Read SEBR SÕNGO, 1998 A Matye koe‑noogo 11 Bible Online

A Matye koe‑noogo 11 - SEBR SÕNGO, 1998 bible

A Matye koe‑noogo 11

¹A Zeezi sẽn wilg bãmb karen-biisã piig la a yiibã b tʋʋmã n sɛ, b meng yii be n kẽng n tɩ zãms nebã la b moon koe-noogã b tẽmsã pʋse.

²A Zã zĩnda bi-bees roogẽ n wʋm tɩ b gomd a Zeezi tʋʋmã yelle. Dẽ, yẽnda tʋma a karen-biisã tɩ b tɩ sok a Zeezi yaa:

³«Yãmb la sẽn tog n wa-a wã bɩ, bɩ d tog n gũ ned a to?»

⁴A Zeezi leok-b lame n yeele: «Kẽng-y n tɩ togs-y-yã a Zã bũmb nins yãmb sẽn wʋmd la y yãtã:

⁵zoens nin pugsdame, wobs kẽndame, yĩn-gãong bãas sẽn tar-b rãmbã yĩns lebgda yɩlma, wʋms wʋmdame, kũum vʋʋgdame, la koe-noogã moonda naong rãmb sʋka.

⁶Bark bee ned ninga mam sẽn kõn yɩ kug-lakdg a yĩngã zugu.»

⁷La a Zã karen-biisã sẽn looge, a Zeezi sɩngame n gom ne neb kʋʋngã a Zã yell n yeele: Bõe la yãmb kẽng n tɩ ges we-rasempʋɩɩgẽ wã? Tãnwĩig sobg sẽn miimda?

⁸La yaa bõe la yãmb tɩ gese? Dao sẽn yeelg waoogr futu? Neb nins sẽn yer fu-bʋgs sẽn yaa neebã bee rĩm-dãmb zagsẽ.

⁹Dẽ, bõe la yãmb kẽng n tɩ gese? Wẽnnaam no-rɛɛsa? Mam yeta yãmb tɩ n-yẽe. La yaa ned sẽn yɩɩd Wẽnnaam no-rɛɛsa.

¹⁰Bala, yaa rao-kãng yell la b sẽn dag n gʋls n yeel a woto wã:» «Ade, mam tʋmda m koe-toagsda, t'a reng fo taoore, n lʋɩ taoor n maneg f sorã.»

¹¹Sɩd-sɩda, mam yeta yãmb tɩ pagb sẽn dog b rãmbã sʋka, ned ka zĩnd sẽn yaa kãseng n yɩɩd a Zã ye. Baoosgo, soab ning sẽn yaa-a yao-zʋʋg arzãn soolmẽ wã yaa kãseng n yɩɩd yẽnda.

¹²Hal sẽn sɩng ne a Zã wakat tɩ ta moasã, yaa ne pãng la nebã kẽed arzãn soolmẽ. La yaa pãens rãmbã n tõogd n paamd-a.

¹³Wẽnnaam no-rɛɛsdbã fãa ne tõogã togsa pĩnd-n-bãngr goam soolmã wɛɛngẽ hal tɩ ta a Zã wakate.

¹⁴La yãmb sã n na n sak n deege, yẽnda yaa Eli ning sẽn dag n tog n wa-a wã.

¹⁵Sẽn tar-a tʋb bɩ a wʋme.

¹⁶Mam na n mamsa zamaan-kãngã nebã ne ãnda rãmba? Bãmb wẽnda wa kamb sẽn zĩ raagẽ n boond taab n yetẽ:

¹⁷«Tõnd peeba wɩɩs la yãmb ka sao ye. Tõnd yɩɩla kʋʋr yɩɩl la yãmb ka wiis ye.»

¹⁸Bala, a Zã waame n ka rɩt la a ka yũud ye, tɩ b yet tɩ sɩ-wẽng n tar-a.

¹⁹Ninsaal Bi-riblã sẽn wa wã, b rɩtame la b yũuda, tɩ nebã yetẽ tɩ b yaa yão-be-neda, la rã-yũuda, la yaood-dɛɛgdb ne yel-wẽn maandbã zoa. La yam tʋʋm‑sõama n wilgd yam sẽn yaa a soaba.

²⁰Dẽ poore, a Zeezi sɩngame n leng tẽms nins bãmb sẽn maan bõn-bãn wʋsg b pʋsẽ wã, bala, bãmb ka sak n na n tek yam n kos sugr ye.

²¹Bãmb yeelame: «Korazin, fo na paam toogo! Betsayɩɩda, fo na paam toogo! Bala, bõn-bãn nins sẽn maan yãmb pʋsẽ wã sã n dag n maanẽ Tɩɩr ne Sɩdõ sẽn yaa tẽn-wẽnsã pʋse, bãmb dag n na n tekẽ‑la yam hal daar zãra, n pil bot n zĩnd tompeglmẽ n kos sugri.

²²Yaa woto yĩng la mam yet yãmb tɩ bʋʋdã daare, Tɩɩr ne Sɩdõ nebã sɩbgrã toolem kõn ta yãmb dẽndã ye.

²³La foom, Kapɛrnaom, b na n zẽka foom hal tɩ f ta arzãna? Ayo, b na n sika foom hal tɩ ta kɩɩm-kulgu. Bala, bõn-bãn nins sẽn maan fo pʋgẽ wã sã n dag n maanẽ Sodom pʋgẽ, a rag n na ketẽ tɩ ta rũndã.

²⁴Yaa woto yĩng la mam yet yãmb tɩ bʋʋdã daare, Sodom sɩbgrã toolem ka na n ta foom ye.»

²⁵Wakat-kãnga, a Zeezi gomame n yeele: M ba sẽn yaa arzãn la dũniyã Zu-soaba, mam pẽgda yãmba, yãmb sẽn solg bõn-kãens ne yam-dãmba, la ne yẽesem-dãmba, n yaool n vẽneg bõn‑kãens ne kom-bãoonegã yĩnga.

²⁶N-yẽe! M ba, yãmb n dat tɩ yɩ a woto.

²⁷M ba ninga bũmb fãa mam nugẽ, la ned ba a yembr ka mi Bi-riblã ye, sã n ka ba wã bala. La ned ba a yembr ka mi ba wã, sã n ka Bi-riblã bala, la Bi-riblã sẽn dat vẽneg ba wã ne ned ninga.

²⁸Bɩ y wa mam nengẽ yãmb‑dãmb fãa sẽn yɛ, la sẽn tʋk zɩɩb sẽn yaa zɩsgo, la mam na n kõo yãmb vʋʋsgo.

²⁹Rɩk-y mam yubl-balgr n pidi, la y sak mam zãmsgã. Bala, mam yaa nin-bʋgsgo, la m yaa sũ-mar soaba, la yãmb na paam vʋʋsgo.

³⁰Bala, yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.