Read SEBR SÕNGO, 1998 A Matye koe‑noogo 1 Bible Online

A Matye koe‑noogo 1 - SEBR SÕNGO, 1998 bible

A Matye koe‑noogo 1

¹A Abrahaam yageng a Davɩɩd yageng a Zeezi Kiris roog la a woto:

²A Abrahaam n dog a Izake, t'a Izak dog a Zakoobe, t'a Zakoob dog a Zʋʋda ne a ba-biisi,

³t'a Zʋʋda ne a pag a Tamaar dog a Farɛɛs ne a Zaara, t'a Farɛɛs dog a Ɛsrom, t'a Ɛsrom dog a Aram,

⁴t'a Aram dog a Aminadaabe, t'a Aminadaab dog a Naasõ, t'a Naasõ dog a Salmo,

⁵t'a Salmo ne a pag a Rahaab dog a Booze, t'a Booz ne a pag a Rut dog a Obɛɛde,

⁶t'a Obɛɛd dog a Izayi, t'a Izayi dog a Davɩɩde. Rĩm a Davɩɩd ne a Uuri pagã doga a Salmo,

⁷la a Salmo doga a Roboam, t'a Roboam dog a Abiya, t'a Abiya dog a Aaza,

⁸t'a Aaza dog a Zozafate, t'a Zozafat dog a Zoram, t'a Zoram dog a Oozɩyaase,

⁹t'a Oozɩyaas dog a Zoatam, t'a Zoatam dog a Akaaze, t'a Akaaz dog a Ezekɩyaas,

¹⁰t'a Ezekɩyaas dog a Manaase, t'a Manaase dog a Amo, t'a Amo dog a Zoziyaase,

¹¹t'a Zoziyaas dog a Zekoniyaas ne a ba-biisi. Zemsa wakat ning b sẽn yõg Israyɛll nebã n kẽng Babilondã.

¹²Babilond yembdã zugẽ, a Zekoniyaas yaool n doga a Salatiyɛlle, t'a Salatiyɛll dog a Zorobabɛlle,

¹³t'a Zorobabɛll dog a Abiyuudi, t'a Abiyuud dog a Eliyakim,

¹⁴t'a Eliyakim dog a Azaoore, t'a Azaoor dog a Sadoke, t'a Sadok dog a Akim,

¹⁵t'a Akim dog a Eliyuudi, t'a Eliyuud dog a Eleyazaare, t'a Eleyazaar dog a Mata, t'a Mata dog a Zakoobe,

¹⁶t'a Zakoob dog a Zozɛf sẽn yaa a Maari sɩda. Yaa Maari ning sẽn dog a Zeezi b sẽn boond tɩ Kirisã.

¹⁷Woto, sẽn sɩng ne a Abrahaam tɩ ta a Davɩɩde, yaa zamaan piig la a naase. La sẽn sɩng ne a Davɩɩd tɩ ta b sẽn na n yõg Israyɛll nebã n kẽng Babilondã, yaa zamaan piig la a naase. La b sẽn yõg bãmb n kẽng Babilondã zugẽ tɩ ta a Kiris wakatã, yaa zamaan piig la a naase.

¹⁸Ad a Zeezi Kiris dogem sẽn yɩ to-to: B rag n dɩka bãmb ma a Maari n kõ a Zozɛfe, la sẽn deng b sẽn nan ka kẽ ne taaba, b mikame t'a Maari tʋtame, la yaa Sɩɩg-sõng n kɩt t'a yɩ a woto.

¹⁹La a sɩd a Zozɛf sẽn yaa nin-tɩrga, n ka rat n ning-a yãnd nebã nifẽ wã yĩnga, a tagsame n dat n soos n bas-a.

²⁰Wakat ning a Zozɛf sẽn wa n tagsd a woto wã, Zu-soabã malɛɛk puka a meng ne yẽnda zãmsd pʋgẽ n yeele: Zozɛfe, a Davɩɩd yagenga, da zoe rabeem tɩ peeg f pag a Maari ye, bala pʋgã a sẽn tʋtã yita Sɩɩg-sõng nengẽ.

²¹Yẽnda na n doga bi-ribla, la fo na n pʋda a yʋʋr t'a Zeezi. Yaa yẽnda n na n yols b nebã ne yel-wẽnã.

²²Bõn-kãens fãa maaname tɩ Zu-soabã sẽn dag n gom ne b no-rɛɛsã noorã paam pidsgu:

²³Ade, pa-kuil na n dɩka pʋga, n dog bi-ribla, la b na n pʋda a yʋʋr tɩ Emanuwɛlle, sẽn dat n togs tɩ ‹Wẽnd‑be‑ne‑do.›

²⁴A Zozɛf sẽn neke, a maana wa Zu-soabã malɛɛkã sẽn yeel yẽnda wã, la a peega a pagã.

²⁵La yẽnda ka bãng-a hal t'a wa rog bi-ribla, t'a pʋd a yʋʋr t'a Zeezi.