Read SEBR SÕNGO, 1998 A Matye koe‑noogo 19 Bible Online

A Matye koe‑noogo 19 - SEBR SÕNGO, 1998 bible

A Matye koe‑noogo 19

¹La a Zeezi sẽn gom gom-kãens n sɛ, b yii Galɩle n kẽng Zʋʋde soolem sẽn be Zʋrdẽ rʋʋndã.

²Neb kʋʋng wʋsg tũu bãmba, la a Zeezi maag-b-la beenẽ.

³Fariizẽ-dãmbã kolga a Zeezi n na n bẽd bãmba. B sokame: «Dẽ yĩnga, noor beeme tɩ rao rig a pag a beegr buud fãa yĩnga?»

⁴La a Zeezi leokame n yeele: «Yãmb ka karem tɩ hal sɩngr wẽndẽ, Naandã naan-b-la rao ne pag laa?»

⁵La b yeele: «Yaa woto yĩng tɩ rao na n bas a ba ne a ma n zĩnd ne a paga, la bãmb b yiibã na n yɩɩ yĩng a yembre.»

⁶Woto, b ka leb n yaa neb a yiib ye, b yaa yĩng a yembre. Dẽ yĩnga, bɩ ninsaal da welg bũmb nins Wẽnnaam sẽn lagem ne taabã ye.

⁷Bãmb soka a Zeezi: «La bõe yĩng t'a Moyiis kõ noor tɩ sã n na n dig pag bɩ b kõ‑a baosg sebr la b rig-a?»

⁸A Zeezi leoka bãmba: «Yaa yãmb sũyã sẽn yaa kegemsã yĩng n kɩt t'a Moyiis kõ yãmb noor tɩ y rig y pagbã. La hal sɩngr wẽndẽ, rag n ka a woto ye.

⁹La mam yeta yãmb tɩ ned sã n dig a paga, tɩ sã n ka yoob yĩnga, n dɩk a to, a maanda yoobo.»

¹⁰Bãmb karen-biisã yeela bãmb yaa: «Rao ne pag yellã sã n yaa a woto, dẽnd f sã n ka kẽ kãadem n são.»

¹¹A Zeezi leok-b lame yaa: «Nebã fãa ka wʋmd gom-kãngã võor ye, sã n ka b sẽn kõ b rãmb pãn-tõog tɩ wʋma bala.

¹²Bala, zu-soben-dãmb n be n yaa a woto hal b rogem wakate, la kẽer yaa neb n maan-b tɩ b lebg a woto, la kẽer maana b mens zu-soben-dãmb arzãn soolmã yĩnga. Ned ning sẽn tõe n wʋm-a koe-kãngã võor bɩ a wʋme.»

¹³Dẽ, neb talla kom-bãooneg n wa a Zeezi nengẽ tɩ b na tik-b ne b nus n pʋʋs b yĩnga. La karen-biisã lenga bãmba.

¹⁴La a Zeezi yeelame: «Bas-y kom-bãoonegã, tɩ b wa mam nengẽ la y ra gɩdg-b ye. Bala, arzãn soolem yaa neb nins sẽn wẽnd bãmbã yĩnga.»

¹⁵A Zeezi tika kambã ne b nusi, n yaool n yi zĩ-kãngã.

¹⁶Dẽ, dao a yembr kolg n soka a Zeezi yaa: «Karen-saamba, bõe n yaa sõama mam sẽn tog n maane, n tõog n paam vɩɩm sẽn kõn sa?»

¹⁷A Zeezi leoka yẽnda n yeele: «Yaa bõe tɩ fo sokd maam n dat n bãng sẽn yaa sõama? Ned a yembr bal n yaa sõama. Fo sã n dat n kẽ vɩɩm sẽn kõn sa wã pʋgẽ, bɩ f sak tõodã.»

¹⁸Yẽnda soka a Zeezi: «Tõ-bʋse?» La a Zeezi leoka yẽnda: «Da kʋ ye, da yo ye, da zu ye, da kɩs kaset-zĩrẽ ye,

¹⁹waoog f ba la f ma, la f nong f to wa f menga.»

²⁰Bi-bɩɩgã yeela a Zeezi yaa: «Mam saka tõ-kãens fãa! Bõe n ket yɛsa?»

²¹A Zeezi yeel-a lame yaa: «Fo sã n dat n zems zãnga, kẽng n tɩ koos fo sẽn tarã, n dɩk ligdã n kõ naong rãmba, la fo na paam paoong arzãn pʋga. La f wa n tũ maam.»

²²Bi-bɩɩgã sẽn wʋm gom-kãensã, a looga ne sũ‑sãoongo. Bala, a ra tara arzegs wʋsgo.

²³Dẽ, a Zeezi yeela b karen-biisã yaa: «Sɩd-sɩda, mam yeta yãmb t'a na n yɩɩ toog ne arzɛk soab t'a kẽ arzãn soolem pʋga.

²⁴Mam leb n yeta yãmb tɩ yʋgemd sẽn na n tũ fu-pĩim yõorẽ n loog yaa naana n yɩɩd arzɛk soab sẽn na n kẽ Wẽnnaam soolem pʋga.»

²⁵Karen-biisã sẽn wʋm gom-kãense, a linga bãmb wʋsgo, la bãmb soka taab yaa: «Ãnda soab masã n tõe n paam fãagre?»

²⁶A Zeezi ges-b lame n yeel-ba: «Ne ninsaala bõn-kãng ka tõe ye, la Wẽnnaam tõe bũmb fãa.»

²⁷Dẽ, a Pɩyɛɛr goma ne a Zeezi n yeele: «Tõnd basa bũmb fãa n tũud yãmba, tõnd yell na n yɩɩ a wãn-wãna?»

²⁸A Zeezi leoka bãmb yaa: Sɩd-sɩda, mam yeta yãmb fãa sẽn tũ maamã, tɩ bũmba fãa tekrã wakate, ninsaal bi‑riblã sã n wa zaoond b naamã geer zugu, yãmb me na n zaoonda gɛy piig la a yiib zut n kao Israyɛll buud piig la a yiibã bʋʋdo.

²⁹La ned ning fãa sẽn na n bas a yiri, a ba-bi-raopa, a ba-bi-pogse, a ba, a ma, a paga, a kamba wall a pʋʋg mam yʋʋrã yĩnga, a na n paama bũmb nins a sẽn basã buud naoor koabga, la a paam vɩɩm sẽn kõn sɛ wã.

³⁰Dẽenem dãmb wʋsg n na n lebg yaoolem dãmba, tɩ yaoolem dãmb wʋsg lebg dẽenem rãmba.