Read SEBR SÕNGO, 1998 A Zakari 14 Bible Online

A Zakari 14 - SEBR SÕNGO, 1998 bible

A Zakari 14

¹Ade, daar n wat sẽn yaa Sẽn-Ka-Saab daare, tɩ b na n dɩk yãmb paoongã n pʋɩ yãmb nifẽ.

²Mam na n tigma buudã fãa Zeruzalɛm pʋgẽ zabr yĩnga. B na n deega Zeruzalɛm tẽngã, n sãam a rotã, la b gãand a pagbã ne pãnga. Tẽngã nebã pʋɩ-sʋk na n kẽe yembdo, la b ka na n menes neb nins sẽn kell tẽngã pʋgẽ wã ye.

³Dẽ, Sẽn-Ka-Saab na n yiime n zab ne bu-zẽmsã. Bãmb na n zaba ne bãmba, wa b sẽn zabd to-to zabr wakatã.

⁴Badaare, bãmb na n tabga oliiv tɩɩs tãngã sẽn be yaang Zeruzalɛmã neng taoorã zugu. Oliiv tɩɩs tãngã na n pãrga yaang n tãag nin-taoore, tɩ lebg lon-kãsenga. Tãngã pʋɩ-sʋk a yembr na n targ n leba nug-rɩtg sẽnẽ, tɩ pʋɩ-sʋk a yembrã targ n leb nug-goabg sẽnẽ.

⁵La yãmb na n zoe n kẽe mam tãmsã longẽ, bala, mam tãmsã lond na n tɩ tãaga Atsalle. Yãmb na n zoee wa y yaab-rãmbã sẽn dag n zoe n na n põs tẽn-digimdgã, Zʋʋda rĩm a Oozɩyaas wakatã. Dẽ, Sẽn-Ka-Saab sẽn yaa mam Wẽnnaamã na n waame, la pʋ-peelem dãmbã fãa na n tũu bãmb n wa.

⁶Badaare, vẽenem ka na n zĩndi, la waood ne galaas na n zĩndame.

⁷Ra-kãng na n yɩɩ toor zalle, la yaa Sẽn-Ka-Saab bal n mi daarã, wĩndg ne yʋng ka na n zĩnd ye, la zaabr sã n ta, vẽenem na n zĩndame.

⁸Badaare, koom n na n pusg Zeruzalɛm, koomã pʋɩ-sʋk na n zoee n teesa ko-kãseng ning sẽn be yaang sẽnẽ wã, tɩ pʋɩ-sʋk a yembrã zoe n tees ko-kãseng ning sẽn be nin-taoor sẽnẽ. A na n yɩɩ woto sẽoog la sɩpaolgo.

⁹Sẽn-Ka-Saab na n yɩɩ dũniyã fãa rĩma. Badaare, Sẽn-Ka-Saab na n yɩɩ b yembre, la yaa bãmb yʋʋrã bal n na n zĩndi.

¹⁰Tẽngã fãa na n lebga tẽn-nabd-koɛɛnga, sẽn sɩng ne Geba n tãag Rimon sẽn be Zeruzalɛm goabgã. B na n zẽka Zeruzalɛm yĩngr t'a kell n pa a zĩigẽ wã, sẽn sɩng ne Benzame rig-noorã n tãag no-kʋdgã zĩigẽ, hal n tãag rignoor ning sẽn be lal-gõdrẽ wã, la sẽn sɩng ne Hananeyɛll gãosgã n tɩ tãag rĩmã reezẽ rãam wẽkr kogendã zĩigẽ.

¹¹Neb na n leb n zĩnda beenẽ, la sãoong kõn leb n zĩnd ye. La Zeruzalɛm tẽngã na n gãanda bãane.

¹²Ad toog ning Sẽn-Ka-Saab sẽn na n tall n sɩbg buud nins sẽn zab ne Zeruzalɛmã: b na n kɩtame tɩ bãmb ned kam fãa põog n ket n vɩ. Bãmb ninã na n põoga b bogdẽ, tɩ b zɛlmã wã põog b noyã pʋse.

¹³Badaare, Sẽn-Ka-Saab na n kɩtame tɩ pelen-yɩg-kãseng zĩnd bãmb sʋka. Bãmb ned kam fãa wẽnemd n gãda a to, la b na n zaba ne taaba.

¹⁴Zʋʋda na n zĩnda Zeruzalɛm pʋgẽ n zabe, la b na n wʋka bu-zẽms nins fãa sẽn gũbg bãmbã arzegse, yaa sãnem, wanzuri ne fut hal wʋsgo.

¹⁵To-kãng me na n yõka wed-moosã, bõn-weesã, yʋgma wã, bõensã, ne rũms nins fãa sẽn be bãmb tãb-sigsẽ wã. To-kãng na n yɩɩ wa a to wã bala.

¹⁶Dẽ, buud nins fãa sẽn wa n zab ne Zeruzalɛmã, neb nins sẽn põsã na n wata yʋʋmd-yʋʋmd n waoogd rĩmã sẽn yaa Saasẽ-Pãng-Soabã, la b maand zãn tigrã.

¹⁷La buud nins sẽn be dũniyã zugã sã n ka kẽng Zeruzalɛm n tɩ wõgemd n waoog rĩmã sẽn yaa Saasẽ-Pãng-Soabã, saag ka na n ni bãmb tẽngẽ wã ye.

¹⁸Ezɩpt buudã neb sã n ka kẽnge, saag ka na n ni b tẽngẽ wã ye. Yaa to-kãng la Sẽn-Ka-Saab na n tall n sɩbg buud ning sẽn ka na n kẽng-a n tɩ maan zãn tigrã.

¹⁹Sɩbg-kãng la b na n sɩbg Ezɩpti, ne buud nins fãa sẽn ka kẽng n tɩ maan zãn tigrã.

²⁰Badaare, b na n gʋlsa wiidã loamba wã zut woto: «Welga toor Sẽn-Ka-Saab yĩnga!» La rʋgdã sẽn be Sẽn-Ka-Saab roogẽ wã na n yɩɩ wa zɩɩm mesb laasã sẽn be tẽn-kugrã taoorã.

²¹Rʋgd nins fãa sẽn be Zeruzalɛm ne Zʋʋda wã na n welga toor Saasẽ-Pãng-Soabã yĩnga. Neb nins fãa sẽn na n wa maan maoong na n talla rʋg-bãmb n dʋg maoongã nemdo. La toandb kõn leb n zĩnd Saasẽ-Pãng-Soabã roogẽ wakat-kãng ye.