Read SEBR SÕNGO, 1998 A Matye koe‑noogo 14 Bible Online

A Matye koe‑noogo 14 - SEBR SÕNGO, 1998 bible

A Matye koe‑noogo 14

¹Wakat-kãnga, naab a Erood wʋma b sẽn gomd a Zeezi yelle,

²la a yeela a tʋmtʋmdbã: «Yaa a Zãmbatiis n vʋʋge, yaa woto yĩng n kɩt t'a tar pãn-tõog n maand bõn-bãnã.»

³Bala a Erood dag n yõka a Zã n balg-a n kẽes bi-bees roogo, a ba-biig a Filip pag a Eroodyaad poorẽ.

⁴Bala, a Zã rag n yeela yẽnda t'a ka tar noor tɩ peeg a Eroodyaad n maan a pag ye.

⁵A Erood dag n dat n kɩtame tɩ b kʋ a Zã, la a rag n zoeta neb kʋʋngã, bala, b rag n geta a Zã wa Wẽnnaam no-rɛɛsa.

⁶La a Erood dogmã tẽegr daare, a Eroodyaad bi-puglã saoo neb nins sẽn be-b be wã taoore, la yɩɩ a Erood noogo,

⁷hal t'a wẽen t'a na n kõ-a-la bũmb ning a sẽn na n kose.

⁸A ma wã saglg yĩnga, a yeelame yaa: «Kõ-y maam a Zã zugã ne lengr ka.»

⁹Rĩmã sũur sãamame, la a wẽenegã yĩnga, ne nebã sẽn be beenẽ n dɩtẽ wã yĩnga, a yeelame tɩ b kõ-a a sẽn datã.

¹⁰La a tʋma neb tɩ b tɩ fiuug a Zã zugã bi-beesã roogẽ.

¹¹B talla a Zã zugã ne lengr n wa n kõ bi-puglã, la a tallame n tɩ kõ a ma.

¹²A Zã karen-biisã waa n dɩka a Zã kũumã n tɩ mume. La b kẽngame n tɩ togs a Zeezi.

¹³A Zeezi sẽn wʋm bõn-kãnga, bãmb kẽe koom-koglg n kẽng zĩig neb sẽn ka be. La neb kʋʋngã sẽn bãnge, b yii tẽmsẽ wã n pʋg bãmb ne nao.

¹⁴A Zeezi sẽn yi koom koglgẽ wã, b yãnda neb kʋʋngã, tɩ b nimbãaneg yõk-ba, la bãmb maaga bãad-dãmbã.

¹⁵Zaabr sẽn ta, karen-biisã kolga a Zeezi n yeel-b yaa: «Zĩ-kãngã yaa weoogo, la wakatã zoe n yõsgame. Rẽ wã, bɩ y kuils nebã tɩ b kẽng tẽmsẽ wã n tɩ ra rɩɩbo.»

¹⁶A Zeezi leokame: «Ka tɩlɛ tɩ nebã loog ye, bɩ yãmb mensã kõ-b rɩɩb tɩ b rɩ.»

¹⁷Karen-biisã leoka bãmba: «Bur a nu ne zĩm a yiib bal la tõnd tar ka.»

¹⁸La a Zeezi yeelame: «Tall‑y rẽnda n wa.»

¹⁹A Zeezi kɩtame tɩ nebã zĩnd moodã zugu, la b reega bur a nu wã ne zĩm a yiibã n nak n ges yĩngri, n ning barka. Dẽ, bãmb kaoo burã n kõ b karen-biisã tɩ b reeg n pʋɩ neb kʋʋngã.

²⁰Nebã fãa rɩɩme n tɩge, la b wʋka bur-kɛlã pet piig la a yiibu.

²¹Neb nins sẽn dɩ wã sõor kolga raop tus a nu, pagbã ne kambã sõor sẽn ka naage.

²²Dẽ poore, a Zeezi modga b karen-biisã tɩ b kẽ koom-koglg n deng bãmb taoor ko-kãsengã rʋʋnde, tɩ bãmb na n yõdg n kuilsa neb kʋʋngã.

²³A Zeezi sẽn kuils nebã n sɛ, b rʋʋ tãngã, zĩig ned sẽn ka be n na n pʋʋse. La yʋng sẽn ta, bãmb dag n bee be b yembre.

²⁴Koom-koglgã da zoe n zãaga ne kʋɩl-koakã, la ko-pɛm da wẽed-a lame hal t'a lengdẽ, bala, sobgã rag n segda bãmba.

²⁵Beoogã sẽn waa n kolg vẽegre, a Zeezi kẽna koomã zugu, n babs‑ba.

²⁶Bãmb karen-biisã sẽn yã bãmb tɩ b kẽnd ko-kãsengã zugã, b yɛɛsame n yeele: «Yaa kɩɩma.» La rabeemã yĩnga b rag kelemdame.

²⁷Tao-tao bala a Zeezi yeela bãmb yaa: «Keng‑y sũyã la y ra zoe rabeem tɩ yaa maam.»

²⁸La a Pɩyɛɛr leokame yaa: «Zu-soaba, sã n sɩd yaa yãmb bɩ y yeel-m tɩ m kẽn koomã zug n wa yãmb nengẽ.»

²⁹Bãmb yeela yẽnda: «Wa.» Dẽ, a Pɩyɛɛr yii koom koglgẽ wã n kẽn koomã zug n dabd a Zeezi nengẽ.

³⁰La a Pɩyɛɛr sẽn yã tɩ sobgã yaa wʋsgo, rabeem yõka yẽnda. La yẽnda sẽn sɩng n na n lisã, a kelmame n yeele: «Zu-soaba, fãag-y-ma.»

³¹Tao-tao bala, a Zeezi tẽega b nug n gãd yẽnda n yeel-a: «Tẽeb bilf soaba, yaa bõe tɩ fo yam yoaada?»

³²Bãmb kẽe koom-koglgã pʋgẽ la sobgã yõkame.

³³Neb nins sẽn dag n be koom-koglgã pʋgẽ wã wõgemda a Zeezi taoor n yeele: «Yãmb sɩd yaa Wẽnnaam Bi-ribla.»

³⁴Bãmb dʋʋga ko-kãsengã n ta Zenezarɛt tẽnga.

³⁵Zĩ-kãng nebã bãnga a Zeezi, n kɩt tɩ b saag tẽms nins sẽn pẽ wã fãa n togs nebã, la b talla bãad-dãmbã fãa n wa a Zeezi nengẽ.

³⁶Bãad-dãmbã bõosa a Zeezi tɩ b bas tɩ b sɩɩs baa yaa bãmb fuugã noor bala. La neb nins fãa sẽn sɩɩsã paama laafɩ zãnga.