Read SEBR SÕNGO, 1998 A Matye koe‑noogo 12 Bible Online

A Matye koe‑noogo 12 - SEBR SÕNGO, 1998 bible

A Matye koe‑noogo 12

¹Wakat-kãnga, a Zeezi wa n pɩʋʋgda bɩle pʋt pʋsẽ n loogdẽ, la rag n yaa vʋʋsg daare. B karen‑biisã sɩngame n yãgds koodã n wãbdẽ, komã sẽn tar‑bã yĩnga.

²Fariizẽ-dãmbã sẽn yã woto, b yeela a Zeezi yaa: Ges-y-yã! Yãmb karen-biisã maanda bũmb sẽn ka zems tɩ maan vʋʋsg daar ye.

³La a Zeezi leok-b lame n yeele: Yãmb ka karem bũmb ning a Davɩɩd sẽn maan wakat ning kom sẽn yõk yẽnda ne a tũud-n-taasã,

⁴a sẽn kẽ Wẽnnaam doogẽ wã to‑to, tɩ yẽnda ne a tũud‑n‑taasã dɩ bur ning sẽn yaa Wẽnnaam dẽndã tɩ yẽnda wall a tũud-n-taasã yaool n dag n ka zems tɩ rɩ, sã n ka maan-kʋʋdbã balã la?

⁵Bɩ yãmb ka karem tõogã pʋgẽ tɩ vʋʋsg daare, maan-kʋʋdbã sẽn be wẽnd doogẽ wã kɩɩsda vʋʋsg daarã tõog tɩ ka beegr b yĩng la?

⁶Mam yaool n yeta yãmb tɩ sẽn yɩɩd wẽnd doogã n be ka.

⁷Yãmb sã n dag n bãngẽ gomd ning sẽn yet-a tɩ: «mam data nimbãan-zoeer la ka maoongã võore, yãmb dag n ka na n ning neb sẽn ka tar yell taal ye.

⁸Bala, Ninsaal Bi-riblã yaa vʋʋsg daarã Zu‑soaba.»

⁹A Zeezi yii be n kẽng b karen-doogẽ wã.

¹⁰La dao a yembr n dag n be be t'a nug ki. La b soka a Zeezi yaa: «Noor beeme tɩ maag bãad vʋʋsg daar bɩ?» La sok-kãng yaa sẽn na yɩl n paam bũmb n dõd a Zeezi.

¹¹A Zeezi leoka bãmb yaa: «Ãnda n be yãmb sʋkã sẽn na n tar a peosg a yembr tãa t'a lʋɩ bokẽ vʋʋsg daare, t'a ka tɩ tak-a n yiisi?

¹²Ninsaal yõod sẽn yɩɩd peosg zĩig ka zãra? Dẽ, noor beeme tɩ maan neer vʋʋsg daare.»

¹³Dẽ, a Zeezi yeela raoã yaa: «Tẽeg f nugã.» La raoã tẽegame, la nugã vʋʋgame n lebg sõama wa nug a to wã.

¹⁴Fariizẽ-dãmbã yii yɩng n yẽs ne taab n bao b sẽn na n maan to-to n kʋ a Zeezi.

¹⁵La a Zeezi wʋmame n yi zĩ-kãnga. Neb wʋsg tũu bãmba, la b maaga b fãa.

¹⁶La a Zeezi tãsd‑b lame n yeel tɩ b ra sak n gom yẽnda yell ye.

¹⁷Tɩ bũmb ning Wẽnnaam no-rɛɛs a Ezayi sẽn yeelã paam pidsgu:

¹⁸«Ad mam tʋmtʋmd mam sẽn yãke, mam nin-nongr sẽn ta m yam. Mam na n ninga m Sɩɩgã yẽnda zugu, la yẽnda na n moona bu‑zẽmsã tɩrlem koɛɛga.

¹⁹Yẽnda kõn wẽ nokoeemde wall a zẽk a koɛɛg ye, la ned kõn wʋm yẽnda koɛɛg soay zut ye.

²⁰Yẽnda kõn kaoog tãnwĩ-kaoong n baas ye, la yẽnda kõn kiis fɩtl laong sẽn ket n nusdẽ ye, hal t'a wa kɩt tɩ tɩrlem paam tõogre.

²¹La buud toay-toayã na n teega yẽnda yʋʋrã.»

²²Dẽ, b talla ned sẽn yaa zoang la muka tɩ zĩn tar-a n wa a Zeezi nengẽ, la bãmb maag-a lame, tɩ yẽnda sẽn dag n yaa mukã, a gomdame la a yãtẽ.

²³Neb kʋʋngã fãa yɛɛsame n yeele: Dao-kãngã ka na n yɩ a Davɩɩd biigã sɩda?

²⁴La Fariizẽ-dãmbã sẽn wʋm woto, b yeelame: «Dao-kãngã ka rigd zĩn-dãmbã tɩ sã n ka ne zĩn-dãmbã naab a Belzebull pãng ye.»

²⁵La a Zeezi sẽn mi bãmb tagsgã yeel-b lame yaa: Soolem ning fãa neb sẽn welg n gõdg n zabd ne taaba, a na n wãame. La tẽng ning fãa bɩ yir ning fãa neb sẽn welg n gõdg n zabd ne taab kõn tõog n yals ye.

²⁶Sã n yaa t'a Sʋtãan digda a Sʋtãana, a welgame n gõdg n zabd ne a menga. Dẽ, yẽnda soolem na n yɩɩ a wãn n yalse?

²⁷La mam sã n digda zĩn-dãmbã ne a Belzebull pãnga, yãmb kambã rigd-b-la ne ãnda pãnga? Yaa woto yĩng n kɩt tɩ bãmb mensã na n kao yãmb bʋʋdo.

²⁸La sã n yaa ne Wẽnnaam Sɩɩgã pãng la mam digd zĩn-dãmbã, dẽ, Wẽnnaam soolem taa yãmb sʋka.

²⁹Bɩ ned na n yɩɩ a wãn n kẽ pãng soab roogẽ n wʋk a teedo, t'a ka reng n sẽb-a? A sã n sẽb-a, a na yaool n tõog n wʋk a roogã teedã.

³⁰Ned ning sẽn ka be mam poorẽ kisa maam, la ned ning sẽn ka naagd maam n tigsdẽ, a sãeegdame.

³¹Yaa woto yĩng la mam yet yãmb tɩ ninsaalbã na n paama sugr b yel-wẽnã la b paoogrã buud fãa yĩnga. La ned ning sẽn paoog-a Sɩɩg-sõng kõn tol n paam sugr ye.

³²Ned ning sẽn gom-a Ninsaal Bi-riblã wẽng na n paama sugri. La ned ning sẽn na n gom Sɩɩg-sõng wẽng kõn paam sugr dũni-kãnga pʋga, la dũni ning sẽn watã pʋg me ye.

³³Kɩt-y tɩ tɩɩgã yɩ sõama la t'a biisã yɩ sõamã, wall y kɩt tɩ tɩɩgã yɩ yooko, t'a biisã me yɩ põaasa. Bala, yaa tɩɩg biisẽ la b bãngd a sã n yaa sõama, wall yooko.

³⁴Yãmb wag-toos buudu, yãmb sẽn yaa nin-wẽns a woto wã, yãmb na n yɩɩ a wãn n tõog n gom gom-sõama? Bala, yaa bũmb nins sẽn pid sũurẽ wã n yit noorẽ wã.

³⁵Nin-sõng yiisda bõn-sõamã a paoon-sõngã pʋgẽ. La nin-wẽng yiisda bõn-wẽns a paoon-wẽngã pʋgẽ.

³⁶Mam yeta yãmb tɩ bʋʋdã kaoob daare, b na n soka ninsaalbã b gom-vɩɩd nins fãa b sẽn dag n gomã yelle.

³⁷Bala, yaa ne fo noorã goam la f na n paam bʋʋm, la yaa ne fo noorã goam la f na n kong bʋʋm.

³⁸Dẽ, tõog karen-saam-dãmbã ne Fariizẽ-dãmbã kẽer yeela a Zeezi yaa: Karen-saamba, tõnd datame tɩ yãmb maan bãnd tɩ d yãnde.

³⁹A Zeezi leok-b lame n yeele: Zamaan‑kãngã neb sẽn yaa nin-wẽns la yoaadbã kota bãnde, la b kõn kõ bãmb bãnd a to tɩ sã n ka Wẽnnaam no-rɛɛs a Zonaas bãndã ye.

⁴⁰Bala, a wa a Zonaas sẽn zĩnd zĩm-bedrã pʋgẽ rasem a tãab la yʋnd a tãabã, woto me, Ninsaal Bi-riblã na n paa tãnd tẽngr dasem a tãab la yʋnd a tãabo.

⁴¹Bʋʋdã wakate, Niniiv nebã na n yika ne zamaan‑kãngã nebã, la b na n mong‑b‑la bʋʋm. Bala, Niniiv nebã teka yam n kos sugr a Zonaas koe-moonegã yĩnga. La ade, sẽn yɩɩd a Zonaas n be ka.

⁴²Bʋʋdã wakate, rĩm-poakã sẽn yit wĩndg goabgã na n yika ne zamaan‑kãngã nebã, la a na n mong‑b‑la bʋʋm. Bala, yẽnda yii dũni satmẽ n wa n kelg a Salmo yam goamã. La ade, sẽn yɩɩd a Salmo n be ka.

⁴³Zĩn-dẽgd sã n yi n bas neda, a saada zĩ-pɛɛlẽ n baood vʋʋsgo, la a ka yãt ye.

⁴⁴Dẽ, a yetame: «Mam na n leba m doog ning m sẽn yi n basã pʋgẽ.» La a sã n ta, n mik tɩ roogã yaa vɩʋʋgo, n pɩɩs n maneg tɩ ya neere.

⁴⁵A kẽngdame n tɩ peeg zĩn-dãmb a yopoe sẽn yaa wẽns n yɩɩd yẽnda mengã tɩ b wa kẽ n zĩnd be. La rao-kãng yaoolem toogã na n yɩɩ wẽng n yɩɩg pipi wã. A na n yɩɩ a woto me zamaan‑kãngã nin-wẽnsã yĩnga.

⁴⁶La a Zeezi sẽn ket n gomd ne neb kʋʋngã wakate, b ma wã ne b ma-biisã dag n yasa yɩng n baood n na n gom ne bãmba.

⁴⁷[Ned a yembr n yeel a Zeezi yaa: «Yãmb ma wã ne y ma-biisã yasa yɩng n baood n na n gom ne yãmba.»]

⁴⁸A Zeezi leoka sẽn gom-a ne bãmbã a woto: «Ãnda la mam ma, la ãnda rãmb la mam ma-biisi?»

⁴⁹La a Zeezi teesa b karen-biisã ne b nug n yeele: «Ad mam ma ne mam ma-biisi.

⁵⁰Sɩda, ned ning fãa sẽn maand-a mam Ba sẽn be arzãnã raabo, yẽnda soab la mam ma-bi-raoogo, mam ma-bi-poaka la m ma.»