Read SEBR SÕNGO, 1998 A Zakari 9 Bible Online

A Zakari 9 - SEBR SÕNGO, 1998 bible

A Zakari 9

¹ Sɩbgr koɛɛga. Sẽn-Ka-Saab koɛɛgã taa Hadrak tẽnga, n sãag n tɩ tek Damaas tẽnga. Bala, Sẽn-Ka-Saab n so ninsaala, wa b sẽn so Israyɛll buudã fãa wã.

²Koɛɛgã taa Hamat tẽngã sẽn yaa yẽnda yakã, ne Tɩɩr la Sɩdõ tẽnga sẽn tar yam wʋsgã.

³Tɩɩr tẽngã mee lalg n gũbgi, yẽnda zama wanzuri wa tom, la a zam sãnem wa soay zut tãndo.

⁴La Sẽn-Ka-Saab na n deega bõn-kãnga, bãmb na n luba a lal-gũbrã ko-kãsengã pʋga, la bugum n na n dɩ tẽngã.

⁵Askalon na n yãnda bõn-kãens tɩ rabeem yõk-a. Gaaza me na n diga ne rabeem, Ekrõ me na n diga ne rabeem bala, bãmb sẽn ning b tẽebã tẽng ning zugã na n paama yãnde. Gaaza rĩmã na n menemame. Ned ka na n leb n zĩnd Askalon ye.

⁶Bu-kalem-kalem na n zĩnda Asdood tẽnga. Woto, mam na n yiisa Filistẽ-dãmbã wuk-m-mengã.

⁷Mam na n yiisa zɩɩmã sẽn be b noorẽ wã, la m yiis nem-yoodã sẽn be b yẽnẽ wã, dẽ, yẽnda me na n yɩɩ bu-kell tõnd Wẽnnaamã yĩnga. Yẽnda na n paama a zĩig Zʋʋda buudã sʋka, la Ekrõ nebã na n yɩɩ wa Zebuus-rãmbã.

⁸Mam na n tilga m tãb-sik m doogã sɛɛga, n kogl-a ne tãb-biis buud fãa, la ne neb nins sẽn saad n pɩʋʋmd beenẽ wã la nin-toaag ba a yembr kõn leb n pɩʋʋg beenẽ n nams-a ye. Bala, moasã wã, mam mengã nin get-b lame.

⁹Sɩyõ tẽn-neere, kɩdem ne sũ-noogo! Zeruzalɛm tẽn-neere, bɩ f kilsi! Ade, fo rĩmã wata fo nengẽ. Bãmb yaa tɩrlem soaba, la tõaagda, n yaa sik-m-meng soaba, n zao bõanga, bãmb zaoo bõan-bila, bõan-yãang biiga.

¹⁰Bãmb na n menesa saar-dãmbã Efrayiim pʋgẽ, la b menes wiidã Zeruzalɛm pʋgẽ. Bãmb na n kaoo zabr tãpã, la b na n moona vɩ-bãan koɛɛg bu-zẽmsã yĩnga. Bãmb naamã na n sɩnga ko-kãseng a yembr n tɩ tãag a to, a na n sɩnga kʋɩlgã, n tɩ tãag dũniyã tɛka.

¹¹«Sã n yaa ne yãmba, kaool ning mam sẽn tall zɩɩm n maan ne yãmbã yĩnga, mam na n yiisa fo yembsã bul-koɛɛngã pʋgẽ.

¹²Yembs nins sẽn be tẽeb pidsg gũudum pʋgã, lebg-y n wa-y tẽng sẽn tar pãngã pʋga.» Rũndã bala, mam yetame: «Mam na n lebs n kõo foom bũmb fãa naoor a yiibu.

¹³Bala, mam dʋʋsda m tãpo, yaa Zʋʋda. Mam ningd-a-la pɛɛma, yaa Efrayiim. Mam na n pirsa Sɩyõ nebã, tɩ b yik n zab ne Gɛrɛɛs nebã. Mam na n kɩtame tɩ yãmb yɩ wa gãndaoog zabr sʋʋga.

¹⁴Sẽn-Ka-Saab na n puka bãmb zugẽ, la bãmb pĩimã na n kẽnga wa sa-yãgbo. Wẽnnaam Sẽn-Ka-Saab na n peeba baorgo, la b na n tũu nug-goabg sob-kãseng n wa.

¹⁵Saasẽ-Pãng-Soabã na n gũu b nebã. Bãmb na n sãamame, la b wer loaabg kugã. Bãmb na n yũume, bãmb na n kɛɛ wa reezẽ rãam, bãmb na n pida wa zɩɩm mesb laaga, wa tẽn-kugrã kɩrems sẽn pid ne zɩɩmã.

¹⁶Sẽn-Ka-Saab sẽn yaa bãmb Wẽnnaamã na n fãaga bãmb badaare, wa pe-kɩɩm sẽn fãagd a piisi. Bala, bãmb tẽngã pʋgẽ, b na n yɩɩ wa kug-neeb sẽn be maanf zug n pɩnda.

¹⁷N-yẽe! Yaa sõama, yaa neere! Koodã na n kɩtame tɩ kom-dibli paam pãnga, la reezẽ rã-paalg na n kõo kom-pugli wã pãnga.»