Read SEBR SÕNGO, 1998 A Matye koe‑noogo 21 Bible Online

A Matye koe‑noogo 21 - SEBR SÕNGO, 1998 bible

A Matye koe‑noogo 21

¹Bãmb sẽn kolg Zeruzalɛm n ta Bɛtfaaze sẽn be oliiv tɩɩs tãngã sẽnẽ, a Zeezi tʋma b karen-biis a yiib

²n yeel-b yaa: «Kẽng-y tẽng ning sẽn be yãmb taoorã. Yãmb sã n kẽ be bala, y na n yãnda bõn-yãang sẽn loe tɩ bõn-bil be ne-a. Lok-y-b n wa n kõ maam.

³Ned sã n yeel‑y tɩ bũmb bɩ y leok tɩ yaa Zu-soabã n dat-ba, la wakat-kãnga, a na n bas-b lame tɩ b looge.»

⁴Bõn-kãng maaname tɩ Wẽnnaam no-rɛɛsã sẽn gomã paam pidsgu:

⁵«Yeel-y Sɩyõ nebã yaa: Ges-y-yã! Yãmb Rĩmã zaoo bõn-yãanga, bõn-bila, rũng b sẽn zombd biiga, n wat yãmb nengẽ ne sũ-bʋgsem wʋsgo.»

⁶Karen-biisã kẽngame n tɩ maan wa a Zeezi sẽn yeel bãmbã.

⁷Bãmb talla bõn-yãangã ne bõn-bilã n wa, n paal b fut bõensã poɛy t'a Zeezi zombe.

⁸Neb kʋʋngã kẽer yɛɛda b fut sorã zugu, tɩ kẽerã kɛ tɩɩs vãad n gãneg sorã zugu.

⁹Neb nins sẽn dag n be a Zeezi taoorã ne neb nins sẽn pʋgd-b bãmbã rag n kelemdame n yetẽ yaa: «Hozaana[3] a Davɩɩd Bi-ribla! Bark bee ned ning sẽn wat ne Zu-soabã yʋʋrã zugu! Hozaana hal saasẽ.»

¹⁰A Zeezi sẽn kẽ Zeruzalɛm, tẽngã fãa rãmbame tɩ b sokdẽ tɩ yaa yɛ ned la woto?

¹¹Kʋʋngã rag n leokdame tɩ yaa a Zeezi, Wẽnnaam no-rɛɛs sẽn yit Nazarɛt sẽn be Galɩle soolem.

¹²A Zeezi kẽe wẽnd doogã zakẽ n dig neb nins fãa sẽn dag n koosd la b raad wẽnd doogã zakẽ wã. Bãmb leeba ligd tekdbã taabl‑dãmba, la wal-koaasdbã goeelse.

¹³La a Zeezi yeel-b lame: «A gʋlsame tɩ b na n boola mam doogã tɩ pʋʋsg roogo.» La yãmba, yãmb maan-a lame t'a lebg wagda geongo.

¹⁴Zoens la wobs kolga a Zeezi wẽnd doogẽ wã, la a Zeezi maag-b lame.

¹⁵Maan-kʋʋdbã kãsem-dãmbã ne tõog karen-saam-dãmbã sẽn yã bõn-yɛɛsds nins a Zeezi sẽn maanã, la kambã sẽn kaasd Wẽnnaam doogẽ wã n yetẽ tɩ «hozaana a Davɩɩd Bi-riblã», b sũyã puugame.

¹⁶La bãmb soka a Zeezi yaa: «Yãmb wʋmda kambã sẽn yetã bɩ?» A Zeezi leoka bãmba: N-yẽe, la m sokda yãmb y sã n nan ka karem gom-kãensã sẽn be gʋls sõmyã pʋgẽ wã sẽn yet tɩ: «Yãmb paama pẽgr sẽn yit kom-bãooneg la kamb sẽn ket n yẽsemdẽ noyẽ?»

¹⁷A Zeezi basa bãmb be n yi tẽngã n kẽng Betani n tɩ pa be yʋn-kãnga.

¹⁸La yibeoogo, a Zeezi sẽn wa n lebg n lebd Zeruzalɛmã, kom yõka bãmba.

¹⁹La bãmb yãa kankang sẽn be sorã noore. Bãmb kẽngame n tɩ mik t'a ka tar biis ye, yaa vãad bala. La b yeel-a lame yaa: «Fo kõn leb n wom biis ye, abada.» La wakat-kãng bala kankangã kʋɩɩme.

²⁰La karen-biisã sẽn yã woto, a linga bãmba, tɩ b soke: «Kankangã yɩɩ wãn n kʋɩ zĩig pʋgẽ a woto?»

²¹A Zeezi leoka bãmb n yeele: Mam yeta yãmb sɩda, tɩ yãmb sã n tar tẽeb n ka sãmbdẽ, yãmb na n maana bũmb ning sẽn maan kankangã, la ka rẽ bal ye. Yãmb sã n yeel tãn-kãngã t'a yik a sẽn beẽ wã n kẽ ko-kãsengã pʋgẽ, a na n yɩɩ a woto bala.

²²Yãmb sẽn na n pʋʋs n kos bũmb ning fãa ne tẽebo, y na n paamame.

²³A Zeezi kẽe wẽnd doogẽ wã, la b sẽn zãmsd nebã wakate, maan-kʋʋdbã kãsem-dãmb ne tẽngã nin-kẽemb wa n soka bãmb yaa: «Yaa ne no-bʋg la yãmb maand bõn-kãngã, la yaa ãnda n kõ yãmb no-kãnga?»

²⁴A Zeezi leoka bãmb yaa: «Mam me na n soka yãmb sokr a yembre. Yãmb sã n leok maam, mam na yaool n togs yãmb mam sẽn paam noorã zĩig ning n maand bõn-kãnga.

²⁵A Zã lisgã yii yɛɛnẽ? Arzãn bɩ, bɩ ninsaalb nengẽ?» La b yẽsa ne taab n yeele: «Tõnd sã n leok t'a yii arzãna, b na n yeelame tɩ la yaa bõe tɩ tõnd ka tẽ bãmba?

²⁶La tõnd sã n leok t'a yii ninsaalb nengẽ, d tog n zoee neb kʋʋngã: Bala, b fãa tẽedame t'a Zã yaa Wẽnnaam no-rɛɛsa.»

²⁷Dẽ, b leoka a Zeezi: «Tõnd ka mi ye.» T'a Zeezi lebs n leok-ba: «Mam me ka na n togs yãmb m sẽn paam noorã zĩig ning n maand bõn-kãngã wã ye.»

²⁸Yãmb tagsg yaa a wãna? Dao a yembr n dag n tar a kom-dibli a yiibu. Yẽnda goma ne pipi soabã n yeel-a: «M biiga, kẽng n tɩ tʋm m reezẽ tɩɩs pʋʋgẽ wã rũndã.»

²⁹La a leokame: «Mam ka na n kẽng ye.» La yẽnda teka yam n kẽnge.

³⁰Ba wã goma ne yiib-n-soabã n yeel yẽnda me a woto bala. La bi-kãng leokame n yeele: «M baaba, mam na n kẽngame.» La a yaool n ka kẽng ye.

³¹Bãmb b yiibã sʋka, bʋg n maan a ba wã raabo? La bãmb leokame: «Yaa pipi soabã.» La a Zeezi yeela bãmb yaa: «Mam yeta yãmb sɩd-sɩd tɩ yaood dɛɛgdbã ne pʋg-yoaadbã na n denga yãmb Wẽnnaam soolmã pʋgẽ.

³²Bala, a Zã waa yãmb nengẽ n wilg yãmb tɩrlem sore, la yãmb ka tẽ yẽnda ye. La yaood dɛɛgdbã ne pʋg-yoaadbã tẽe yẽnda. La baa ne yãmb sẽn yã bõn-kãngã, yãmb yam ka tek tɩ y tẽ-a ye.»

³³Kelg-y yel-bũnd a to. Yir soab a yembr n dag n sel reezẽ tɩɩs pʋʋgo, n wẽ yãgr n gũbg-a, la a tuk reezẽ rãam wẽkr bok a pʋgẽ, la me gãosgo, n dɩk-a n peng reezẽ tɩɩs pʋʋg koaadba, la a yi n tog sore.

³⁴Reezẽ wã yãgsg wakat sẽn kolge, yẽnda tʋma a tʋmtʋmdb reezẽ tɩ‑koaadbã nengẽ tɩ b tɩ reeg reezẽ wã.

³⁵La reezẽ tɩ‑koaadbã yõga tʋmtʋmdbã n pãb a yembre, n kʋ a yembre la b lob a tãab soabã ne kuga.

³⁶Yẽnda leb n tʋma tʋmtʋmdb a taaba, sõor sẽn yɩɩd pĩnd dãmbã, la b maana bãmb me a woto.

³⁷A wa n baas n tʋma a meng bi-ribl bãmb nengẽ n yet a sũurẽ a woto: «B na n waoog-a lame.»

³⁸La reezẽ tɩ‑koaadbã sẽn yãnd biigã, b yẽsa ne taab a woto: Yaa yõwã n na n wa soog a ba wã paoongã fãa. Wa-y tɩ d kʋ-a tɩ paoongã lebg tõnd dẽnda.

³⁹La bãmb yõka biigã n yiis reezẽ tɩɩs pʋʋgẽ wã n kʋ.

⁴⁰Moasã, reezẽ tɩɩs pʋʋgã soab sã n wa, a na n maana koaadb kãens bõe?

⁴¹Bãmb leoka a Zeezi yaa: «A na n kɩtame tɩ nin-wẽn‑kãens ki nimbãan-kũum, la a rɩk pʋʋgã n peng koaadb a taab sẽn na kõ yẽnda reezẽ wã a bɩʋʋng wakate.»

⁴² Dẽ, a Zeezi yeela bãmb yaa: Yãmb nan ka karem gʋls-sõamyã sẽn yetã la? «Kugr ning tãn-metbã sẽn zãgsã, n lebg roogã pãng kugri, a soakã zĩig kugri. Yaa Zu-soabã n kɩt t'a lebg a woto, la a yaa bõn-kãseng tõnd nifẽ.»

⁴³Yaa woto yĩng tɩ mam yet yãmb tɩ b na n deega Wẽnnaam soolmã yãmb nugẽ n kõ buud a to sẽn na wom soolmã biisi.

⁴⁴[Ned ning sẽn na n lʋɩ kug-kãngã zug na n tõtmame. La kug-kãngã sẽn na n lʋɩ ned ning zugu, a na n beds-a lame.]

⁴⁵Maan-kʋʋdbã kãsem-dãmbã ne Fariizẽ-dãmbã sẽn wʋm yel-bũndã, b bãngame tɩ yaa bãmb yell la a Zeezi dag n gomda.

⁴⁶Bãmb baoome n dat n yõk a Zeezi la b rag n zoeta nebã, bala, nebã tẽedame t'a Zeezi yaa Wẽnnaam no-rɛɛsa.