Read SEBR SÕNGO, 1998 A Zakari 2 Bible Online

A Zakari 2 - SEBR SÕNGO, 1998 bible

A Zakari 2

¹Mam zẽka m neng n gese, la mam yãnda yɩɩl a naase.

²Dẽ, mam soka malɛɛk ning sẽn gomd-a ne maamã yaa: «Yɩɩn-bãmbã b naasã võor yaa bõe?» Malɛɛkã leoka maam yaa: «Yɩɩl a naasã bilgda buud nins sẽn tar pãngã sẽn sãeeg Zʋʋda ne Israyɛll la Zeruzalɛm nebã.»

³Sẽn-Ka-Saab wilga maam sãeeb a naase.

⁴Mam sokame yaa: «Bãmb wat n na n maana bõe?» La malɛɛkã leoka maam yaa: «Yɩɩlã sẽn sãeeg Zʋʋda nebã tɩ ned ba a yembr ka leb n tõe n doog a zugã, sãeebã waame n na n kɩt tɩ rabeem yõk buud a taabã, n sãam b pãngã, b sẽn zab ne Zʋʋda nebã yĩnga, la yaa sẽn na n yɩl n sãeeg-ba.»

⁵Vẽnegrã pʋga, mam sẽn zẽk m neng n gese, mam yãnda rao sẽn zãad wĩir sẽn tar n magd a nugẽ.

⁶Mam soka raoã yaa: «Fo rabda yɛɛnẽ?» La a leoka maam yaa: «Mam dat n tɩ maka Zeruzalɛm n bãng a yalmã ne a woglmã.»

⁷La malɛɛk ning sẽn gomd-a ne maamã sẽn kẽnde, malɛɛk a to n yi n seg-a,

⁸n yeel-a yaa: «Wudg n tɩ yeel bi-bɩ-kãngã yaa: ‹Zeruzalɛm na n yɩɩ tẽng sẽn ka tar lalga, ninsaalbã ne rũmsã sẽn na n lebg wʋsg a pʋgẽ wã yĩnga.› »

⁹Sẽn-Ka-Saab yeelame: «Mam mengã na n zĩnda ne yẽnda, n yɩ wa bugum lalg n gũbg-a, la m be a pʋgẽ, n yaa yẽnda ziiri.»

¹⁰Maam a Sẽn-Ka-Saab yetame: «Haya! Haya! Zoe-y n bas-y nug-rɩtg tẽngã n wa, bala, maam n dag n sãeeg yãmb tɩ y kẽng dũniyã kɩrems a naasã. Yaa maam a Sẽn-Ka-Saab n yeele.

¹¹Haya! Sɩyõ nebã, yãmb dãmb sẽn be Babilond tẽn-neerã pʋgẽ wã, zoe-y n põs-y-yã!»

¹²Bala, Saasẽ-Pãng-Soabã, soab ning sẽn gom-a wã tʋma maam ne koɛɛga, buud nins sẽn fã yãmbã wɛɛngẽ n yeele: «Ned sã n sɩɩs yãmba, yaa wa a sẽn tuk mam nifu!

¹³N-yẽe! Mam na n yik n zaba ne bãmba, n kɩt tɩ b yembsã wẽneg n zɛ bãmba, tɩ yãmb bãng tɩ yaa Sẽn-Ka-Saab sẽn yaa Saasẽ-Pãng-Soabã n tʋm maam.

¹⁴Sɩyõ nebã, kils-y ne sũ-noogo, Sɩyõ tẽn-neerã, kɩdme! Bala, mam wat n na n zĩnda fo pʋgẽ. Yaa maam a Sẽn-Ka-Saab n yeele.

¹⁵Badaare, buud wʋsg na n dɩka b mens n kõ Sẽn-Ka-Saabo, n lebg mam nebã. Mam na n zĩnda fo pʋgẽ.» Dẽ, yãmb na n bãngame tɩ yaa Sẽn-Ka-Saab sẽn yaa Saasẽ-Pãng-Soabã n tʋm maam yãmb nengẽ.

¹⁶Sẽn-Ka-Saab na n leb n sooga Zʋʋda, tɩ lebg b rẽnda n yaa b pʋɩɩre, tẽng ning sẽn welg toorã pʋga. Bãmb na n leb n yãka Zeruzalɛm.

¹⁷Bɩ ninsaalbã fãa sĩnd Sẽn-Ka-Saab taoore, bala, bãmb yikame n yit b ro-sõngẽ wã.