Read SEBR SÕNGO, 1998 A Matye koe‑noogo 15 Bible Online

A Matye koe‑noogo 15 - SEBR SÕNGO, 1998 bible

A Matye koe‑noogo 15

¹Dẽ, Fariizẽ-dãmb ne tõog karen-saam-dãmb n yi Zeruzalɛm n wa a Zeezi nengẽ n sok-b yaa:

²«Bõe yĩng tɩ yãmb karen-biisã kɩɩsd kãsem-dãmbã miningu? Bala, bãmb sã n na n dɩ b ka nudgd b nus ye.»

³A Zeezi leok-b lame yaa: «La yãmba, bõe yĩng tɩ yãmb kɩɩsd Wẽnnaam tõogã y mensã mining sakr yĩnga?»

⁴Bala, Wẽnnaam yeelame: «Waoog f ba la f ma, la ned ning sẽn na n tʋʋs a ba bɩ a ma, bɩ b kʋ‑a.»

⁵La yãmba, yãmb yetame tɩ ned ning sẽn na n yeel a ba bɩ a ma: «Ade, bũmb ning mam sẽn dag n na n dɩk sõng yãmb lebga Wẽnnaam dẽnda.»

⁶Dẽ wã, ka tɩlɛ t'a waoog a ba bɩ a ma ye. Woto, yãmb kɩtdame tɩ Wẽnnaam goamã lebg zaalem tɩ yãmb miningã reeg zĩiga.

⁷Zãmb dãmba, a Ezayi sɩd togsa bãngr goam ne yãmb yell n yeele:

⁸«Nin-kãensã waoogda maam ne nobɩmse, la b sũyã zãra ne maam.

⁹Bãmb sẽn waoogd maamã yaa zaalem, bala, bãmb zãmsda nebã ninsaalb tõod bala.»

¹⁰La a Zeezi boola neb kʋʋngã n yeel-b yaa: «Kelg-y la y bãng tɩ

¹¹ka bũmb ning sẽn kẽed ninsaal noorẽ wã n maand-a t'a yɩ rẽgd ye. Yaa bũmb ning sẽn yit ninsaal noorẽ wã, n maand-a t'a lebg rẽgdo.»

¹²Dẽ, bãmb karen-biisã kolgame n yeel bãmb yaa: «Yãmb bãngame tɩ y goamã zaba Fariizẽ-dãmbã sɩda?»

¹³A Zeezi leokame n yeele: «B na n võoga bõn-bɩtg ning fãa mam ba sẽn be arzãnã sẽn ka selã.

¹⁴Bas-y-ba. Bãmb yaa zoens sẽn tat zoense. Zoang sã n tat zoanga, bãmb b yiibã fãa na n lʋɩɩ bokẽ.»

¹⁵A Pɩyɛɛr yeela a Zeezi yaa: «Bilg‑y tõnd yel-bũn-kãng võore.»

¹⁶La a Zeezi yeela yẽnda yaa: «Yãmb me yam ket n nan ka wek la?

¹⁷Yãmb ka mi tɩ bũmb nins fãa sẽn kẽed ninsaal noorẽ kẽeda pʋgẽ tɩ b yaool n tɩ bas-a we-kɛɛng la?

¹⁸La bũmb ning sẽn yit noorẽ yita sũurẽ, la yaa bõn-kãens n maand ned t'a yɩ rẽgdo.

¹⁹Bala, tags-wẽnse, nin-kʋʋre, yoobo, raglem, wagdem, zĩrẽ la kãnegr yita sũur pʋgẽ.

²⁰Ad yaa bõn-kãens n maand ned t'a yɩ rẽgdo. La tɩ rɩ n ka nudg f nus ka maand ned t'a yɩ rẽgd ye.»

²¹A Zeezi basa zĩ-kãng n loog n kẽng Tɩɩr ne Sɩdõ soolmẽ.

²²La gese, Kana pag sẽn yit tẽn-kãens zẽka a koɛɛg n yeel bãmb yaa: «Zu-soaba! A Davɩɩd Bi-ribla! Zoe-y mam nimbãanega. Zĩn n namsd mam bi-pugl hal wʋsgo.»

²³La bãmb ka leok yẽnda tɩ bũmb ye. Bãmb karen-biisã kolgame n kos bãmb n yeele: «Rig-y‑yã t'a looge, bala a pʋgda tõnd n kelemdẽ.»

²⁴A Zeezi leokame: «B sẽn tʋm maamã, yaa Israyɛll buudã pe-menemdsã nengẽ bala.»

²⁵La pagã waame n wõgemd bãmb taoor n yeele: «Zu-soaba, sõng-y-ma.»

²⁶A Zeezi leokame: «Ka sõama tɩ b rɩk kamb dɩɩb n lob ba-bi ye.»

²⁷La pagã leokame yaa: «Zu-soaba, yaa sɩda, la baoosgo, ba-bi rɩta rɩ-zersã sẽn lʋɩt b zu-soben-dãmbã taabl tẽngrã.»

²⁸Dẽ, a Zeezi yeel-a lame: «Paga, ad f tẽebã yaa kãsenga. Bɩ fo sẽn datã yɩ.» La wakat-kãng bala, a bi-puglã paama maagre.

²⁹A Zeezi yii be n kẽng Galɩle ko-kãsengã noore. Bãmb dʋʋ tãngã zug n zĩnd be.

³⁰La neb wʋsg waa bãmb nengẽ ne wobse, la zoense, ne mugsi, la koms-rãmba, la neb wʋsg bãas a taab sẽn tarã, n zĩnig bãmb a Zeezi taoore, la a Zeezi maaga bãmba.

³¹La neb kʋʋngã sẽn yãnd mugsã sẽn gomdã, la koms-rãmbã sẽn paam maagrã, la wobsã sẽn kẽnd sõama wã, la zoensã sẽn yãtã, b yɛɛsame n waoog Israyɛll Wẽnnaamã.

³²A Zeezi boola b karen-biisã n yeele: «Kʋʋn-kãngã nimbãaneg tara maam, bala, yaa rasem a tãab moasã b sẽn be ne maam, la b ka tar dɩɩb sẽn na dɩ ye. Mam ka rat n kuils-b ne kom tɩ b wa tek n tadg sorã zug ye.»

³³Karen-biisã soka bãmb yaa: «Tõnd na n maana a wãn n paam bur weoogẽ ka sẽn sekd tɩ nin-kãensã fãa rɩ n tɩge?»

³⁴A Zeezi sok-b lame: «Yãmb tara bur a wãna?» Tɩ b leoke: «A yopoe n paas zĩm-bãooneg bilfu.»

³⁵Dẽ, a Zeezi yeela nebã tɩ b zĩnd tẽnga.

³⁶La bãmb deega bur a yopoe wã ne zĩmã. La b sẽn ning-a barka, b kaoome n kɩs b karen-biisã la bãmb pʋɩ neb kʋʋngã.

³⁷Nebã fãa rɩɩme n tɩge, la b wʋka gɩrsã sẽn kellã tɩ pid pet a yopoe.

³⁸Neb nins sẽn dɩ wã sõor yaa tus a naase, pagbã ne kambã sõor sẽn ka naag ye.

³⁹Dẽ poore, a Zeezi kuilsa neb kʋʋngã la b kẽ koom-koglg n kẽng Magdala soolem.