Read SEBR SÕNGO, 1998 A Matye koe‑noogo 13 Bible Online

A Matye koe‑noogo 13 - SEBR SÕNGO, 1998 bible

A Matye koe‑noogo 13

¹Badaare, a Zeezi yii roogẽ wã n tɩ zĩnd ko-kãsengã noore.

² Neb kʋʋng wʋsg tigma taab bãmb nengẽ tɩ yɩ tɩlɛ tɩ bãmb kẽ koom koglgẽ n zĩndi. Neb kʋʋngã fãa rag n yasa kʋɩl-koakẽ wã.

³A Zeezi goma ne bãmb bũmb wʋsg yell ne yel-bũn n yeele: Ka-koaad n yi n na n fẽrg bõn-buudu.

⁴La yẽnda sẽn fẽrgdã, bõn-buud kẽer lʋɩɩ sorã kɩrenga, la liuuli waa n dɩ-b lame.

⁵La kẽer lʋɩɩ kug zĩigẽ, tomã sẽn ka waoogẽ. La tao-tao bala b yiime, tomã sẽn ka waoogã yĩnga.

⁶La wĩndgã sẽn zẽke, a yõog-b lame tɩ b kʋɩ, b sẽn ka tar yẽgnã yĩnga.

⁷Kẽer lʋɩɩ gõos sʋka, la gõosã yikame n wulumd-b n dɩ-ba.

⁸La kẽer lʋɩɩ zĩ-sõngẽ, la b woma biisi. Kẽer womame tɩ ta koabg-koabga, kẽer pis-yoob‑yoobe, la kẽer pis-tã‑tã.

⁹Sẽn tar-a tʋb bɩ a wʋme.

¹⁰Karen-biisã kolg n soka a Zeezi tɩ yaa bõe tɩ bãmb gomd ne nebã ne yel-bũna?

¹¹A Zeezi leok-b lame n yeele: B kõo yãmb tɩ tõe n bãng arzãn soolmã yel-soalem võore, la b ka kõ bãmb ye.

¹²Bala, ned ninga sẽn tar-a, b na n kõo yẽnda n paas t'a paam wʋsgo. La ned ning sẽn ka tar-a, b na n deega baa bũmb bilf ning yẽnda sẽn tarã.

¹³Yaa woto yĩng tɩ mam wẽed yel-bũn ne bãmba: Bala, bãmb getame, la b ka ne ye, bãmb kelgdame, la b ka wʋmd ye, la b ka wʋmd võor me ye.

¹⁴La Wẽnnaam no-rɛɛs a Ezayi bãngr-goamã paama pidsg bãmb yĩnga. A yeelame: «Yãmb na n wʋma sõama, la y kõn bãng a võor ye, yãmb na n gesa neere, la y kõn yã ye.

¹⁵Bala, nin-kãensã sũyã riglmame. Bãmb yẽda b tʋba la b mum b nini, tɩ b nin da yã la b tʋb ra wʋme, tɩ bãmb yamã kõn wʋm a võore, tɩ b kõn lebg n wa tɩ mam maag-b ye.

¹⁶La yãmba, bark bee yãmb zutu, y ninã sẽn yãtã, la y tʋbã sẽn wʋmdã yĩnga.

¹⁷Sɩd-sɩda, mam yeta yãmb tɩ Wẽnnaam no-rɛɛsdb la nin-tɩrs wʋsg dag n dat n yãnda bũmb nins yãmb sẽn yãtã la b ka yã ye. B rag n dat n wʋma bũmb nins yãmb sẽn wʋmdã la b ka wʋm ye.

¹⁸Dẽ, kelg-y bõn-bu-fẽrgdã yel-bũndã võore.

¹⁹Ned sã n kelg Wẽnnaam soolem koɛɛgã n ka wʋm a võore, wẽng soabã wat n yiisa bõn-buudã sẽn dag n fẽrg yẽnda sũurẽ wã. Yẽnda wẽnda bõn-buudã sẽn lʋɩ sorã kɩrengã.

²⁰Bõn-buudã sẽn lʋɩ kugã zĩigẽ wã yaa ned ning sẽn wʋmd Wẽnnaam koɛɛgã n deeg-a tao-tao ne sũ-noogo,

²¹la a yaool n ka tar a meng yẽgen ye. Yẽnda kaoosda wakat bilf bala, la yel-pakr bɩ namsg sã n yaool n paam-a Wẽnnaam koɛɛgã yĩnga, yẽnda lʋɩtame.

²²Bõn-buudã sẽn lʋɩ gõosã sʋkã yaa ned ning sẽn wʋmd Wẽnnaam koɛɛgã, tɩ dũniyã yɩɩre la arzegs belgr wulumd koɛɛgã t'a ka womd biis ye.

²³Bõn-buudã sẽn lʋɩ zĩ-sõngẽ wã yaa ned ning sẽn wʋmd Wẽnnaam koɛɛgã n wʋmd a võore. Yẽnda womda biisi. Kẽer womame tɩ ta koabg-koabga, kẽer pis-yoob‑yoobe, kẽer pis-tã‑tã.»

²⁴A Zeezi wẽe bãmb yel-bũnd a to n yeele: Arzãn soolem wẽnda wa rao sẽn bʋd bõn-bu-sõng a pʋʋgẽ.

²⁵La nebã sẽn gõe wakate, a bɛ wã waa n bʋda nadens koodã sʋk n bas n looge.

²⁶Koodã sẽn zẽk n wom biisi, nadensã me pukame.

²⁷Yirã soab tʋmtʋmdb waa n sok-a lame yaa: «Zu-soaba, ka bõn-bu-sõng la yãmb bʋd y pʋʋgẽ wã wɛ? Nadensã yii yɛ n wa be beenẽ?»

²⁸Yẽnda leoka bãmb yaa: «yaa bɛy n maan bõn-kãnga.» La tʋmtʋmdbã soka yẽnda: «Yãmb datame tɩ d kẽng n tɩ võ nadensã bɩ?»

²⁹Yẽnda leoka bãmb yaa: «Ayo! Bala, yãmb sã n võod nadensã, tõe tɩ y wa n yĩd n naag koodã n võ.

³⁰Bas-y b yiibã fãa tɩ b bɩ ne taab hal tɩ ta tigsg wakate. La tigsgã wakate, mam na n yeela tigsdbã tɩ b reng n võ nadensã n sẽb kil n yõog bugum, la b tigs koodã n sui m baoorẽ wã.»

³¹A Zeezi wẽe bãmb yel-bũnd a to n yeele: «Arzãn soolem wẽnda wa siin-bil ned sẽn dɩk n bʋd a pʋʋgẽ.

³²Yẽnda n yaa bilf n yɩɩd bõn-buud a taabã fãa. La a sã n wa n bɩ, a lebgda bedr n yɩɩd zẽed buud fãa, n lebg tɩɩg hal tɩ liuuli wat n zao a wila.»

³³Bãmb leb n wẽe yel-bũn-kãngã me: «Arzãn soolem wẽnda wa rã-bɩll pag sẽn dɩk n ning zom wam a tã hal t'a wuk zomã zãnga.»

³⁴Gom-kãens fãa a Zeezi goma ne neb kʋʋngã ne yel-bũna. B rag n ka gomd tɩ ka ne yel-bũn ye,

³⁵tɩ bũmb nins Wẽnnaam no-rɛɛsã sẽn dag n yeelã paam pidsgu. A yeelame yaa: «Mam na n yaaga m noor n wẽ yel-bũna, mam na n wilga bũmb sẽn solg hal dũniyã naaneg wakat tɩ ta moasã.»

³⁶Dẽ, a Zeezi basa neb kʋʋngã n leb yiri. Bãmb karen-biisã kolg n yeela bãmb yaa: «Bilg-y tõnd nadensã sẽn be pʋʋgẽ wã yel-bũndã võore.»

³⁷A Zeezi leok-b lame n yeele: «Ned ning sẽn bʋt bõn-bu-sõngã yaa Ninsaal Bi-riblã.

³⁸Pʋʋgã yaa dũni wã, bõn-bu-sõama wã yaa soolmã kamba, nadensã yaa wẽng soabã kamba.

³⁹Bɛyã sẽn bʋd nadensã yaa sʋtãana. La tigsgã yaa dũniyã sɛɛbo. Tigsdbã yaa malegsã.

⁴⁰La wa b sẽn võod nadensã n yõogd bugmã, a na n yɩɩ a woto me dũniyã sɛɛb wakate.

⁴¹Ninsaal Bi-riblã na n tʋma bãmb malegsã tɩ b yãgs kug-lakdsã fãa ne neb nins sẽn maand‑b wẽngã n yiis-b bãmb soolmẽ wã.

⁴²La b na n loba bãmb wʋng bugmẽ, la be na n yɩɩ yãbr la yẽn wãbr zĩiga.

⁴³Dẽ, nin-tɩrsã na n yãga wa wĩndg bãmb ba soolem pʋgẽ. Bɩ ned ninga sẽn tar‑a tʋb wʋme.»

⁴⁴Arzãn soolem leb n wẽnda wa arzɛk sẽn solg pʋʋg pʋgẽ. Rao ning sẽn yãnd-a wã lebs n solg-a lame. La a sũurã sẽn yaa noogã yĩnga, a kuil n tɩ koosa a sẽn tarã fãa n dɩk n da pʋʋgã.

⁴⁵Arzãn soolem leb n wẽnda wa toand sẽn baood kĩndi sẽn yaa neeba.

⁴⁶Yẽ wa yãa kĩndf a yembr t'a ligdã yaa wʋsgo, t'a kẽng n tɩ koos a sẽn dag n tarã fãa n da-a.

⁴⁷Arzãn soolem leb n wẽnda wa zĩm-gãmbr b sẽn lob ko-kãsengã pʋgẽ n wʋk zĩm buud toor‑toore.

⁴⁸La a sã n pidi, b vuugd-a lame n yi kʋɩl-koakã n zĩnd n tũus sẽn ya‑b sõama wã n sag yaasẽ, la b lob sẽn ka-b sõama wã.

⁴⁹A na n yɩɩ a woto dũni sɛɛb wakate. Malegsã na n wa baka nin-wẽnsã n yiis nin-tɩrsã sʋka,

⁵⁰n lob-b wʋng bugmẽ. Yãbr la yẽn wãbr na n zĩnda beenẽ.

⁵¹Yãmb wʋma bõn-kãens fãa võor bɩ? Bãmb leokame tɩ n-yẽe.

⁵²La a Zeezi yeela bãmba: «Yaa woto yĩng tɩ tõog karen-saamb ning fãa sẽn zãms arzãn soolem yɛl n bãnge, wẽnda wa yir soab sẽn yãkd bõn-paals ne bõn-kʋd a paoong pʋgẽ.»

⁵³A Zeezi sẽn wẽ yel-bũn-kãens n sa, b yii zĩ-kãnga.

⁵⁴Bãmb kẽnga b meng tẽngẽ. La b sẽn ta be, b sɩngame n zãms nebã b karen-doogẽ wã. Nebã yɛɛsame n sokdẽ: «Bãmb yamã ne b bõn-bãnã yita yɛɛne?

⁵⁵Ka bãmb la ra-wãadã biigã wɛ? Ka b ma wã yʋʋr la a Maari wɛ? La ka b ma-biis la a Zak ne a Zozɛf la a Sɩmo ne a Zuud wɛ?

⁵⁶B tãopã fãa ka be tõnd sʋk ka sɩda? Dẽ, bãmb paama bõn-kãensã fãa yɛɛnẽ?»

⁵⁷La tags-kãng kɩtame tɩ b ka tẽ a Zeezi ye. La a Zeezi yeel-b lame: «No-rɛɛs ka kongd waoogre, sã n ka a meng tẽngẽ la a roagdbã sʋk ye.

⁵⁸La bãmb ka maan bõn-bãn wʋsg zĩ-kãng ye, nebã sẽn ka tẽedã yĩnga.