Read SEBR SÕNGO, 1998 A Matye koe‑noogo 20 Bible Online

A Matye koe‑noogo 20 - SEBR SÕNGO, 1998 bible

A Matye koe‑noogo 20

¹Bala, arzãn soolem wẽnda wa yir soab sẽn yi yibeoog pĩnd n na n dɩgs tʋmtʋmdb tɩ b tɩ tʋm a reezẽ tɩɩs pʋʋgẽ.

²B sara ne taab tɩ daar a yembr tʋʋmd na n yɩɩ deniye a yembre, t'a kɩt tɩ b kẽng a reezẽ tɩɩs pʋʋgẽ wã.

³A yii sõ-bɩɩmd wakate, n yãnd neb sẽn be raagẽ wã n ka maand bũmb ye,

⁴n yeel-ba: «Yãmb me kẽng n tɩ tʋm m reezẽ tɩɩs pʋʋgẽ wã, tɩ m na n kõ-y-la yaood sẽn zemse.»

⁵Nin-kãens kẽngame. Dẽ, a leb n yii wĩnto-sʋka, la wẽn-kaoore n leb n maan a woto bala.

⁶Wĩndg sẽn dabd lʋɩɩse, a leb n yiime n yãnd neb sẽn yas be, n sok-ba «Bõe tɩ yãmb be ka daarã tõr n ka maand bũmbu?»

⁷Bãmb leokame: «Yaa tɩ ned ba a yembr ka rɩk tõnd tʋʋmd ye.» Yẽnda yeel-b lame yaa: «Bɩ yãmb me kẽng mam reezẽ tɩɩs pʋʋgẽ wã.»

⁸Zĩ-sobd sẽn ta, reezẽ tɩɩs pʋʋgã soab yeela ned ning sẽn get-a yẽnda tʋʋmã yellã yaa: «Bool tʋmtʋmdbã n yao ned kam fãa a yaoodo, sɩng ne yaoolem dãmbã n tɩ baas ne dẽenem dãmbã.»

⁹Neb nins sẽn wa‑b wĩndgã lʋɩɩs wakatã kolgame tɩ b kõ ned kam fãa deniye a yembre.

¹⁰Dẽenem dãmbã n yaool waoongo, n tẽed tɩ bãmb na n deeg n yɩɩda neb a taabã. La a kõo bãmb ned kam fãa deniye a yembre.

¹¹B sẽn deeg deniye a yembr-yembrã, b yẽgma ne yirã soab n yeele:

¹²«Sẽn wa-b yaoolmã tʋma lɛɛr a yembr tãa, tɩ tõnd tʋm daarã tõr n nams ne tʋʋlgã, tɩ yãmb kõ bãmb yaood a yembr ne tõndo.»

¹³La a leoka bãmb ned a yembr a woto: «M zoa, mam ka zãmb foom ye. Tõnd dag n ka sar ne taab deniye a yembr tɩ fo sak sɩda?

¹⁴Dẽ wã, deeg f ligd n looge. Maam n dat n kõ yaoolem soabã wa foom.

¹⁵Dẽ yĩnga, mam ka tar noor tɩ maan m sẽn dat ne m sẽn so wã bɩ? Bɩ fo getame tɩ mam maan-neerã ka sõama?»

¹⁶Woto, yaoolem dãmbã na n yɩɩ dẽenem dãmba, tɩ dẽenem dãmbã yɩ yaoolem dãmba.

¹⁷La a Zeezi sẽn dabd Zeruzalɛm, b peega b karen-biis piig la a yiibã toore, la b yeela bãmb sorã zug yaa:

¹⁸«Ges-y-yã! Tõnd dabda Zeruzalɛm, la b na n yõka Ninsaal Bi-riblã n kõ maan-kʋʋdbã kãsem-dãmbã ne tõog karen-saam-dãmbã, la b na n kaoo bãmb bʋʋd tɩ yɩ kũum.

¹⁹La b na n ninga bãmb bu-zẽms nusẽ tɩ b yaal bãmba, la b pãb-b ne kalwaase, la b ka-b da-pɩk zugu. La rasem a tãab daare, b na n vʋʋgame.»

²⁰Dẽ, a Zebde kom-dibli wã ma waa a Zeezi nengẽ ne a kom-dibli wã n yĩgimd bãmb taoor n na n bõos bãmba.

²¹Bãmb soka yẽnda t'a rata bõe? La a yeela bãmb yaa: Kõ-y noor tɩ mam kom-dibl‑kãensã b yiibã zĩnd ne yãmb y soolmã pʋgẽ, a yembr y rɩtgo, a to wã y goabga.

²²A Zeezi leokame n yeele: «Yãmb ka mi yãmb sẽn kot maam bũmb ningã ye. Dẽ yĩnga, yãmb tõe n yũu bõn-yũudl ning mam sẽn na n yũ wã?» La b leokame: «D tõeeme.»

²³La a Zeezi leok-b lame n yeele: «Yaa sɩd tɩ yãmb na n yũu bõn-yũudl ning mam sẽn na n yũ wã. La a ka be ne maam tɩ kõ noor tɩ ned zĩnd mam dɩtgo wall mam goabg ye. Mam sã n na n kõ me, yaa neb nins mam ba sẽn segl zĩ-kãens b yĩngã.»

²⁴Karen-biis piigã sẽn wʋm woto, b sũyã sãama ne ba-biis a yiibã.

²⁵A Zeezi boola bãmb n yeele: «Yãmb miime tɩ soolem nanambsã so b nebã ne pãng n dɩt naam, la tɩ nin-kãsemsã weoogda b nebã.

²⁶La a kõn yɩ a woto yãmb sʋk ye. Ned ning fãa sẽn dat n yɩ yãmb sʋkã nin-kãsenga, bɩ a yɩ yãmb sõngda.

²⁷La ned ning fãa sẽn dat n yɩ yãmb taoor soaba, bɩ a yɩ yãmb yamba.

²⁸Yaa woto yĩng la Ninsaal Bi-riblã wa yã. Ka tɩ nebã na sõng bãmb ye, la yaa tɩ bãmb na sõng nebã, la tɩ kõ b vɩɩmã, n yao n fãag neb wʋsgo.»

²⁹La bãmb sẽn yi Zeriko, neb kʋʋng wʋsg tũu a Zeezi.

³⁰La zoens a yiib sẽn zĩ sorã noor wʋmame tɩ yaa a Zeezi n loogda, dẽ, b zẽka b koees n yeele: «Zu-soaba! A Davɩɩd Bi-ribla! Zoe-y tõnd nimbãanega.»

³¹Neb kʋʋngã Tãsa bãmb n yeel-b tɩ b sĩndi. La b zẽka b koɛɛg n yɩɩd pĩnd n yeele: Zu-soaba! Davɩɩd Bi-ribla! Zoe-y tõnd nimbãanega.

³²A Zeezi yalsame n bool-b n sok yaa: «Yãmb datame tɩ mam maan bõe n kõ‑yã?»

³³La b yeelame: «Zu-soaba, d data d ninã pukri.»

³⁴La a Zeezi zoee bãmb nimbãanega, n sɩɩs b ninã. La tao-tao bala b ninã pukame, la bãmb tũu a Zeezi.