Read SEBR SÕNGO, 1998 A Matye koe‑noogo 16 Bible Online

A Matye koe‑noogo 16 - SEBR SÕNGO, 1998 bible

A Matye koe‑noogo 16

¹Fariizẽ-dãmbã ne Saduusẽ-dãmbã kolga a Zeezi. La bãmb sẽn dat n mak bãmb yĩnga, b kosa a Zeezi tɩ b maan bãnd sẽn yit yĩngr tɩ b yã.

²A Zeezi leok-b lame n yeele: «Zaabre, yãmb yetame tɩ zĩigã na n yɩɩ vẽenega, bala yĩngr yaa miuugu.

³La yibeoogo, yãmb yetame tɩ saag na n nii rũndã, bala yĩngr yaa miu-sablga. Yãmb mii yĩngr yɛl bilsgu, n yaool n ka tõe n bãng bãn sẽn wilgd wakatã yɛlã ye.

⁴Zamaan neb sẽn yaa wẽns la yoaadbã baooda bãnde. La b ka na n kõ bãmb bãnd a to tɩ ka a Zonaas bãndã ye.» La a Zeezi basa bãmb n looge.

⁵A Zeezi karen-biisã sẽn wa n dabd ko-kãsengã rʋʋnd a to wã, b yĩmame n ka zɩ bur ye.

⁶A Zeezi yeela bãmb yaa: «Gũus‑y mens neer ne Fariizẽ-dãmbã la Saduusẽ-dãmbã rã-bɩlle.»

⁷La b tagsame tɩ yaa bãmb sẽn ka zɩ burã yĩng la a Zeezi gom woto.

⁸La a Zeezi bãnga b tagsgã n yeel-ba: «Tẽeb bilf rãmba! Yaa bõe tɩ yãmb tagsd y sũyẽ tɩ yaa yãmb sẽn ka zɩ burã yĩnga?

⁹Yãmb ket n nan ka wʋm la? Yãmb ka tẽr bur a nu wã sẽn sek raop tus a nu wã, la a kɛlã yãmb sẽn wʋkã pet sõore?

¹⁰Yãmb ka tẽr bur a yopoe wã sẽn sek raop tus a naase, la a kɛlã yãmb sẽn wʋkã pet sõore?

¹¹Bõe tɩ yãmb ka bãng tɩ ka bur yell la mam gomd ne yãmba? Gũus-y y mens ne Fariizẽ-dãmbã la Saduusẽ-dãmbã rã-bɩlle.»

¹²La karen-biisã bãngame tɩ b sẽn yeel bãmb tɩ b gũus ne bũmb ningã, ka rã-bɩll sẽn ningd burã ye, la yaa Fariizẽ-dãmbã ne Saduusẽ-dãmbã zãmsgã.

¹³A Zeezi sẽn ta Sezaare sẽn yaa a Filip soolmã tẽngã, b soka b karen-biisã yaa: «Nebã yetame tɩ maam a Ninsaal Bi-riblã yaa ãnda?»

¹⁴B leokame: Neb kẽer yetame tɩ yãmb yaa a Zãmbatiisi, tɩ kẽer t'a Eli, tɩ kẽer t'a Zeremi wall Wẽnnaam no-rɛɛsdbã ned a yembre.»

¹⁵T'a Zeezi leb n sok-ba: «La yãmba, yãmb yetame tɩ mam yaa ãnda?»

¹⁶A Sɩmo Pɩyɛɛr leokame n yeele: «Yãmb yaa Kirisã, Wẽnnaam sẽn vɩ wã Bi-ribla.»

¹⁷La Zeezi goma ne-a n yeel-a: «Sɩmo! A Zonaas biiga, bark bee fo zugu. Bala, ka nemd walla zɩɩm n vẽneg foom bõn-kãngã ye. Yaa m ba sẽn be arzãnã.

¹⁸La maam, mam yeta foom tɩ fo yaa Pɩyɛɛre, la kug-kãngã zugu, mam na n mee m Wẽnd doogã, la kɩɩm-kulg ka na n tõog-a ye.

¹⁹Mam na n kõo foom arzãn soolem kʋɩlen-biisi: ‹Bũmb ning fãa fo sẽn na n loe tẽng zug ka na n loee arzãna, la bũmb ning fãa fo sẽn na n lok tẽng zug ka na n loka arzãna.›

²⁰Dẽ, bãmb sagla b karen-biisã neere, n yeel-b tɩ b ra togs ned baa a yembr tɩ bãmb yaa Kiris ye.»

²¹Sẽn sɩng wakat-kãnga, a Zeezi sɩngame n wilg b karen-biisã tɩ yaa tɩlɛ tɩ bãmb kẽng Zeruzalɛm tɩ kãsem-dãmbã ne maan-kʋʋdbã ne tõog karen-saam-dãmbã nams bãmb wʋsgo, la b kʋ bãmba. La rasem a tãab daarã, bãmb na n vʋʋgame.

²²A Pɩyɛɛr boola bãmb n yi kɛɛng n leng-b n yeele: «Zu-soaba, Wẽnd na zãage! Yel-kãngã kõn paam yãmb abada.»

²³La a Zeezi wẽnemdame n yeel a Pɩyɛɛr yaa: «Leb mam poorẽ, Sʋtãana! Fo yaa gɩdgr mam sor zugu. Bala, fo tagsdã ka Wẽnnaam dẽnd ye, yaa ninsaal dẽnda.»

²⁴Dẽ, a Zeezi yeela b karen-biisã yaa: «Ned sã n dat n tũ maam, bɩ a kɩɩs a meng raabo, n tʋk a da-pɩk n pʋg maam.

²⁵Bala ned ning sẽn baood tɩ kogl a vɩɩm, a vɩɩm na sãame, la ned ning sẽn na n bas a vɩɩm mam yĩnga, a na leb n paam-a.

²⁶La ned sã n paam dũni gill fãa n bas n ki, a yõod bee yɛ? Walla bõe la ninsaal na n dɩk n tek ne a vɩɩmã?

²⁷Bala, Ninsaal Bi-riblã na n waa ne b ba wã ziiri, ne b malegse. La rẽ wẽnde, bãmb na n dola ned kam fãa wa sẽn zems a tʋʋmde.

²⁸Sɩd-sɩda, mam yeta yãmb tɩ sẽn be-b ka wã, neb kẽer n ka na n ki hal tɩ b yãnd Ninsaal Bi-riblã sẽn wat ne b naamã ye.»