɩɩlem wakate, mam tʋmd n kõta ned ning sẽn da-a maamã.»

⁶Dẽ, b na n sok-a lame yaa: ‹Yaa bõe poglg la sẽn be fo yãoogẽ wã?› La a na n leokame yaa: ‹Mam kẽnga neb nins sẽn nong maamã zakẽ tɩ b pogl-ma.› »

⁷Saasẽ-Pãng-Soabã yetame: Zabr sʋʋga, yik n zab ne mam pe-kɩɩmã, zab ne soab ning sẽn be ne maamã! Wẽ pe-kɩɩmã, la piisã na n sãeegame, la mam mengã nug n na n wa wẽ pe-bi wã.

⁸Dẽ, maam a Sẽn-Ka-Saab yetame: Tẽngã pʋga, neb a tãab sʋka, neb a yiib n na n ki, b na n sãamame, la sẽn kell-a wã na n vɩɩmdame.

⁹La m na n dɩka sẽn kell-a wã n ning bugmẽ, mam na n yẽnega yẽnda wa b sẽn yẽnegd wanzuri, mam na n zuga yẽnda wa b sẽn zugd sãnem. Yẽnda na n boola mam yʋʋrã, la mam na n leok-a lame. Mam na n yeelame yaa: «Bãmb n yaa mam nebã.» La bãmb na n yeelame: «Sẽn-Ka-Saab n yaa tõnd Wẽnnaam.»